Esekièl

46 „Disi na san a Moro Hei Masra Yehovah taki: ’Na den siksi wrokodei, a portu fu a pkin tempel-dyari di e sori go na owstusei no musu opo. Ma na Sabat-dei èn na a dei fu a Nyunmun-fesa a portu musu opo. 2 Te na edeman kmoto na dorosei, a musu waka na a kamra fu a portu fu kon na insei. Dan a musu go tnapu na a doropostu fu a portu. Den priester o bron a bron-ofrandi nanga a freide-ofrandi fu na edeman èn a o saka kindi boigi na a mofodoro fu a portu. Baka dati a musu go na dorosei. Ma a portu no musu tapu solanga neti no doro. 3 Ibri Sabat èn ibri nyun mun, a pipel musu saka kindi boigi na fesi Yehovah tu na a mofodoro fu a portu dati.

4 A bron-ofrandi di na edeman musu tyari kon gi Yehovah na Sabat-dei musu de siksi yongu manskapu nanga wán bigi manskapu. Den meti no musu abi nowan mankeri noso siki. 5 Te a e tyari a manskapu kon, dan a musu gi 13 kilo* blon leki n’nyan-ofrandi tu. Te a e tyari den yongu manskapu kon, dan a kan gi san a abi leki n’nyan-ofrandi. Gi ibri 13 kilo blon, a musu gi dri nanga afu liter* oli. 6 Na a dei fu a nyun mun a musu teki wan yongu mankaw na mindri den tra mankaw èn siksi yongu manskapu nanga wán bigi manskapu. Nowan fu den meti disi musu mankeri wan sani. 7 Te a e tyari a yongu mankaw nanga a manskapu kon, dan a musu gi 13 kilo* blon leki n’nyan-ofrandi gi ibriwan fu den. Te a e tyari den yongu manskapu kon, dan a kan gi san a abi leki n’nyan-ofrandi. Gi ibri 13 kilo blon, a musu gi dri nanga afu liter* oli.

8 Te na edeman e kon na insei, dan a musu waka na a kamra fu a portu èn na drape a musu waka tu te a e go na dorosei baka. 9 Te a pipel e kon na fesi Yehovah na den alayari fesa fu dini en, dan den sma di waka kon insei na a portu na noordsei musu waka go na dorosei na a portu na zuidsei. Efu wan sma kon na insei na a portu na zuidsei, dan a musu waka go na dorosei na a portu na noordsei. Nowan sma musu waka go na dorosei na a srefi portu pe a ben waka kon na insei. A musu waka na a portu di de na abrasei fu a portu pe a ben waka kon na insei. 10 Te a pipel e kon na insei, dan na edeman di de nanga den, musu kon na insei tu. Te den e go na dorosei baka, dan a musu go na dorosei tu. 11 Te a e tyari a yongu mankaw nanga a manskapu kon na den alayari fesa èn na den tra fesa, dan a musu gi 13 kilo* blon leki n’nyan-ofrandi gi ibriwan fu den. Te a e tyari den yongu manskapu kon, dan a kan gi san a abi leki n’nyan-ofrandi. Gi ibri 13 kilo blon, a musu gi dri nanga afu liter* oli.

12 Te na edeman wani tyari wan bron-ofrandi noso wan freide-ofrandi gi Yehovah, dan wan sma musu opo a portu gi en di e sori go na owstusei. A musu tyari a bron-ofrandi nanga a freide-ofrandi fu en neleki fa a e du dati na Sabat-dei. Te a go na dorosei, dan wan sma musu tapu a portu baka.

13 Ibri dei yu musu tyari wan yongu manskapu gi den priester, so taki den kan tyari dati leki bron-ofrandi gi Yehovah. A manskapu musu abi wán yari èn a no musu abi nowan mankeri noso siki. Ibri m’manten yu musu tyari en. 14 Makandra nanga na ofrandi disi yu musu tyari tu kilo* fini blon leki n’nyan-ofrandi. Yu musu gi pkinso moro leki wán liter* oli tu fu natnati a fini blon di un musu tyari leki n’nyan-ofrandi gi Yehovah. Disi na wan wet di un musu hori fu ala ten. 15 Ibri m’manten den musu tyari a yongu manskapu, a n’nyan-ofrandi nanga na oli kon leki bron-ofrandi. Den musu du dati ala ten.’

16 Disi na san a Moro Hei Masra Yehovah taki: ’Efu wan edeman gi den manpkin fu en wan pisi gron leki famirigudu, dan a gron na fu den manpkin fu en. Na kisi den kisi en leki gudu. 17 Ma efu a gi wan futuboi fu en wan pisi fu en gron leki kado, dan a gron dati na fu a futuboi teleki a yari doro pe sani o kon fri. Baka dati a gron musu kon de fu na edeman baka. Ma a gron di a ben gi den manpkin fu en leki famirigudu o tan fu den manpkin fu en. 18 Na edeman no musu dwengi a pipel fu gwe libi a gron fu den, soso fu di a wani teki a gron. A musu gi den manpkin fu en wan pisi fu en eigi gron. Na so nowan sma fu a pipel fu mi no o abi fu gwe libi a gron fu den.’”

19 Baka dati a man tyari mi go na a doro di ben de na sei a portu di e go na den santa n’nyan-kamra.* Den n’nyan-kamra disi na fu den priester èn den ben e sori go na noordsei. Ne mi si wan presi na bakasei fu den n’nyan-kamra na west-sei fu a tempel-dyari. 20 A man taigi mi: „Na dyaso den priester o bori a pardon-ofrandi nanga a sondu-ofrandi èn na dyaso den o baka a n’nyan-ofrandi. Dan den no abi fu waka na a bigi tempel-dyari nanga den sani disi, noso den o meki a pipel kon santa na wan fasi di no fiti.”

21 Dan a man tyari mi go na a bigi tempel-dyari èn a meki mi waka psa den fo uku fu a tempel-dyari. Ne mi si taki na ibriwan fu den uku fu a bigi tempel-dyari wan pkin dyari ben de. 22 Na ibriwan fu den fo uku yu ben abi wan pkin dyari. Den ben langa 20 meter nanga 72 centimeter* èn den ben bradi 15 meter nanga 54 centimeter.* Ala den fo pkin dyari ben bigi a srefi.* 23 Na insei fu a pkin dyari disi na ala fo sei, yu ben abi wan lanki.* Na ondrosei fu a lanki presi ben de fu bori den ofrandi. 24 Ne a man taigi mi: „Disi na den oso pe den sma di e wroko na ini a tempel e bori den ofrandi di a pipel e tyari kon.”