Esekièl
13 Dan Yehovah taki baka nanga mi. A taigi mi: 2 „Manpkin fu libisma, taki san o psa nanga den profeiti fu Israel. Taigi den profeiti di e taki san densrefi e prakseri: ’Un arki san Yehovah taki. 3 A Moro Hei Masra Yehovah taki: „Bigi ogri o miti den don profeiti di e taki san densrefi e prakseri aladi den no si noti! 4 Un Israelsma, den profeiti fu unu kon de leki sabanadagu di e tan na den brokopresi. 5 Unu no o go na den broko pisi fu den ston skotu fu meki den baka gi den Israelsma. Israel no o man tan tnapu na a dei te Yehovah o kon feti nanga en.” 6 „Den e kori sma nanga den fisyun di den si èn den e taki sani di no o kon tru. Den e taki: ’Na Yehovah gi wi a boskopu disi’, ma a no Yehovah seni den. Tòg den e denki taki a o meki den sani di den taki, kon tru. 7 Unu e kori sma nanga den fisyun di unu si. Unu e taki sani di no o kon tru, bika unu e taki: ’Na Yehovah gi wi a boskopu disi’, aladi mi no taigi unu noti.”’
8 ’Dati meki a Moro Hei Masra Yehovah taki: „’Fu di unu ferteri lei èn unu ferteri sma fisyun di no o kon tru, meki mi o strafu unu’, na so a Moro Hei Masra Yehovah taki.” 9 Mi o krutu den profeiti di e kori sma nanga den fisyun di den e si èn di e taki sani di no o kon tru. Den no o de na mindri den sma di mi e fertrow. Den nen no o skrifi na ini a buku pe den nen fu den Israelsma skrifi èn den no o drai kon baka na a kondre Israel. Unu sa musu fu sabi taki mi na a Moro Hei Masra Yehovah. 10 Ala den sani disi o psa nanga den fu di den meki mi pipel lasi pasi. Den e taigi den: „Ala sani e go bun!” Ma sani no e go bun srefsrefi. Te den bow wan swaki skotu, dan den e ferfi en kon weti.’*
11 Taigi den sma di e ferfi a skotu kon weti taki a o fadon. Wan bigi alen o fadon, pispisi ijs o fadon kmoto na hemel èn wan bigi winti o meki a skotu broko fadon. 12 Te a skotu fadon, sma o aksi unu: ’Pe a ferfi de di ben de na tapu a skotu?’
13 Dati meki a Moro Hei Masra Yehovah taki: ’Fu di mi ati e bron srefsrefi, meki mi o sorgu taki bigi winti wai, wan bigi alen o fadon èn pispisi ijs o fadon kmoto na hemel fu broko a skotu. 14 Mi o broko a skotu di unu ferfi weti èn mi o meki a fadon na gron, dan den fundament fu en o de fu si. A foto o fadon èn unu o dede drape. Unu sa musu fu sabi taki mi na Yehovah.’
15 ’Mi o puru atibron tapu a skotu èn tapu den sma di ferfi en kon weti. Mi o taigi unu: „A skotu no de moro. Den sma di ferfi en no de moro tu. 16 Den profeiti fu Israel di e taki san o psa nanga Yerusalem, no de moro. Iya, den wan di e taki dati ala sani o go bun na ini a foto, aladi dati no de so, no de moro”’, na so a Moro Hei Masra Yehovah taki.
17 Manpkin fu libisma, luku go na den umapkin fu yu pipel di e kon nanga den eigi profeititori. Taigi den san o psa nanga den. 18 Taigi den: ’A Moro Hei Masra Yehovah taki: „Bigi ogri o miti den uma di e nai banti fu tai na den anu* fu ala sortu sma èn di e meki duku gi den ede fu ala sortu sma. Unu e gebroiki den sani disi fu kisi den sma! Na suku unu e suku fu kisi a pipel fu mi, aladi unu e pruberi fu kibri un eigi libi? 19 Unu e gi mi syen na fesi mi pipel, soso fu kisi pkinso groto nanga wan tu pkin pisi brede. Unu e kiri den sma di no musu dede èn unu e hori den sma na libi di musu dede, fu di unu e lei gi mi pipel di lobi arki lei.”’
20 Fu dati ede a Moro Hei Masra Yehovah taki: ’Un uma, mi o du wan sani nanga den banti di unu e gebroiki fu kisi sma leki fowru. Mi o hari den banti puru na un anu èn mi o fri den sma di unu wani kisi leki fowru. 21 Mi o hari den duku puru di unu ben meki èn mi o puru mi pipel na ini un anu, dan unu no o man kisi den moro. Unu sa musu fu sabi taki mi na Yehovah. 22 Unu meki den ret’ati sma las’ati, fu di unu e ferteri den soso lei. Ma a no mi meki den firi sari. Na presi fu taigi den ogrisma fu tapu nanga na ogri di den e du, so taki den kan tan na libi, unu e gi den dek’ati fu tan du ogri. 23 Fu dati ede, un uma, unu no o man kori sma moro nanga den fisyun fu unu èn unu no o man du lukuman-wroko moro. Mi o puru mi pipel na ini un anu. Unu sa musu fu sabi taki mi na Yehovah.’”