Mwanda wa 80
Mwilo w’Efile Mukulu ubakatuka mu Babilone
BIPWA bibidi bibapu kukila kasha bapwa kukwata Babilone ku bupika kwi beena Medayi na beena Perse. Banda kutala akikyebe kukitshika binobino! Beena Isaleele bakwete kutuuka mu Babilone. Mushindo kinyi ubabatuuku mu bupika? Nanyi ebapoosola?
Siruse nfumu a beena Perse ndjo baadi mwibatuushe. Kumpala kwashi Siruse atandjikye, Yehowa baadi mulungule mutemuki Yeeshaya bwashi afunde bino shi: ‘Okyebe kukita kyooso kya nkyebe shi okite. Abakukangwila biibi bwashi okwate lupata.’ Siruse baadi mukunkushe basalayi bwa kukwata Babilone. Beena Mediya na beena Perse abatwelele bufuku mu lupata, biibi bibaadi bashaale bishitule.
Kadi Yeeshaya mutemuki a Yehowa baadi mwakule dingi shi Siruse akyebe kutuma eyi bwashi bayibakuule Yeelusaleme na ntempelo. Siruse batumine dino eyi su? Oolo. Siruse balungwile beena Isaleele shi: ‘Endayi binobino ku Yeelusaleme mu kwibaka ntempelo a Yehowa, Efile Mukulu enu.’ Bino ndjo bikwete kwenda beena Isaleele mu kukita.
Anka ta mbeena Isaleele booso be mu Babilone be na mushindo wa kukita lwendo lula lwa kwaluka mu Yeelusaleme nya. Ndwendo lukile bula lwa pepi na bilometre 800 na bebungi mbapwe kununupa na bakwete kukumba tabeena mushindo wa kwenda kwibula. Kwi ingi myanda ibaadi ikutshishe bangi bantu bwa kwenda. Anka Siruse balungula bano basha bende shi: ‘Kwashayi bantu bakwete kwaluka mu kwibakuula Yeelusaleme na ntempelo na byamo by’ebakanyi, oòlò na ingi milambo.’
Byaya, abapeele beena Isaleele abaadi abende ku Yeelusaleme bintu bibungi. Siruse bebapeele dingi malonga na makopo abaadi Nfumu Nabukodonosore mwate mu ntempelo a Yehowa pababutwile Yeelusaleme. Bantu be na bintu bibungi bya kutwala.
Kunyima kwa lwendo lwa myeshi inanka, beena Isaleele abalukiila mususa umune ku Yeelusaleme. Kasha babutula Yeelusaleme takudi bipwa 70 na babaadi balekye lupata kushi muntu su ngumune. Kadi sunga beena Isaleele babapu kwaluka mwiumbo dyabo, abakyebe kupeta ingi nkalakasho, bu byatukyebe kwibimona.
Yeeshaya 44:28; 45:1-4; Esdrase 1:1-11.