Esekièl
32 Na a fosi dei fu a di fu 12 mun na ini a di fu 12 yari, Yehovah taigi mi: 2 „Manpkin fu libisma, singi wan sari singi* gi Farao, a kownu fu Egepte. Taigi en:
’Yu ben de leki wan tranga yongu lew* gi den pipel,
ma now yu lasi yu makti.
Yu ben de leki wan bigi ogri meti di e libi na ini se. Yu tan pusu watra kon na loktu na ini den liba fu yu.
Nanga yu futu yu trubu èn doti a watra fu den liba.’
3 A Moro Hei Masra Yehovah taki:
’Mi o meki furu pipel fringi mi net na yu tapu
èn nanga mi net den o hari yu kon na loktu.
4 Mi o libi yu na tapu a syoro.
Mi o trowe yu na tapu a gron.
Mi o meki den fowru di e frei na loktu saka kon na yu tapu.
Mi o meki ala den ogri meti na grontapu nyan yu teleki den bere furu.
5 Mi o poti yu dedeskin na tapu den bergi
èn mi o furu den lagipresi nanga den pisi fu yu dedeskin di tan abra.
6 Mi o sungu a gron nanga a brudu di e lon kmoto na ini yu skin. A brudu fu yu o doro te na den bergi.
Srefi den liba o furu nanga a brudu fu yu.’*
7 ’Te mi o pori yu, mi o tapu hemel èn mi o meki den stari kon dungru.
Nanga den wolku mi o tapu a son
èn a mun no o skèin moro.
8 Fu yu ede mi o meki ala den sani di e skèin leti na hemel, kon dungru.
Mi o meki a kondre fu yu kon dungru’, na so a Moro Hei Masra Yehovah taki.
9 ’Mi o meki furu pipel skreki te mi o tyari sonwan fu unu gwe leki strafman na tra pipel,
iya, na kondre di yu no ben sabi.
10 Furu pipel o ferwondru te den si san psa nanga yu.
Den kownu fu den o frede te mi o wai mi fet’owru na den fesi.
Na a dei te yu o kisi pori den o beifi doronomo,
fu di den o frede taki den o dede.’
11 A Moro Hei Masra Yehovah taki:
’Nanga fet’owru a kownu fu Babilon o kon feti nanga yu.
12 Mi o meki tranga srudati, iya, den srudati fu a moro ogr’ati pipel,
kiri yu legre nanga fet’owru.
Den o puru bigifasi gi Egepte èn den o kiri a legre fu en.
13 Mi o kiri ala den meti fu en di de na den bigi liba fu en
èn nowan libisma noso meti o trubu den liba moro nanga den futu.’
14 ’Na a ten dati mi o meki a watra kon krin,
èn a watra fu den liba fu den o lon leki oli’, na so a Moro Hei Masra Yehovah taki.
15 ’Mi o meki a kondre Egepte tron wan brokopresi. A kondre di ben abi furu sani o lasi ala den sani fu en.
Mi o strafu ala den sma di e tan na ini.
Te mi du disi, dan den o sabi taki mi na Yehovah.
16 Disi na wan sari singi di sma o singi.
Den umasma fu den pipel o singi en.
Den o singi a singi disi gi Egepte nanga a legre fu en’, na so a Moro Hei Masra Yehovah taki.”
17 Na a di fu 15 dei fu a mun na ini a di fu 12 yari, Yehovah taigi mi: 18 „Manpkin fu libisma, bari krei gi a legre fu Egepte èn ferteri taki a kondre o kisi pori. En nanga den tranga pipel o saka go na ondro gron, makandra nanga den sma di e saka go na ini grebi-olo.
19 ’Yu denki taki yu moi moro iniwan tra sma? Saka go na ondro gron èn go d’don na den sma di no besnèi!’*
20 ’Den o dede nanga den sma di trawan kiri nanga fet’owru. Sma o kiri en nanga fet’owru. Un srepi en gwe makandra nanga a legre fu en.
21 Kmoto fu Grebi* den moro tranga srudati o taki nanga en èn nanga den yepiman fu en. Den Egeptesma o saka go na ondro gron seiker. Te sma kiri den nanga fet’owru, den o go d’don leki den sma di no besnèi. 22 Na drape Asiria nanga en pipel de. Den grebi fu den Asiriasma de lontu a kownu fu den. Sma kiri den alamala nanga fet’owru. 23 Den grebi fu en de te na ini a moro dipi pisi fu na olo.* En pipel de lontu en grebi. Sma kiri den alamala nanga fet’owru, bika den ben meki den sma di de na libi frede.
24 Na drape Elam nanga en legre de. Den de lontu en grebi. Sma kiri den alamala nanga fet’owru. Den sma disi di no besnèi saka go na ondro gron. Den ben meki den sma di de na libi kon frede. Now den nanga den sma di de na ini grebi-olo o kisi syen. 25 Den poti wan bedi gi en pe den dedewan de, iya, pe a legre fu en de. Den grebi fu den de lontu en. Nowan fu den besnèi èn sma kiri den nanga fet’owru, bika den ben meki den sma di de na libi kon frede. Makandra nanga den sma di de na ini grebi-olo den o kisi syen. Den poti en pe den dedewan de.
26 Na drape Meisek nanga Tubal èn den legre fu den de. Den grebi fu den legre fu den de lontu den. Den no besnèi èn sma kiri den nanga fet’owru, bika den ben meki den sma di de na libi kon frede. 27 Den o d’don na den tranga srudati di no besnèi èn di de na ini Grebi* nanga den fetsani fu den. Den o poti den fet’owru na ondro den ede* èn den o poti den sondu fu den na tapu den bonyo fu den. Disi o psa nanga den tranga srudati disi fu di den ben meki den sma di de na libi kon frede. 28 Ma yu* srefi o dede nanga den sma di no besnèi èn yu o d’don na den wan di sma kiri nanga fet’owru.
29 Na drape Edom, den kownu fu en nanga ala den edeman fu en de. Sma kiri den nanga fet’owru aladi den ben tranga. Den srefi o d’don na den sma di no besnèi èn na den sma di de na ini grebi-olo.
30 Drape ala den granman* fu noordsei nanga ala den Sidonsma de. Nanga bigi syen den saka go na den sma di dede, aladi a bigi makti fu den ben e meki sma frede. Den no besnèi èn den o d’don na den wan di sma kiri nanga fet’owru. Makandra nanga den sma di de na ini grebi-olo den o kisi syen.
31 Farao o si ala den sma disi èn a o kisi trowstu te a si san psa nanga a legre fu en. Nanga fet’owru sma o kiri Farao nanga en heri legre’, na so a Moro Hei Masra Yehovah taki.
32 Fu di Farao ben meki den sma di de na libi frede, meki den o poti en nanga a legre fu en d’don na den sma di no besnèi èn na den wan di sma kiri nanga fet’owru’, na so a Moro Hei Masra Yehovah taki.”