ඉතා ළඟදී සිදු වන දේවල් දෙවි හෙළි කරයි
‘මෙය දෙවි විසින් යේසුස්ට දෙන ලද එළිදරව්වකි. දෙවි එය ලබා දුන්නේ තව කෙටි කලකින් සිදු වීමට නියමිත දේවල් තම දාසයන්ට පෙන්වීමටය.’—එළි. 1:1.
ඔබ පිළිතුරු දෙන්නේ කොහොමද?
බ්‍රිතාන්‍ය හා ඇමරිකානු ලෝක අධිරාජ්‍යය නියෝජනය වෙන්නේ අතිවිශාල රූපයේ කොයි කොටසෙන්ද?
බ්‍රිතාන්‍ය හා ඇමරිකානු ලෝක අධිරාජ්‍යය හා එක්සත් ජාතීන්ගේ සංවිධානය අතර තිබෙන සම්බන්ධය යොහන් විස්තර කරන්නේ කොහොමද?
දානියෙල් හා යොහන් පවසන ආකාරයට මිනිස් ආණ්ඩු නැති වෙන්නේ කොහොමද?
1, 2. (අ) දානියෙල්ට හා යොහන්ට දුන් අනාවැකි අධ්‍යයනය කරද්දී අපට තේරුම්ගන්න පුළුවන් මොනවාද? (ආ) මෘගයාගේ මුල් හිස් හයෙන් නියෝජනය වන අධිරාජ්‍යයන් මොනවාද?
දානියෙල්ට හා යොහන්ට දුන් අනාවැකි අධ්‍යයනය කරද්දී අදත් අනාගතයේදිත් සිදු වන දේවල් ගැන තේරුම්ගන්න අපිට අමාරු නැහැ. නෙබුකද්නෙෂර් අතිවිශාල රූපයකුත් දානියෙල් අං දහයක් ඇති මෘගයෙකුත් යොහන් හිස් හතක් ඇති මෘගයෙකුත් දැක්කා. ඒවායින් අපිට ඉගෙනගන්න පුළුවන් මොනවාද? ඒවා ගැන නිවැරදිව දැනගැනීමෙන් අපි පෙලඹෙන්න ඕනෙ මොනවා කරන්නද?
2 එළිදරව් 13වෙනි පරිච්ඡේදයේ සඳහන් මෘගයාගේ මුල් හිස් හය මගින් ඊජිප්තුව, ඇසිරියාව, බැබිලෝනිය, මේදිය හා පර්සියාව, ග්‍රීසිය සහ රෝමය යන අධිරාජ්‍යයන් නියෝජනය වන බව කලින් ලිපියෙන් අපි ඉගෙනගත්තා. එම අධිරාජ්‍යයන් හැම එකක්ම ස්ත්‍රියගෙන් පැවතෙන තැනැත්තන්ට සතුරුකම් පෑවා. (උත්. 3:15) යොහන් ඒ දර්ශනය ගැන ලියූ කාලයේදී ලෝක බලය ලෙස පැවතුණේ රෝමයයි. ඉන්පසුවත් සියවස් ගණනාවක් පුරාම රෝමය බලවත් අධිරාජ්‍යයක්ව තිබුණා. නමුත් අනාවැකියට අනුව තවත් අධිරාජ්‍යයක් පැමිණීමට නියමිත වුණා. ඒ මොකක්ද? මෘගයාගේ හත්වෙනි හිසෙන් නියෝජනය වන එම අධිරාජ්‍යය ස්ත්‍රියගෙන් පැවත එන තැනැත්තාට සැලකුවේ කොහොමද?
හත්වෙනි හිස බ්‍රිතාන්‍යය හා ඇමරිකාව
3. අං දසයක් ඇති භයානක මෘගයාගෙන් නියෝජනය වෙන්නේ මොකක්ද? අං දසයෙන් නියෝජනය වෙන්නේ මොනවාද?
