Esekièl

42 Baka dati a man tyari mi go na a noordsei pisi fu a bigi tempel-dyari. Dan a tyari mi go na a presi pe den n’nyan-kamra ben de, na sei na opo presi èn na noordsei fu a bigi oso. 2 A skotu fu a presi di ben abi den n’nyan-kamra ben langa 51 meter nanga 80 centimeter* èn a ben bradi 25 meter nanga 90 centimeter. Wan doro ben de na noordsei fu a skotu pe den n’nyan-kamra ben de. 3 Na mindri na opo presi fu a pkin tempel-dyari nanga a ston-gron fu a bigi tempel-dyari, yu ben abi tu oso di ben abi n’nyan-kamra nanga balkon. Den tu oso ben de abrasei fu makandra èn ibriwan fu den ben abi tu sodro. Na opo presi ben bradi 10 meter nanga 36 centimeter. 4 Wan pasi ben de fu waka na mindri den tu oso di ben abi den n’nyan-kamra.* A pasi ben bradi 5 meter nanga 18 centimeter èn a ben langa 52 meter.* Den doro fu den n’nyan-kamra ben e sori go na noordsei. 5 Den n’nyan-kamra na a di fu tu sodro ben smara moro den kamra fu a fosi sodro èn fu den wan na gron, fu di den ben abi balkon. 6 Den oso di ben abi den n’nyan-kamra, ben abi tu sodro. Den oso no ben abi pilari leki den wan na den tempel-dyari. Fu dati ede den n’nyan-kamra na a di fu tu sodro ben moro smara leki den n’nyan-kamra na gron èn leki den wan na a fosi sodro.

7 Wan ston skotu ben de na sei den n’nyan-kamra, na a sei fu a bigi tempel-dyari. A skotu disi ben de na abrasei fu den tra n’nyan-kamra èn a ben langa 25 meter nanga 90 centimeter. 8 A muur fu na oso fu den n’nyan-kamra na a sei fu a bigi tempel-dyari, ben langa 25 meter nanga 90 centimeter. Ma na a sei fu a tempel a muur ben langa 51 meter nanga 80 centimeter. 9 Na owstusei yu ben abi wan doro fu go na den n’nyan-kamra. Te wan sma ben kmoto na a bigi tempel-dyari fu go na ini den n’nyan-kamra, dan a ben kan waka na a doro dati.

10 Na zuidsei yu ben abi n’nyan-kamra tu na baka* a ston skotu di de na owstusei. Den ben de na sei na opo presi èn na sei a bigi oso. 11 A pasi di ben de na mindri den tu oso pe den n’nyan-kamra na zuidsei ben de, ben gersi a pasi di ben de na mindri den tu oso pe den n’nyan-kamra na noordsei ben de. Den n’nyan-kamra na zuidsei ben langa a srefi leki den wan na noordsei èn den ben bradi a srefi tu. Den ben abi den srefi sortu doro èn den ben meki na a srefi fasi. Den doro 12 fu den ben de a srefi leki den wan fu den n’nyan-kamra na zuidsei. Wan portu ben de na a bigin fu a pasi di ben de na mindri den tu oso pe den n’nyan-kamra ben de. A portu ben de na a ston skotu na owstusei, na a presi pe sma e waka kon na insei fu go na den n’nyan-kamra.

13 Ne a man taigi mi: „Den n’nyan-kamra na noordsei nanga den n’nyan-kamra na zuidsei di de na sei na opo presi, na santa n’nyan-kamra. Na drape den priester di e kon na fesi Yehovah e go fu nyan den moro santa ofrandi. Na drape den e poti den moro santa ofrandi, den n’nyan-ofrandi, den sondu-ofrandi nanga den pardon-ofrandi, fu di a presi dyaso na wan santa presi. 14 Efu den priester de na ini a Santa Presi èn den wani go na a bigi tempel-dyari, dan den no musu waka go na dorosei nanga den srefi krosi. Den musu puru den krosi di den gwenti weri fu du a wroko fu den, fu di den krosi dati santa. Den musu weri tra krosi, fosi den kan go na den presi pe tra sma de.”

15 Baka di a man kba marki ala sani na tapu a pkin tempel-dyari,* a meki mi waka na wan portu fu go na dorosei. A fes’sei fu a portu dati ben e sori go na owstusei. Dan a marki ala sani drape.

16 A marki a heri skotu na owstusei nanga a markitiki.* A skotu ben langa 1555 meter fu a wan sei go na a tra sei.

17 A marki a skotu na noordsei nanga a markitiki. A skotu ben langa 1555 meter.

18 A marki a skotu na zuidsei nanga a markitiki. A skotu ben langa 1555 meter.

19 Dan a waka go na a skotu na west-sei. Nanga a markitiki a marki 1555 meter.

20 A marki ala fo sei fu a tempel-dyari. Lontu a dyari wan skotu ben de di ben langa 1555 meter èn di ben bradi 1555 meter. A skotu ben musu prati a santa pisi fu a pisi na dorosei.