Esekièl

20 Na a di fu tin dei fu a di fu feifi mun na ini a di fu seibi yari, wan tu fesiman fu Israel kon sdon na mi fesi fu suku rai na Yehovah. 2 Dan Yehovah taigi mi: 3 „Manpkin fu libisma, taki nanga den fesiman fu Israel. Taigi den: ’Disi na san a Moro Hei Masra Yehovah taki: „Na rai unu kon aksi mi? ’Neleki fa a de seiker taki mi de na libi, na so a de seiker taki mi no o piki unu’, na so a Moro Hei Masra Yehovah taki.”’

4 Yu de srekasreka fu krutu den? Manpkin fu libisma, yu de srekasreka fu krutu den? Taigi den sortu groskin sani den afo fu den du. 5 Yu musu taigi den: ’Disi na san a Moro Hei Masra Yehovah taki: „Di mi teki Israel leki a pipel fu mi, mi meki wan sweri* nanga den pkin fu Yakob èn mi meki den kon sabi suma na mi na ini a kondre Egepte. Mi sweri gi den èn mi taki: ’Mi na Yehovah un Gado.’ 6 A dei dati mi sweri gi den taki mi o puru den na ini a kondre Egepte fu tyari den go na wan kondre di misrefi ben suku* gi den, wan kondre di lai merki nanga oni. A kondre disi ben moi moro ala tra kondre. 7 Ne mi taigi den: ’Ibriwan fu unu musu trowe ala den groskin sani di unu e dini. No doti unsrefi nanga den fisti gado* fu Egepte. Mi na Yehovah un Gado.’

8 Ma den opo densrefi teige mi èn den no ben wani arki mi. Den no trowe den groskin sani di den ben e anbegi èn den no tapu fu anbegi den fisti gado fu Egepte. Dati meki mi taigi den taki mi o puru atibron na den tapu na ini a kondre Egepte, teleki mi ati kon kowru. 9 Ma mi du wan sani fu no kisi pornen na den kondre di ben de na den lontu. Di mi puru den Israelsma na ini a kondre Egepte, mi ben meki den kon sabi mi. Den pipel na den lontu ben si dati. 10 Na so mi puru den na ini a kondre Egepte èn mi tyari den go na ini a sabana.

11 Dan mi gi den mi wet èn mi sori den san mi besroiti, so taki iniwan sma di e du san mi taki, kan tan na libi. 12 Mi gi den den Sabat fu mi tu fu memre den na a ferbontu di mi meki nanga den, so taki den kan sabi taki mi na Yehovah èn taki na mi meki den kon santa.

13 Ma den Israelsma opo densrefi teige mi na ini a sabana. Den no hori den wet fu mi èn den no du san mi taki. Iniwan sma di ben o tan hori ensrefi na den sani disi ben o tan na libi. Ma den no ben sori nowan lespeki gi den Sabat fu mi. Dati meki mi taigi den taki mi ben o puru atibron na den tapu èn mi ben o kiri den na ini a sabana. 14 Fu di mi prakseri a nen fu mi, meki mi hori misrefi, so taki mi no kisi pornen na den pipel di si fa mi tyari den Israelsma gwe. 15 Na ini a sabana mi sweri gi den taki mi no ben o tyari den go na ini a kondre di mi gi den, wan kondre di lai merki nanga oni. A kondre disi ben moi moro ala tra kondre. 16 Mi du disi, fu di den no du san mi taki èn den no hori den wet fu mi. Den no ben sori lespeki gi den Sabat fu mi. Den ben du den sani disi, fu di den ben wani dini den fisti gado fu den.

17 Ma mi* ben sari den, dati meki mi no figi den puru. Mi no kiri den alamala na ini a sabana. 18 Mi taigi den pkin fu den na ini a sabana: ’No hori unsrefi na den wet fu den afo fu unu èn no du den sani di den taigi unu fu du. No doti unsrefi nanga den fisti gado fu den. 19 Mi na Yehovah un Gado. Hori den wet fu mi èn du san mi taki. 20 Un musu si den Sabat fu mi leki santa sani. Den musu memre unu na a ferbontu di mi meki nanga unu, so taki unu no fergiti taki mi na Yehovah un Gado.’

21 Ma den Israelsma opo densrefi teige mi. Den no hori den wet fu mi èn den no du san mi taki. Iniwan sma di ben tan hori ensrefi na den sani disi ben o tan na libi. Ma den no sori nowan lespeki gi den Sabat fu mi. Dati meki mi taigi den taki mi ben o puru atibron na den tapu èn mi ben o kiri den na ini a sabana. 22 Ma mi no du noti nanga den. Fu di mi prakseri a nen fu mi, meki mi hori misrefi, so taki mi no kisi pornen na den pipel di si fa mi tyari den Israelsma gwe. 23 Boiti dati, mi sweri gi den na ini a sabana taki mi o panya den go na mindri den tra pipel èn taki mi o yagi den go na ala den tra kondre. 24 Mi o du dati, fu di den no du san mi taki èn fu di den no hori den wet fu mi. Den no si den Sabat fu mi leki santa sani èn den go anbegi* den fisti gado fu den afo fu den. 25 Mi libi den tu meki den hori wet di no bun èn di no ben o meki den tan na libi. 26 Mi meki den doti densrefi nanga den ofrandi fu den. Mi libi den meki den bron ibri fosi pkin fu den leki ofrandi gi den gado fu den. Mi no ben luku den moro nanga wan ai, so taki den ben kan sabi taki mi na Yehovah.”’