3 එළිදරව් 13වෙනි පරිච්ඡේදයේ සඳහන් මෘගයාගේ හත්වෙනි හිස මොකක්ද කියා තේරුම්ගන්න නම් එම දර්ශනය, දානියෙල් දුටු අං දසයක් ඇති භයානක පෙනුමක් ඇති මෘගයාගේ දර්ශනය සමඟ සන්සන්දනය කළ යුතුයි.a (දානියෙල් 7:7, 8, 23, 24 කියවන්න.) දානියෙල් දුටු මෘගයාගෙන් නියෝජනය වෙන්නේ රෝම අධිරාජ්‍යයයි. (12-13වෙනි පිටුවල රූප සටහන බලන්න.) ක්‍රිස්තු වර්ෂ පස්වන සියවසේදී රෝම අධිරාජ්‍යය කුඩා රාජ්‍යයන්වලට බිඳී යන්න පටන්ගත්තා. මෘගයාගේ අං දසයෙන් නියෝජනය වෙන්නේ රෝම අධිරාජ්‍යයෙන් බිඳී ගිය ඒ රාජ්‍යයනුයි.
4, 5. (අ) පොඩි අඟ කළේ මොකක්ද? (ආ) මෘගයාගේ හත්වෙනි හිසෙන් නියෝජනය වෙන්නේ කාවද?
4 මෘගයාගේ අං දහයෙන් අං තුනක් කඩා දමා මතු වන පොඩි අඟක් දානියෙල් එම දර්ශනයේදී දැක්කා. එය ඉටු වුණේ කොහොමද? දාහත්වන සියවස වන විට රෝම අධිරාජ්‍යය යටතේ තිබූ ස්පාඤ්ඤය, නෙදර්ලන්තය හා ප්‍රංශය රෝමයෙන් බිඳී ගොස් තිබුණා. එවකට ඒවා යම් දුරකට බලවත්ව තිබූ රාජ්‍යයන් ලෙස පැවතුණා. බ්‍රිතාන්‍යයත් රෝමයෙන් බිඳී ගිය රාජ්‍යයක් ලෙස පැවතුණත් ඒ රාජ්‍යයන් තුන තරම්ම බලවත්ව පැවතුණේ නැහැ. නමුත් පසුව, බ්‍රිතාන්‍යය එම රාජ්‍යයන් සමඟ සටන් කර ඒවා පරාජය කළා. දහඅටවෙනි සියවසේ මැදභාගය වන විට බ්‍රිතාන්‍යය අධිරාජ්‍යයක් බවට පත් වෙමින් සිටියා. කොහොමවුණත් ඒ වන විටත් බ්‍රිතාන්‍යය මෘගයාගේ හත්වන හිස බවට පත් වී තිබුණේ නැහැ.
5 බ්‍රිතාන්‍යය ලෝකයේ බලවත්ම රාජ්‍යය බවට පත් වීමත් සමඟම උතුරු ඇමරිකාවේ තිබූ බ්‍රිතාන්‍යයේ යටත් විජිත නිදහස ලබාගෙන එක්සත් ජනපදය බවට පත් වුණා. ලෝකයේ බලවත් රටක් වීම සඳහා බ්‍රිතාන්‍යය එක්සත් ජනපදයට උපකාරය වගේම ආරක්ෂාවත් ලබා දුන්නා. වර්ෂ 1914දී ස්වාමීන්ගේ දවස ආරම්භ වෙද්දී බ්‍රිතාන්‍යය ලෝකයේ විශාලතම අධිරාජ්‍යය බවට පත්ව තිබූ අතර එක්සත් ජනපදය බලවත්ම කාර්මික රට බවට පත්ව තිබුණා.b පළවෙනි ලෝක මහා යුද්ධය කාලයේදී ඇමරිකා එක්සත් ජනපදය හා බ්‍රිතාන්‍යය විශේෂ දේශපාලනික බැඳීමක් ඇති කරගත්තා. ඒ කිට්ටු බැඳීම නිසා බ්‍රිතාන්‍යය හා ඇමරිකාව එක්ව ලෝක අධිරාජ්‍යයක් ලෙස මතු වුණා. එය මෘගයාගේ හත්වෙනි හිස බවට පත් වුණේ එතැන් සිටයි.
