Esekièl
31 Na a fosi dei fu a di fu dri mun na ini a di fu 11 yari, Yehovah taki baka nanga mi. A taigi mi: 2 „Manpkin fu libisma, taigi Farao, a kownu fu Egepte, èn a pipel fu en:
’Suma abi makti leki yu?
3 Yu ben de leki wan Asiriasma, iya, leki wan sedrebon fu Libanon.
A sedrebon ben hei, a ben abi moi taki nanga furu w’wiri èn a ben gi furu skaduw.
Na ede fu en ben e doro te na den wolku.
4 Fu di a ben kisi watra meki a gro kon bigi. Na fu di a ben kisi furu watra meki a gro so hei.
Liba ben de na ala sei pe a ben de.
Den kriki fu den liba ben gi watra na ala den bon na ini den gron.
5 Dati meki a gro moro hei leki ala den tra bon na ini a gron.
Den bigi taki fu en ben e kon moro furu èn den ben e kon moro langa,
fu di a ben e kisi furu watra fu den liba.
6 Ala den fowru di e frei na loktu ben meki den nesi na den bigi taki fu a bon.
Ala den busmeti ben meki den pkin na ondro den taki fu en.
Ala den bigi pipel ben go tan na ini a skaduw fu en.
7 A ben tron wan moi bigi bon di ben abi langa taki nanga furu w’wiri.
Den rutu fu en ben doro na presi pe furu watra de.
8 Nowan tra sedrebon na ini a dyari fu Gado ben gersi en.
Nowan fu den yaneifer-bon ben abi taki leki en.
Nowan fu den taki fu den plataan-bon* ben de leki den bigi taki fu en.
Nowan tra bon na ini a dyari fu Gado ben moi leki en.
9 Mi meki a kon moi èn mi meki a kisi furu w’wiri.
Ala den tra bon na ini Eden, a dyari fu a tru Gado, ben dyarusu na en tapu.’
10 Dati meki a Moro Hei Masra Yehovah taki: ’A* ben kon hei èn na ede fu en ben doro te na den wolku. Dati meki a kisi heimemre fu di a ben hei. 11 Fu dati ede mi o meki a makti tiriman fu den kondre teki en abra. A tiriman o du ogri nanga en seiker. Mi srefi o drai baka gi en fu den ogri di a du. 12 Wan pipel di unu no sabi, iya, den moro ogr’ati sma di de, o koti en trowe. Dan den o libi en na tapu den bergi. Ala den w’wiri fu en o fadon na den lagipresi èn den broko taki fu en o fadon na ini den liba fu a kondre. Ala sma o kmoto na ini a skaduw fu en èn den o gwe libi en. 13 Ala den fowru di e frei na loktu o tan na tapu a bon disi di fadon. Ala den busmeti o tan na tapu den taki fu en. 14 Noiti moro den bon di de krosbei fu a watra o gro kon hei èn den ede fu den bon no o doro den wolku. Nowan fu den bon di e kisi watra o hei leki den wolku, bika den alamala o dede èn den o saka go na ondro gron. Makandra nanga den manpkin fu libisma den o saka go na ini grebi-olo.’
15 Disi na san a Moro Hei Masra Yehovah taki: ’Te a o saka go na ini Grebi,* mi o meki sma row. Dati meki mi o tapu den watra-olo, dan watra no o lon moro èn den liba no o kisi watra moro. Na fu en ede mi o meki soso sari de na Libanon. Na fu en ede mi o meki den bon na den gron kon drei. 16 Te a o fadon nanga wan bigi b’bari, dan mi o meki den pipel beifi. Mi o tyari en go na ini Grebi* makandra nanga den sma di o go na ini grebi-olo. Ala den bon fu Eden, den moro bun bon fu Libanon èn ala den bon di ben e kisi watra, o kisi trowstu na ondrogron. 17 Makandra nanga a bon, densrefi go na ini Grebi* pe den sma de di trawan kiri nanga fet’owru. En nanga den bakaman* fu en di ben e libi na ini a skaduw fu en èn di ben de na mindri den pipel, de na ini Grebi tu.’
18 ’Na ini Eden nowan bon ben abi a glori fu yu èn nowan bon ben bigi leki yu. Ma now sma o koti yu trowe makandra nanga den bon fu Eden èn yu o go na ondro gron. Yu o d’don na den sma di no besnèi èn na den wan di sma kiri nanga fet’owru. Disi na san o psa nanga Farao, a kownu fu Egepte, èn a pipel fu en’, na so a Moro Hei Masra Yehovah taki.”