Maatewoosi Wongeella
8 Ilaalu aaninni dirrihu gedensaanni, lowo manni hoodesi haꞌri. 2 Hatte yannara mittu dhiigu dhibbi amadinosi manchi isiwa daye guluphe* “Mooticha, hasiꞌrittoro hursattoera* dandaattowe” yii. 3 Yesuusino angasi diriirse mancho amammade, “Hasiꞌreemmona huri!”* yiisi. Manchuno bayichonkonni dhiigu dhibbisinni huri.* 4 Hakkiinni Yesuusi togo yii: “Tenne mittohono kulattokki gede qorophi; kayinni hadhe ateneeto kakkalaanchoho leellishi; kakkalaano huroottota affanno gede Muse hajajino kakkalono shiqishi.”
5 Yesuusi Qifirinaahoomi katama iillita mittu olantote hajajaanchi isiwa shiqe 6 togo yee huucciꞌri: “Mooticha, soqqamaanchiꞌya laanshaawe mine goxe no; qoleno isi lowo geeshsha shete no.” 7 Yesuusino “Daye hurseemmosina” yiisi. 8 Olantote hajajaanchino togo yii: “Mooticha, ani ati miniꞌyara eatto gedee mancho diꞌꞌikkoommo; ikkollana koye heedhe mitto qaale coyiꞌrittoro soqqamaanchiꞌya huranno. 9 Aneno aleenni higge hajajjannori nooe; anerano hajajeemmo olanto nooe; mitto ‘Haꞌri!’ yuummoro haꞌranno; wole ‘Amo!’ yuummoro daanno; borojjichoꞌyano ‘Konne assi!’ yuummoro assanno.” 10 Yesuusi tenne macciishshe dhagge assiꞌre hoodesi hadhanni noore togo yii: “Halaale kuleemmoꞌnena, Israeelete manni giddo togooti lowo ammana noosiha mitto manchono diafoommo. 11 Ikkollana lowo manni soojjaatinna galchiminni daye, gordu Gashshootira Abirihaami, Yisaaqinna Yaaqoobi ledo sagale itara ofollannota kuleemmoꞌne. 12 Gordu Gashshooti ooso kayinni gobba tunsichoho fushshine tunganni; insano hakkiicho wiꞌlitanno; hattono hinko gaꞌmidhanno.” 13 Hakkiinni Yesuusi olantote hajajaancho, “Ammanakki gede ikkohena haꞌri” yiisi. Soqqamaanchuno hakko lipheessi giddo huri.
14 Yesuusi Pheexiroosi minira mari woyite, Pheexiroosi ballo biso iibbabbite goxxe noota lai. 15 Hakko daafira, Yesuusi angase amadita iibbabbo higgeennase kaꞌe soqqantusi. 16 Hawarrita mannu agaaninte amaddinoha lowo manna isiwa abbi; isino busha ayyaanna mitto qaale calla coyiꞌre fushshi; dhibbu waadannonsare baalano hursi. 17 Kuni ikkinohu Maganu masaalaanchu Isayyaasi widoonni “Isi xissonke adhi, dhibbankeno duqqi” yee coyiꞌrinori woꞌmanno gedeeti.
18 Yesuusi lowo manni doyisse noosita lae, rosaanosi baara widoonni fultanno gede hajaji. 19 Hakkiinni mittu borreessaanchi daye, “Rosiisaancho, haꞌrattowa baala hoodekki haꞌreemmo” yiisi. 20 Yesuusi kayinni togo yiisi: “Yeedaalate bale noonsa; iimi cearano minu noonsa; manchi Beettira kayinni umo worannowi nafa dinosi.” 21 Hakkiinni rosaanosi giddonni mittu “Mooticha, balaxe haꞌre annaꞌya madaadheemmona fajjie” yiisi. 22 Yesuusino, “Reyitinore reyitinori madaadhitona, ati ane hoode amo”* yiisi.
23 Hakkiinni Yesuusi haꞌrara yowolo giddita rosaanosino gidditu. 24 Baaru aana hadhanni heedheenna lowo hambabalatte kaꞌu; dambaluno yowolo egemmara rahi; Yesuusi kayinni hatte yannara goxe no. 25 Hakkiinni isiwa marte goxinoha kayisse, “Mooticha, goonfummona gatisinke!” yitu. 26 Yesuusi kayinni, “Kiꞌne ammana xeꞌinoꞌneri, togo mayira waajjitinanni?”* yiinsa. Hakkiinni isi kae bubbenna baara ufi; bubbenna baaruno sammi yii. 27 Mannuno dhagge assiꞌre togo yii: “Bubbenna baaru nafa hajajamannosihu kuni isi hiittoo manchooti?”
28 Yesuusi baara tayise fule Gedaarenoosi* yinanni qoqqowo dayita, agaaninte amaddinori lamu manchi waammate* mereerinni fulte Yesuusinni xaaddu. Insa lowo geeshsha qarrissannore ikkitino daafira mittu manchino hakkaanni hige disaꞌꞌanno. 29 Insano “Maganu Beetto, ninkera ate ledo mayi noonke? Yanna iillitukkinni shetisattonkera dayootto?” yitanni raartu. 30 Insawiinni shiimare xeertidhe manchaamete hoshsha hayisso ittanni no. 31 Agaaninteno, “Fushshattonkeha ikkiro, marre manchaamete hoshsha giddora eꞌneemmo gede fajjinke” yite huuccidhusi. 32 Yesuusino “Hadhe!” yiinsa. Insano fulte manchaamenniwa hadhu; manchaamete hoshsha baalantino boonu gaminni bitintirtanni dirrite baaru giddo eꞌe gooffu. 33 Allaalaasine kayinni xooqqe katama hadhe, agaaninte amaddino manni aana ikkinorenna wole baalankare mannaho odeessitu. 34 Hakkiinni katamu manni baalu Yesuusinni xaadara fuli; mannuno iso afiti qooxeessinsanni agure haꞌranno gede huucciꞌri.