6. මෘගයාගේ හත්වන හිස දෙවිගේ සෙනඟට සැලකුවේ කොහොමද?
6 මෘගයාගේ හත්වෙනි හිස ස්ත්‍රියගෙන් පැවතෙන්නන් වන අභිෂේක ලත් අයට සැලකුවේ කොහොමද? (මතෙ. 25:40) ස්වාමීන්ගේ දවස ආරම්භ වන විට අභිෂේක ලත් අයගෙන් සමහරෙක් මේ පොළොවේ සිටියි කියා යේසුස් පැවසුවා. (මතෙ. 24:45-47; ගලා. 3:26-29) වර්ෂ 1914 පටන් බ්‍රිතාන්‍ය හා ඇමරිකානු අධිරාජ්‍යය ශුද්ධ තැනැත්තන්ට විරුද්ධව සටන් කරන්න පටන්ගත්තා. (එළි. 13:3, 7) පළවෙනි ලෝක මහා යුද්ධය කාලයේදී එම ලෝක අධිරාජ්‍යය දෙවිගේ සේවකයන්ට පීඩා කළා. ඔවුන්ගේ ප්‍රකාශන තහනම් කළා. දේශනා කිරීමේ කාර්යයෙහි පෙරමුණ ගත්ත අයව සිරගත කළා. ටික කාලයකට ශුභාරංචිය දේශනා කිරීම ඇණහිටින තත්වයකට පත් වුණා. යෙහෝවා දෙවි මේ සියල්ල කල් ඇතුව යොහන්ට දකින්න සැලැස්සුවා. ඒ විතරක් නෙවෙයි තම සේවකයන් නැවතත් දේශනා සේවය පටන්ගන්න ආකාරයත් දකින්න සැලැස්සුවා. (එළි. 11:3, 7-11) ඒ සියල්ල එලෙසම ඉටු වූ බව යෙහෝවා දෙවිගේ සාක්ෂිකරුවන්ගේ ඉතිහාසයෙන් දැනගත හැකියි.
යකඩ සහ මැටි කලවම් වී ඇති පාද
7. මෘගයාගේ හත්වෙනි හිසට සමාන වෙන්නේ රූපයේ කොයි කොටසද? ඉන් නියෝජනය වෙන්නේ මොකක්ද?
7 යොහන් දුටු මෘගයාගේ හත්වෙනි හිසෙන් හා නෙබුකද්නෙෂර් දුටු රූපයේ පාදවලින් නියෝජනය වෙන්නේ එකම දෙයයි. එනම් බ්‍රිතාන්‍ය හා ඇමරිකානු ලෝක අධිරාජ්‍යයි. විශාල රූපයේ කෙණ්ඩා හෙවත් යකඩ කොටසෙන් නියෝජනය වෙන්නේ රෝම අධිරාජ්‍යයි. බ්‍රිතාන්‍යය මතු වුණේ රෝමයෙන්. එක්සත් ජනපදය මතු වුණේ බ්‍රිතාන්‍යයෙන්. එමනිසා එක්සත් ජනපදයත් යම් ආකාරයකින් රෝමයෙන් මතු වුණා කියා පැවසිය හැකියි. ඒ අනුව බලද්දී, රූපයේ පාදවල යකඩ තිබීම පුදුමයක් නෙවෙයි. නමුත් පාදවල යකඩ සමඟ මැටිත් මිශ්‍ර වී ඇති බව දානියෙල් සඳහන් කළා. (දානියෙල් 2:41-43 කියවන්න.) ඉන් අදහස් වෙන්නේ මොකක්ද? යකඩ සමඟ මැටි මිශ්‍ර වුණාම තනි යකඩ තරම් එහි ශක්තියක් නැහැ වගේ බ්‍රිතාන්‍ය හා ඇමරිකාව එක් වී සෑදුණු අධිරාජ්‍යයටත් රෝම අධිරාජ්‍යයට තරම් බලයක් නැති බවයි.
