Mu dya lubingo 8, Mweshi wa 9
Osangule muuwa bwa’shi oshaale na muuwa, obe na beekulu boobe. —Miy. 30:19.
Bwa kukwasha bana bobe bwa’shi bekale na lukumino, kwibalungula kibuwa na kibubi ta nkupwa kwa mwanda nya. Abitungu webakwashe dingi bwabadya kwikala abanangushena ku nkonko bu ino: ‘Bwakinyi Bible mmukandjikye bintu abimweneka bu abisangasha bantu? Ne kwikala mushinkamishe’shi miya ya mu Bible i buwa kwandji mu myanda yooso naminyi?’ (Yesh. 48:17, 18) Su mwan’obe akumina kubatshishibwa, mukwashe dingi bwadya kunangushena ngofu pa mashito aapete su babatshishibwa. Apusha naminyi pabitale ano mashito? Mmyabi kinyi yadi mulombene kupeta? Nkalakashi kinyi yadi mulombene kufumankana nayo? Bwakinyi myabi yadi mulombene kupeta ibungi kukila nkalakashi? (Mak. 10:29, 30) Bi na muulo ukata kunangushena ku ino myanda kalolo kumpala kwa kubatshishibwa. Nsaa yokwasha mwan’obe bwadya kwikala anangushena pa ino myanda ngofu, akanyisha kukumina’shi kutumikila miya ya mu Bible akwikala akumupetesha myanda ibuwa nsaa yoso. w17.12 21 ¶14-15
Mu dimune 9, Mweshi wa 9
Ayitanyina kintu kyoso mwishina dyakyo.—Yesh. 40:26.
Bebungi ba kwanudi’nwe bakwetu balume na bakashi bakwete kukyenga na mikumbo ibukopo. Bangi bapwe kukula bakwete kulama bakwabo bapwe kununupa. Bangi namu abetatshisha bwa kulombasha nkalo ya ba mu bifuko byabo. Atuuku dingi’shi bebungi ba kwanudi bakwete kukimba bya kukambila ino myanda ibungi pamune kushi penda kukimba bya kukambila mwanda umune. Su apasukilaa nyenyeenyi bintu bishi na muwa mu mushindo wi pa bwao, pwandikisha byakwete kupusha pa mwanda oobe! Okwete kumufubila, kushi pa mwanda wa’shi abakukitshisha pa bukopo, kadi pa mwanda wa’shi we mumufule. (Mis. 19:1, 3, 14) Nshetu sha kifulo auku myanda yoso yodi nayo. Bible akula’shi: abadika ‘mpa na nyene yobe.’ (Mat. 10:30) Yehowa akumina tuukye’shi: “Asapilâ baba bashi na matope.” (Mis. 37:18, EEM) Abimweneka kalolo’shi, Yehowa kwete kumona myanda yoso yodi nayo, na mulombene nkupa bukome bodi nabo lukalo bwa kwiyinyingiila umune ku umune. w18.01 7 ¶1; 8 ¶4
Mu dya kabidi 10, Mweshi wa 9
Tabita, buuka!—Bik. 9:40.
Uno mwanda wa Tabita ababadi basangule kwi Mpyeele ubadi upe bantu kishinkamisho kikata, ngi bwakinyi bebungi ba mu kino kibundji ‘abakuminyine mwi Mwanana.’ Bano balongi bapya abadi na mushindo wa kulungula bangi mukandu wibuwa pabitale Yesu na dingi abadi abalungula bantu boso bi ngobesha ya Yehowa ya kubuusha bantu bafwe. (Bik. 9:36-42) Bantu bebungi babadi bamone pabadi pakitshikye lungi lusangukilo. Dingi efuku, Mpoolo mutumibwa badi mu kisangilo mu kadimbo ka kwiyilu ku Trowase, lelo uno, dino eumbo di dya ku lupese lwa kupona nguba kw’eumbo dya Turquie. Mpoolo badi esamba mpa na munkatshi mwa bufuku. Ungi nsongwalume ababadi abetanyina bu Etishe badi mushale p’edidishi amuteemeshanga, baladile tulo aye nkupona kukatuka ku etage a kasatu na paashi. Pangi Luka ngi muntu a kumpala bafikile pa mbalo pabadi papone Etishe. Bu bibadi munganga, bamwene’shi uno nsongwalume ta mutapikye na kushimisha penda binangu nya. Badi mufwe! Mpoolo pabayikile paashi, bakwatshile Etishe kiipa na dingi badi mukemeshe bantu boso, p’aye kwamba’shi: “Ee na muuwa.” Kino kilengyeleshi kibadi kikemeshe bantu boso abadi bamone uno mwanda. Bu bibabadi abauku’shi uno nsongwalume ekalanga mufwe na’shi abamusangula, bino “bibaadi bikankamikye bantu.”—Bik. 20:7-12. w17.12 5 ¶10-11