A fosi brifi gi den Tesalonikasma

1 Mi, Paulus, di de nanga Selfanus* nanga Timoteyus, e skrifi a brifi disi gi a gemeente fu den Tesalonikasma di de wán nanga Gado wi P’pa èn nanga Masra Yesus Krestes:

Meki Gado sori unu bun-ati èn meki a freide fu en de nanga unu.

2 Ala ten wi e taki Gado tangi te wi e taki fu un alamala na ini den begi fu wi. 3 Bika te wi de na fesi Gado, wi P’pa, dan noiti wi e fergiti a wroko di unu e du fu di unu abi bribi. Noiti wi e fergiti ala a muiti di unu e du fu di unu abi lobi èn a fasi fa unu e hordoro fu di unu e howpu tapu wi Masra Yesus Krestes. 4 Brada nanga sisa, wi sabi taki Gado lobi unu èn taki a kari unu. 5 Bika di wi preiki a bun nyunsu gi unu, dan a no taki wi ben taki nomo, ma wi preiki nanga a krakti fu a santa yeye èn nanga tranga bribi. Dati meki a ben abi furu krakti na unu tapu. Unu sabi tu sortu sma wi ben tron gi a bun fu unu. 6 Unu ben teki na eksempre fu wi èn fu Masra, bika srefi di furu pina ben e miti unu, unu teki a wortu fu Gado nanga a prisiri di e kon fu a santa yeye. 7 Na so unu kon de wan eksempre gi ala den bribiman na Masedonia nanga Akaya.

8 Te yu luku en bun, dan a no soso na Masedonia nanga Akaya unu ferteri sma a wortu fu Yehovah,* ma na ala presi sma yere fa unu e bribi na ini Gado. Dati meki wi no abi fu taki noti moro, 9 bika den sma dati srefi e tan ferteri fa wi ben miti unu a fosi leisi èn fa unu drai kon na Gado. Un gwe libi den falsi gado fu unu fu go dini* a tru Gado di e libi 10 èn fu wakti a Manpkin fu Gado di o kmoto fu hemel èn di Gado ben gi libi baka. En na Yesus di o ferlusu wi te Gado o sori a bigi atibron fu en.