8, 9. (අ) හත්වෙනි ලෝක අධිරාජ්‍යය යකඩ මෙන් ශක්තිමත් වුණේ කොහොමද? (ආ) පාදවල ඇති මැටිවලින් නියෝජනය වෙන්නේ මොනවාද?
8 ස්වාමීන්ගේ දවස තුළ බ්‍රිතාන්‍ය හා ඇමරිකානු අධිරාජ්‍යය යකඩ මෙන් ශක්තිමත්ව කටයුතු කළ අවස්ථාත් තිබෙනවා. පළවෙනි හා දෙවෙනි ලෝක මහා යුද්ධ ජය ගැනීමෙන් ඔවුන් තම බලය පෙන්වීම ඊට හොඳ උදාහරණයක්.c
9 නමුත් රූපයේ පාදවල යකඩ සමඟ මැටි මිශ්‍ර වී තිබෙනවා යන්නෙන් අදහස් කරන දේ හොඳින් වටහාගන්න යෙහෝවා දෙවිගේ සේවකයන් කාලයක් පුරා වෑයම් කර තිබෙනවා. දානියෙල් 2:41 පවසන්නේ තනි රාජ්‍යයක් මිස බොහෝ රාජ්‍යයන් නොවන බව පැහැදිලියි. ඒ වගේම දානියෙල් 2:43 පෙන්වන විදිහට මැටිවලින් නියෝජනය වෙන්නේ ‘සාමාන්‍ය ජනයායි.’ මෙයින් පැහැදිලි වෙන්නේ බ්‍රිතාන්‍යය හා ඇමරිකාව තුළම සිටින ජනයා සිදු කරන දේවලින් එම අධිරාජ්‍යයේ බලය දුර්වල වෙන බවයි. උදාහරණයකට සමහර ප්‍රජා අයිතිවාසිකම් වෙනුවෙන් සටන් කරන ව්‍යාපාරවල, වෘත්තීය සමිතිවල හා වෙනත් ස්වාධීන කණ්ඩායම්වල ක්‍රියාකාරකම් නිසා එම අධිරාජ්‍යය සතුව තිබූ බලය දුර්වල වී තිබෙනවා. එමෙන්ම එම අධිරාජ්‍යයේ සිටින ජනප්‍රිය නායකයන්ට පවා තම ප්‍රතිපත්ති පහසුවෙන් ක්‍රියාත්මක කිරීමට නොහැකි වී තිබෙනවා. ඊට හේතුව ඔවුන් මැතිවරණවලදී සුළු ඡන්ද ප්‍රමාණයකින් ජය ගැනීම සහ ප්‍රතිවිරුද්ධ මත දරන බොහෝදෙනෙක් ඔවුන්ට විරුද්ධව කටයුතු කිරීමයි. දානියෙල් පැවසුවේ “එම රාජ්‍යයේ සමහර කොටස් බිඳෙනසුලු වන අතර තවත් සමහර කොටස් ශක්තිමත්ව තිබෙයි” කියායි.—දානි. 2:42; 2 තිමෝ. 3:1-3.
10, 11. (අ) අවසානයේදී පාදවලට මොකක්ද සිද්ධ වෙන්නේ? පාදවල ඇඟිලි ගණනේ වැදගත්කමක් තිබෙනවාද?
10 අදටත් බ්‍රිතාන්‍යය හා ඇමරිකා එක්සත් ජනපදය අතර දේශපාලනික වශයෙන් විශේෂ බැඳීමක් තිබෙනවා. ඔවුන් ලෝකයටම බලපාන කාරණා සම්බන්ධයෙන් සහයෝගයෙන් වැඩ කරනවා. මෘගයා හා රූපය පිළිබඳ අනාවැකි දෙකෙන්ම පැහැදිලි වෙන්නේ බ්‍රිතාන්‍ය හා ඇමරිකානු අධිරාජ්‍යයෙන් පසු තවත් අධිරාජ්‍යයක් එන්නේ නැති බවයි. මෙම අධිරාජ්‍යය රෝමයට වඩා දුර්වල වුණත් එය නැති වී යන්නේ තමන් විහින්ම නෙවෙයි.
