A de krin taki a psalm skrifiman e taki fu wan sma di e ferteri lei fu pori a nen fu trawan. A sani di a e du na wan hati sani. Psalm 15:3 e memre wi tu taki sma di de na ini a tenti fu Yehovah no e du nowan ogri nanga trawan èn den no e pori a nen fu den mati fu den (Ps. 15:1). Fa wi ben kan pori a nen fu den mati fu wi? Kande wi e ferteri trawan wan sani fu den, aladi wi no sabi seiker efu a sani dati tru. Fu eksempre: (1) wan sisa e tapu nanga a furuten diniwroko, (2) wan trowpaar no e dini moro na Betel, noso (3) wan brada no e dini moro leki owruman noso leki dinari ini a diniwroko. Kande yu e denki taki den brada nanga sisa disi lasi den grani fu den fu di den du wan sani di no bun. A ben o fiti fu ferteri trawan a sani dati? Kwetkweti! Kande furu tra reide de fu san ede a situwâsi fu den kenki èn wi no sabi dati. Wan sma di de na ini Yehovah en tenti ’no e taki ogri-ati lei nanga en mofo, a no e du nowan ogri nanga en kompe èn a no e taki takru sani fu en mati’. w24.06 11 ¶11-13

Efu wi wani abi moro lespeki gi Yehovah, dan ibri leisi te wi musu teki wan besroiti, wi musu prakseri san a feni bun. Te yu e leisi den Bijbel tori, dan aksi yusrefi: ’Efu mi ben de na ini a situwâsi dati, dan sortu besroiti mi ben o teki?’ Fu eksempre, prakseri taki yu ben de drape e arki fa den tin edeman fu den Israelsma ben e taki dati den Israelsma no o man wini den Kanansma. Den tin edeman ben taki disi baka di den ben go luku a kondre di Yehovah ben pramisi den Israelsma. Yu ben o bribi den èn yu ben o frede? Noso a lobi di yu abi gi Yehovah ben o tranga moro a frede di yu e frede libisma? Wan bigi grupu Israelsma no ben bribi Yosua nanga Kaleb di ben taki san tru. Dati meki den lasi na okasi fu go na ini a Pramisi Kondre.​—Num. 14:10, 22, 23. w24.07 10 ¶7

Gomer, a wefi fu a profeiti Hosea gwe libi Hosea gi tra man. Yu denki taki a no ben o man kenki? Yehovah di sabi san de na ini wan sma ati, taigi Hosea: „Go baka na yu wefi, aladi a abi wan freiri. Yu musu lobi en, awinsi a e du sutadu. Bika na so Yehovah lobi den Israelsma, aladi den e dini tra gado” (Hos. 3:1; Odo 16:2). Hori na prakseri taki Hosea en wefi ben e du hurudu ete. Ma Yehovah taigi Hosea fu gi en pardon èn fu teki en baka leki en wefi. Yehovah gebroiki na eksempre disi fu sori a pipel fu en taki a no ben drai baka gi den. Aladi den ben e du seryusu sondu, tòg a ben lobi den ete. A tan seni en profeiti fu go yepi den fu sori berow èn fu tyari kenki kon na ini den libi. Na eksempre disi e leri wi taki a Gado di „e ondrosuku sma ati”, o pruberi fu yepi wan sma di e du seryusu sondu ete fu sori berow. w24.08 10 ¶7