Wan Openbaring gi Yohanes

8 Di a puru a di fu seibi stampu,* dan ala sani na ini hemel kon pî sowan afu yuru langa. 2 Ne mi si den seibi engel di e tnapu na fesi Gado. Den ben kisi seibi trompet.

3 Dan wan tra engel kon èn a go tnapu na a altari. Na ini en anu a ben e hori wan gowtu patu fu bron wierook. A ben kisi furu wierook fu bron leki ofrandi na tapu a gowtu altari di ben de na fesi a kownusturu. A ben musu bron a wierook te den santawan ben e begi. 4 A smoko fu a wierook di ben de na ini na anu fu na engel ben opo go na fesi Gado makandra nanga den begi fu den santawan. 5 Ma direk baka dati na engel furu a wierook patu nanga pkinso fu a faya fu na altari, dan a fringi a faya go na grontapu. Ne dondru bari, sten ben de fu yere, bliksem koti na hemel èn wan gronseki ben de. 6 Dan den seibi engel di ben abi den seibi trompet sreka densrefi fu bro den trompet.

7 Ne a fosi engel bro a trompet fu en. Dan pispisi ijs nanga faya di ben moksi nanga brudu fadon na grontapu. A di fu dri pisi fu grontapu bron, a di fu dri pisi fu ala den bon bron èn ala den grun w’wiri bron tu.

8 Baka dati a di fu tu engel bro a trompet fu en. Ne wan sani di ben gersi wan bigi bergi di ben e bron nanga faya fadon na ini a se. Dan a di fu dri pisi fu a se tron brudu, 9 a di fu dri pisi fu ala den sani di e libi* na ini a se dede èn a di fu dri pisi fu ala boto sungu.

10 Dan a di fu dri engel bro a trompet fu en. Ne wan bigi stari di ben e bron leki wan faya fadon kmoto fu hemel èn a fadon na tapu a di fu dri pisi fu ala den liba èn na tapu den presi pe watra e kmopo. 11 A nen fu a stari na Bita. A di fu dri pisi fu ala watra kon bita èn furu sma dede fu di a watra ben kon bita.

12 Dan a di fu fo engel bro a trompet fu en. Ne ogri miti a di fu dri pisi fu a son, a di fu dri pisi fu a mun nanga a di fu dri pisi fu ala den stari. Na so a di fu dri pisi fu den sani disi kon dungru èn leti no ben skèin na a di fu dri pisi fu a dei. A srefi sani psa tu nanga a neti.

13 Ne mi si wan aka e frei na loktu èn mi yere a bari nanga wan tranga sten: „Ogri, ogri, ogri o miti den sma di e libi na grontapu, bika heri esi den tra dri engel o bro den trompet fu den!”