11 පාදවල ඇඟිලි ගණනේ වැදගත්කමක් තිබෙනවාද? නැහැ. දර්ශනවලදී දුටු සමහර මෘගයන්ගේ අං ගණන නිශ්චිතව සඳහන් කර තිබෙන්නේ එහි වැදගත්කමක් ඇති නිසයි. නමුත් අතිවිශාල මිනිස් රූපයේ පාදවල ඇඟිලි ගණන සඳහන් කර නැහැ. ඒ වෙනුවට එහි පවසන්නේ ඇඟිලිවල යකඩ හා මැටි කලවම්ව තිබුණා කියා පමණයි. ඉන්පසුව දානියෙල් පවසන දෙයින් පැහැදිලි වෙන්නේ දේවරාජ්‍යය මගින් මිනිස් ආණ්ඩු විනාශ කරද්දී බ්‍රිතාන්‍ය හා ඇමරිකානු ලෝක අධිරාජ්‍යය මේ පොළොව පාලනය කරමින් සිටින බවයි.—දානි. 2:45.
අං දෙකේ මෘගයා
12, 13. අං දෙකක් ඇති මෘගයාගෙන් නියෝජනය වෙන්නේ මොකක්ද? එය කරන්නේ මොකක්ද?
12 බ්‍රිතාන්‍ය හා ඇමරිකානු ලෝක අධිරාජ්‍යය යකඩ හා මැටිවල කලවමක් වුණත් එම අධිරාජ්‍යය අවසාන කාලයේදී ලෝකයට ප්‍රබල බලපෑමක් වන බව යේසුස් යොහන්ට දුන් තවත් දර්ශනයකින් පැහැදිලි වෙනවා. එම දර්ශනයේ මකරෙක් මෙන් කතා කළ අං දෙකක් ඇති මෘගයෙක් ගැන සඳහන් වෙනවා. උගෙන් නියෝජනය වෙන්නේ මොකක්ද? ඌට අං දෙකක් තිබීමෙන් අදහස් වෙන්නේ ආණ්ඩු දෙකක් හවුලේ පාලනය කරන බවයි. ඒ අනුව මේ මෘගයාගෙනුත් නියෝජනය වෙන්නේ බ්‍රිතාන්‍ය හා ඇමරිකානු ලෝක අධිරාජ්‍යයයි. මේ අධිරාජ්‍යය වෙනම මෘගයෙකු ලෙස යොහන් දකින්නේ උගෙන් යම් කාර්යයක් ඉටු වන නිසයි.—එළිදරව් 13:11-15 කියවන්න.
13 හිස් හතක් ඇති මෘගයාගේ රූපයක් සාදන ලෙස අං දෙකක් ඇති මෘගයා ජනයාට පවසනවා. මෙම රූපය ටික කාලෙකට පවතියි පසුව නැති වී යයි ආපහු මතු වෙයි කියා යොහන් පැවසුවා. එය ඉටු වුණේ කොහොමද? පළවෙනි ලෝක මහා යුද්ධයෙන් පසු එක්තරා සංවිධානයකට එකතු වෙන්න කියා ලෝකයේ ජාතීන්ගෙන් බ්‍රිතාන්‍ය හා ඇමරිකානු ලෝක අධිරාජ්‍යය ඉල්ලා සිටියා. එම සංවිධානය පිහිටෙව්වේ ලොවට සාමය ගෙන ඒමේ හා යම් ජාතීන්ට උපකාර අවශ්‍ය නම් එය ලබා දීමේ අරමුණෙන්.d එම සංවිධානය ජාතීන්ගේ සංගමයයි. දෙවෙනි ලෝක මහා යුද්ධයේ ආරම්භයත් එක්කම ජාතීන්ගේ සංගමය නැති වී ගියා. එම යුද්ධයෙන් පසු එම සංවිධානය ආපහු මතු වුණා. එවර මතු වුණේ එක්සත් ජාතීන්ගේ සංවිධානය ලෙසයි.—එළි. 17:8.
