Esekièl

41 Baka dati a man tyari mi go na ini a Santa Presi.* Ne a marki den bigi pilari na sei den doro. Ibriwan fu den ben bradi 3 meter nanga 11 centimeter* na a wan sei èn 3 meter nanga 11 centimeter na a tra sei. 2 A mofodoro ben bradi 5 meter nanga 18 centimeter. Ibriwan fu den tu muur na seisei* fu a mofodoro ben bradi 2 meter nanga 59 centimeter. Dan a man marki o langa a Santa Presi ben de. A ben langa 20 meter nanga 72 centimeter. A ben bradi 10 meter nanga 36 centimeter.

3 Baka dati a go na insei* èn a marki a smara muur di ben de na sei a mofodoro. A muur ben deki wán meter nanga fo centimeter. A mofodoro ben bradi 3 meter nanga 11 centimeter. Ibriwan fu den smara muur na sei a mofodoro ben langa* 3 meter nanga 63 centimeter. 4 Baka dati a marki a kamra di ben de na baka a Santa Presi. A ben langa 10 meter nanga 36 centimeter èn a ben bradi 10 meter nanga 36 centimeter. Ne a taigi mi: „Disi na a Moro Santa Presi.”

5 Baka dati a marki o deki a muur fu a tempel ben de. A ben deki 3 meter nanga 11 centimeter. Na a muur lontu a tempel yu ben abi pkin kamra na seisei èn na bakasei. Den ben bradi tu meter nanga seibi centimeter. 6 A wán pkin kamra ben bow na tapu a trawan. Na gron yu ben abi 30 pkin kamra èn na ibriwan fu den tu sodro yu ben abi 30 pkin kamra tu. A muur ben meki na so wan fasi taki a ben abi wan lanki. A lanki disi ben bradi nofo fu hori den postu fu den kamra, ma den postu no ben fasi na ini a muur. 7 Na a ret’anusei èn na a kruktu-anusei fu a tempel yu ben abi wan trapu di ben e drai go na loktu. Te sma ben kren go na a fosi sodro, dan a trapu ben e kon moro bradi èn te den ben kren go na a di fu tu sodro, dan a trapu ben kon moro bradi srefi.

8 Mi si taki a tempel ben bow na tapu wan hei fundament di ben bradi moro a tempel. A fundament fu den pkin kamra ben doro te na a fundament fu a tempel èn a ben hei 3 meter nanga 11 centimeter. 9 A dorosei skotu fu den pkin kamra ben deki 2 meter nanga 59 centimeter. Di den bow den pkin kamra na a muur fu a tempel, den libi wan lanki* pe den no bow noti.

10 Na mindri a tempel nanga den n’nyan-kamra* wan opo presi ben de di ben bradi 10 meter nanga 36 centimeter. Na opo presi disi ben de na ala tu sei fu a tempel. 11 Na den n’nyan-kamra di de na seisei, wan doro ben de di ben e tyari yu go na a lanki fu a fundament. Yu ben abi wan doro na noordsei èn wan tra doro na a zuidsei fu a tempel. A lanki lontu a tempel ben bradi 2 meter nanga 59 centimeter.

12 Na west-sei yu ben abi wan bigi oso èn a mofodoro fu en ben sori go na a opo presi. A bigi oso ben bradi 36 meter nanga 26 centimeter èn a ben langa 46 meter nanga 62 centimeter. A heri muur fu na oso disi ben deki 2 meter nanga 59 centimeter.

13 Dan a man marki a tempel. A ben langa 51 meter nanga 80 centimeter. Ala nanga ala, na opo presi makandra nanga a bigi oso* èn den muur fu na oso, ben langa 51 meter nanga 80 centimeter. 14 A fes’sei fu a tempel di ben de na a owstusei, makandra nanga na opo presi sei a tempel, ben bradi 51 meter nanga 80 centimeter.

15 Dan a marki o langa a bigi oso ben de di ben de na bakasei fu na opo presi. A bigi oso, makandra nanga den gadri* di ben de na ala tu sei fu na oso, ben langa 51 meter nanga 80 centimeter.

Boiti dati, a marki a Santa Presi, a Moro Santa Presi nanga den bigi kamra di ben e sori go na a tempel-dyari. 16 A marki den mofodoro, den fensre nanga den gadri fu den dri presi dati. Na insei den fensre ben bradi èn na dorosei den ben smara. Na a mofodoro yu ben abi planga fu a gron te go miti den fensre. Den fensre ben tapu nanga pkin lati. 17 A marki a pisi fu a muur na tapsei fu a doro èn a heri insei nanga dorosei fu a tempel. A marki a heri muur lontu a tempel tu. 18 Na tapu den muur den kerfu kerub-engel nanga palmbon. Na mindri ibri tu kerub-engel yu ben abi wan palmbon. Ibriwan fu den kerub-engel ben abi tu fesi. 19 A libisma fesi ben e luku go na wan palmbon èn a fesi fu a lew* ben e luku go na wan tra palmbon. Na tapu ala den muur na ini a tempel den sani disi ben kerfu. 20 Na tapu a heri muur fu a tempel, fu a gron te go miti tapsei fu a doro, den kerfu kerub-engel nanga palmbon.

21 Den doro fu a tempel ben abi fokanti doropostu.* Na fesi a Moro Santa Presi wan sani ben de di ben gersi 22 wan udu altari. A ben hei 1 meter nanga 55 centimeter èn a ben langa wán meter nanga fo centimeter. Na den uku a ben abi pkin postu. Na ondrosei pisi* nanga seisei fu na altari ben meki fu planga. Ne a man taigi mi: „Disi na a tafra di den poti na fesi Yehovah.”

23 A Santa Presi ben abi tu doro èn a Moro Santa Presi ben abi tu doro. 24 Den doro ben prati na tu pisi di ben kan fow opo èn fow tapu. Ibriwan fu den doro ben abi tu pisi. 25 Den ben kerfu kerub-engel nanga palmbon na den doro fu a tempel. Den ben de a srefi leki den wan di ben de na tapu den muur. Na dorosei a dak fu a gadri ben abi wan lanki fu udu na fes’sei. 26 Na den muur na ala tu sei fu a gadri èn na den muur fu den pkin kamra fu a tempel, yu ben abi fensre èn prenki fu palmbon. Na insei fu a muur, den fensre ben bradi èn na dorosei den ben smara. Prenki fu palmbon ben de tu na tapu den lanki fu a dak èn na ondro den lanki disi yu ben abi fensre tu.