27 Manpkin fu libisma, na fu dati ede yu musu taki nanga den Israelsma. Taigi den: ’Disi na san a Moro Hei Masra Yehovah taki: „Na a srefi fasi den afo fu unu ben drai baka gi mi. A ben de leki na kosi den kosi mi. 28 Mi tyari den go na ini a kondre di mi sweri fu gi den. Te den ben si wan hei bergi èn te den ben si wan bon di abi furu w’wiri, dan na leti drape den ben e bigin tyari ofrandi fu meki mi mandi, na leti drape den ben e tyari ofrandi leki wan switi smeri èn na leti drape den ben e tyari den dringi-ofrandi fu den. 29 Dati meki mi aksi den: ’Fu san ede unu e go na a hei presi disi? (Den e kari en Hei Presi te now ete.)’”’

30 Now yu musu taigi den Israelsma: ’Disi na san a Moro Hei Masra Yehovah taki: „Unu e doti unsrefi neleki fa un afo ben doti densrefi. Unu gwe libi mi fu go huru* nanga den srefi fisti gado di den ben teki fu go huru. 31 Te now ete unu e bron den manpkin fu unu leki ofrandi gi den fisti gado fu unu. A no doti unu e doti unsrefi na a fasi disi? Un Israelsma, unu denki taki mi o piki unu te unu e suku rai na mi?”’

’Neleki fa a de seiker taki mi de na libi, na so a de seiker taki mi no o piki unu’, na so a Moro Hei Masra Yehovah taki. 32 ’Unu taki: „Meki wi kon de leki den pipel, iya, leki den sma fu tra kondre di e anbegi* udu nanga ston.” Ma a sani disi di unu e prakseri no o psa kwetkweti.’”

33 „A Moro Hei Masra Yehovah taki: ’Neleki fa a de seiker taki mi de na libi, na so a de seiker taki mi o tiri unu leki kownu nanga mi tranga anu èn nanga mi krakti. Mi o puru atibron na un tapu. 34 Nanga mi tranga anu èn nanga mi krakti mi o puru unu na mindri den tra pipel èn na den kondre pe mi ben panya unu go. Mi o du dati nanga bigi atibron. 35 Mi o tyari unu go na a sabana fu den tra pipel èn drape mi o kari unu kon na fesi krutu.

36 Neleki fa mi kari den afo fu unu kon na fesi krutu na ini a sabana fu Egepte, na so mi o kari unu kon na fesi krutu’, na so a Moro Hei Masra Yehovah taki. 37 ’Neleki skapu mi o meki unu psa na ondro a skapuman-tiki fu mi èn mi o meki wan ferbontu nanga unu. 38 Ma mi o puru den sma na un mindri di e opo densrefi teige mi èn di e sondu teige mi. Mi o puru den na ini den tra kondre pe den ben go tan, ma den no o drai kon baka na a kondre Israel. Unu sa musu fu sabi taki mi na Yehovah.’

39 Un Israelsma, disi na san a Moro Hei Masra Yehovah taki: ’Ibriwan fu unu kan go dini den fisti gado fu en. Ma hori a sani disi na prakseri: Efu unu no bigin arki mi, dan a ten o kon pe mi o gwe libi unu. Dan unu no o pori mi santa nen moro nanga den ofrandi èn nanga den fisti gado fu unu.’

40 A Moro Hei Masra Yehovah taki: ’Ala den Israelsma o anbegi mi na ini a kondre, na tapu mi santa bergi, wan hei bergi fu Israel. Na drape mi o prisiri nanga den èn na drape mi o meki den tyari bijdrage gi mi èn mi o meki den kon nanga den moro bunwan fu ala den santa sani di den e tyari leki ofrandi. 41 A switi smeri fu den ofrandi fu unu o meki mi prisiri. Na a ten dati mi o puru unu na mindri den tra pipel èn na ala den kondre pe unu ben panya go. Mi o sori unu taki mi na wan santa Gado èn den tra pipel o si disi tu.’

42 ’Unu o sabi taki mi na Yehovah te mi tyari unu go na a kondre Israel, a kondre di mi sweri fu gi den afo fu unu. 43 Dan unu o memre a fasi fa unu ben tyari unsrefi nanga den sani di unu ben du. Den sani dati meki taki unu no ben krin moro. Unu o syen fu ala den ogri di unu du. 44 Un Israelsma, unu o sabi taki mi na Yehovah te mi sori unu sar’ati. Mi o du disi fu gi mi nen glori. Efu mi ben luku den ogri fu unu nanga a takru fasi fa unu e tyari unsrefi, dan mi no ben o du dati’, na so a Moro Hei Masra Yehovah taki.”

45 Dan Yehovah taki baka nanga mi. A taigi mi: 46 „Manpkin fu libisma, luku go na zuidsei. Taki go na a sei fu a busi di de na zuidsei èn taigi en san o psa nanga en. 47 Taigi a busi di de na zuidsei: ’Yere san Yehovah taki. Disi na san a Moro Hei Masra Yehovah taki: „Mi o sutu faya gi yu. A faya o bron ibri grun bon èn ibri drei bon fu yu. A no o dede èn a o bron ala sma fu zuidsei te go miti noordsei. 48 Ala libisma o si taki na mi, Yehovah, sutu faya gi yu. Dati meki a faya no o dede.”’”

49 Ne mi taki: „Tye, mi Moro Hei Masra Yehovah! Den e taki fu mi: ’A e taki soso fu sani di muilek fu ferstan.’”