14. මෘගයාගේ රූපය අටවෙනි රජ ලෙස හඳුන්වන්නේ ඇයි?
14 යොහන් මෘගයාගේ එම රූපය විස්තර කරන්නේ අටවෙනි රජ හැටියටයි. නමුත් යොහන් කලින් දුටු මෘගයාට තිබුණේ හිස් හතක් විතරයි. එසේනම් යොහන් මෘගයාගේ රූපයට අටවෙනි රජ කියා පවසන්නේ ඇයි? මුළු ලෝකයටම බලපාන තීරණ ගන්න තරම් බලයක් මේ රූපයට තිබෙන නිසයි. එසේ කිරීම සඳහා මෘගයාගේ රූපයට බලය ලැබෙන්නේ එයට සම්බන්ධ සියලු රාජ්‍යයන්ගෙන් මෙන්ම විශේෂයෙන්ම බ්‍රිතාන්‍ය හා ඇමරිකානු ලෝක අධිරාජ්‍යයෙනුයි.—එළි. 17:10, 11.
මෘගයාගේ රූපය ගණිකාව විනාශ කරයි
15, 16. ගණිකාවගෙන් නියෝජනය වෙන්නේ මොකක්ද? මිනිසුන් දැන් ආගම සලකන්නේ මොන විදිහටද?
15 තද රතු පැහැති මෘගයාගේ රූපයට පණ ලැබුණු පසු ඒ පිට ඉඳගෙන සිටින ගණිකාවක්ව යොහන් දර්ශනයෙන් දකිනවා. ඇයව හඳුන්වන්නේ “මහ බැබිලෝනිය” යන නමින්. (එළි. 17:1-6) ලොව පුරා තිබෙන සියලුම අසත්‍ය ආගම් ඇගෙන් නියෝජනය වෙනවා. ක්‍රිස්තියානියයි කියාගන්නා නමුත් යෙහෝවා දෙවිට නමස්කාර නොකරන ආගම් එහි ප්‍රධාන තැනක් ගන්නවා. ගණිකාව එම මෘගයා පිට ගමන් කරනවා හා සමානව මේ සියලුම ආගම් එක්සත් ජාතීන්ගේ සංවිධානයට ප්‍රසිද්ධියේ සහයෝගය දක්වන අතර තමන් කැමති විදිහට එම සංවිධානය මෙහෙයවන්න උත්සාහ කර තිබෙනවා.
16 යොහන් තවත් දෙයක් දකිනවා. ඔහු දකින්නේ ස්වාමීන්ගේ දවසේ මහ බැබිලෝනිය ජල ධාරාවන් මත ඉඳගෙන සිටින ආකාරයයි. එම ජල ධාරාවන් ක්ෂණිකව සිඳී යන ආකාරයත් ඔහු දකිනවා. ඉන් අදහස් කරන්නේ විවිධ ආගම්වලට සහයෝගය දුන් මහජනයා එතරම් සහයෝගයක් දක්වන්නේ නැති බවයි. (එළි. 16:12; 17:15) උදාහරණයකට මෘගයාගේ රූපය මතු වූ කාලයේදී එනම් ස්වාමීන්ගේ දවස ආරම්භ වූ කාලයේදී මහජනයාව පාලනය කිරීමට ආගමට පුදුමාකාර බලයක් තිබුණා. නමුත් ක්‍රම ක්‍රමයෙන් මිනිසුන් තුළ ආගමට හා ආගමික නායකයන්ට තිබූ ගෞරවය හා සහයෝගය දැන් නැති වී තිබෙනවා. අද බොහෝදෙනෙක් සිතන්නේ යුද්ධ හා වෙනත් ගැටුම්වලට වගකිව යුත්තේ ආගම් කියායි. සියලු ආගම් නැති කර දැමිය යුතුයි කියා තදින් ප්‍රකාශ කරන අන්තවාදී කණ්ඩායම්ද සිටිනවා.
17. සියලුම අසත්‍ය ආගම්වලට ළඟදීම සිදු වෙන්නේ මොකක්ද? එය සිදු වෙන්නේ මොන හේතුවක් නිසාද?
17 දේශපාලනයට බලපෑම් කරන්න ආගම් දිගටම උත්සාහ කරයි. නමුත් ‘තමන් අරමුණු කරන දේ ඉටු කිරීමට රජුන්ගේ මනස් තුළට දෙවි යම් අදහසක් දමනවා.’ (එළිදරව් 17:16, 17 කියවන්න.) ආගම්වලට විරුද්ධව ප්‍රහාරයක් එල්ල කරන්න දෙවි ඉතාම ඉක්මනින් ලෝකයේ තිබෙන ආණ්ඩු පොලඹවයි. එවිට දේශපාලනයට බලපෑම් කරන්න ආගම්වලට තවදුරටත් හැකි වෙන්නේ නැහැ. ආගම්වලට තමන් සතු විශාල ධන සම්භාරය නැති වෙයි. මේ වගේ දෙයක් වෙයි කියා දැනට අවුරුදු 20කට 30කට කලින් කිසිම කෙනෙක් සිතුවේ නැහැ. නමුත් දැන් තත්වය හාත්පසින්ම වෙනස්. කොහොමවුණත් අසත්‍ය ආගම් නැති වී යන්නේ ක්‍රමානුකූලව නෙවෙයි. ඒවා විනාශ වෙන්නේ ක්ෂණිකවයි.—එළි. 18:7, 8, 15-19.
මෘගයන් විනාශ වෙයි
18. (අ) අවසානයේදී මෘගයා මොනවා කරන්න උත්සාහ කරයිද? එයින් සිදු වෙන්නේ මොකක්ද? (ආ) දානියෙල් 2:44ට අනුව දෙවි විනාශ කරන්නේ මොන රාජ්‍යයන්ද? (17වෙනි පිටුවේ කොටුව බලන්න.)
18 සියලු අසත්‍ය ආගම් විනාශ කළ පසුව දෙවිගේ රාජ්‍යයට විරුද්ධව ප්‍රහාරයක් එල්ල කරන්න සාතන් සියලුම දේශපාලන සංවිධාන පොලඹවයි. නමුත් දෙවිගේ රාජ්‍යය තිබෙන්නේ ස්වර්ගයේ නිසා ඔවුන් ඒ ප්‍රහාරය එල්ල කරන්නේ පොළොවේ සිටින දෙවිගේ සෙනඟටයි. එවිට යෙහෝවා දෙවි තම සෙනඟ වෙනුවෙන් මැදිහත් වෙයි. (එළි. 16:13-16; 17:12-14) මේ අවසාන සටනේදී සිදු වන දෙයක් ගැන දානියෙල් හෙළි කරනවා. (දානියෙල් 2:44 කියවන්න.) එළිදරව් 13:1 සඳහන් වෙන මෘගයාවත්, මෘගයාගේ රූපයත්, අං දෙකක් ඇති මෘගයාවත් විනාශ වෙයි.
19. අපිට විශ්වාසය තබන්න පුළුවන් මොකක් ගැනද? වහාම කළ යුත්තේ මොකක්ද?
19 අපි දැන් ජීවත් වෙන්නේ එළිදරව් පොතේ 13වන පරිච්ඡේදයේ සඳහන් මෘගයාගේ හත්වෙනි හිස පාලනය කරන කාලයෙයි. මෘගයා විනාශ වීමට පෙර තවත් හිසක් මතු වෙන්නේ නැහැ. අසත්‍ය ආගම් විනාශ වන අවස්ථාවේදී ලෝකය පාලනය කරමින් සිටින්නේ බ්‍රිතාන්‍ය හා ඇමරිකානු අධිරාජ්‍යයයි. යෙහෝවා දෙවි දානියෙල් හා යොහන් මාර්ගයෙන් පැවසූ අනාවැකි මේ වන තුරු අකුරටම ඉටු වී තිබෙනවා. ඉතාම ළඟදී අසත්‍ය ආගම් විනාශ වන බවත් හර්මගෙදොන් යුද්ධය පැමිණෙන බවත් අපිට විශ්වාසයි. හරියටම සිදු වන දේ ගැන යෙහෝවා දෙවි අපිට කල් ඇතුව දන්වා තිබෙනවා. නමුත් අනාවැකි මගින් දී තිබෙන අනතුරු ඇඟවීම්වලට අපි කීකරු වෙනවාද? (2 පේතෘ. 1:19) යෙහෝවා දෙවිගේ පැත්ත ගෙන දේවරාජ්‍යයට පූර්ණ සහයෝගය දෙමු. එය මොහොතකටවත් කල් නොදමමු.—එළි. 14:6, 7.
[පාදසටහන්වල]
a පොළොවේ තිබෙන හෝ සිදු වන දේ සම්බන්ධයෙන් පූර්ණකම පෙන්නුම් කිරීමට බයිබලයේ සඳහන් වෙන්නේ අංක දහයයි. ඒ අනුව අං දහයෙන් රෝම අධිරාජ්‍යයෙන් බිඳී ගිය සියලුම රාජ්‍යයන් නියෝජනය වෙනවා.
b බ්‍රිතාන්‍ය අධිරාජ්‍යය හා එක්සත් ජනපදය 18වෙනි සියවසේ සිට තනි තනිවම බලවත් රාජ්‍යයන්ව පැවතුණත් ‘ස්වාමීන්ගේ දවස’ ආරම්භ වන තුරු එය යොහන් සඳහන් කළ ලෝක අධිරාජ්‍යය ලෙස කටයුතු කළේ නැහැ. (එළි. 1:10) බ්‍රිතාන්‍යය හා එක්සත් ජනපදය හවුල් වී ලෝක අධිරාජ්‍යයක් ලෙස කටයුතු කරන්න පටන්ගත්තේ පළවෙනි ලෝක මහා යුද්ධය කාලයේදියි.
c මෙම රජු සිදු කරන දරුණු විනාශය ගැන දානියෙල් කලින්ම පැවසුවේ මෙහෙමයි. “ඔහු මහත් විනාශයක් සිදු කරනු ඇත.” (දානි. 8:24) උදාහරණයකට තම සතුරන්ව විනාශ කිරීමට එක්සත් ජනපදය ප්‍රබල න්‍යෂ්ටික බෝම්බ දෙකක් හෙළුවා. එමගින් අතිවිශාල හානියක් සිදු වුණා.
[17වන පිටුවේ කොටුව]
“සියලු රාජ්‍යවල්” කීමෙන් අදහස් කරන්නේ මොනවාද?
දානියෙල් 2:44 සඳහන් අනාවැකියේ පවසන්නේ ‘දෙවිගේ රාජ්‍යය ඒ සියලු රාජ්‍යවල් පොඩි කර නැති කර දමයි’ කියායි. ඉන් අදහස් කරන්නේ අතිවිශාල රූපයේ සඳහන් රාජ්‍යයන් ගැන විතරයි.
පොළොවේ තිබෙන අනික් රාජ්‍යයන් ගැන දානියෙල් සඳහන් කරන්නේ නැහැ. නමුත් එළිදරව් පොතේ තිබෙන අනාවැකියේ පවසන්නේ ‘සියලු බලැති දෙවිගේ මහත් දවසේදී සිදු වන යුද්ධය සඳහා මුළු ලොව පුරාම සිටින රජුන්’ එකතු වන බවයි. (එළි. 16:14; 19:19-21) ඉන් පැහැදිලි වෙන්නේ අතිවිශාල රූපයෙන් නියෝජනය වන රාජ්‍යයන්ට අමතරව සියලු මිනිස් පාලනයන් එදාට නැති වන බවයි.