Esekièl
28 Yehovah taki baka nanga mi. A taigi mi: 2 „Manpkin fu libisma, taigi a fesiman fu Tirus: ’Disi na san a Moro Hei Masra Yehovah taki:
„Yu kon abi bigifasi èn yu e taki: ’Mi na wan gado.
Mi sdon na tapu a sturu fu wan gado, na tapu a se.’
Na ini yu ati yu e si yusrefi leki wan gado.
Ma yu na wan libisma nomo. Yu a no wan gado.
3 Yu denki taki yu koni moro Danièl.
Yu denki taki yu sabi ala kibritori.
4 Nanga a koni fu yu èn nanga a sabi fu yu, yu meki yusrefi kon gudu.
Yu e tan poti moro gowtu nanga solfru na ini yu maksin.
5 Fu di yu sabi du bisnis, meki yu kon abi furu gudu.
Yu kon abi heimemre fu di yu gudu.”’
6 ’Dati meki a Moro Hei Masra Yehovah taki:
„Fu di yu denki taki yu na wan gado,
7 meki mi o seni wan pipel di yu no sabi fu kon feti nanga yu. Den na den moro ogr’ati sma fu ala den pipel.
Nanga fet’owru den o pori ala den moi sani di yu ben abi fu di yu ben koni.
Den o meki yu lasi a glori fu yu.
8 Den o meki yu saka go na ini grebi-olo.
Yu o dede na wan ogr’ati fasi na ini a se.
9 Te wan sma de fu kiri yu, yu o man taigi en: ’Mi na wan gado’?
Te yu fadon na ini na anu fu den sma di e wiswasi yu, yu o de wan libisma nomo. Yu a no wan gado.”’
10 A Moro Hei Masra Yehovah taki:
’Den sma di yu no sabi o kiri yu leki yu na wan sma di no besnèi,* na so mi taki.’”
11 Ne Yehovah taki baka nanga mi. A taigi mi: 12 „Manpkin fu libisma, singi wan sari singi gi a kownu fu Tirus. Taigi en: ’Disi na san a Moro Hei Masra Yehovah taki:
„Ala sani fu yu ben bun, noti no ben mankeri na yu.
Yu ben abi furu koni èn yu ben moi srefsrefi.
13 Yu ben de na ini Eden, a dyari fu Gado.
Den krosi fu yu ben lai nanga ala sortu diriston,
soleki robijn-ston,* topas-ston,* yaspis-ston,* krisolit-ston,* oniks-ston,* yade-ston,* safir-ston,* turkwas-ston* nanga smaragd-ston.*
Den sani pe den diriston ben fasi na ini, ben de fu gowtu.
Na a dei di mi meki yu, mi meki den sani disi.
14 Mi poti yu leki a salfu kerub-engel, den frei fu yu ben bradi opo.
Yu ben de na tapu a santa bergi fu Gado. Yu ben e waka na mindri ston di ben e bron.
15 Sensi di mi meki yu, yu tyari yusrefi na wan reti fasi,
teleki yu bigin du ogri.
16 Fu di a bisnis fu yu ben e drai bun,
meki yu kon lai ogridu èn yu bigin sondu.
Leki wan doti sani mi o trowe yu kmoto na a bergi fu Gado.
Mi o kiri yu, kerub-engel di bradi en frei opo, so taki yu no de moro na mindri den ston di e bron.
17 Na fu di yu moi, meki yu kisi bigifasi.
Fu di yu ben abi so furu glori meki yu lasi a koni fu yu.
Mi o trowe yu go na gron.
Den kownu o ferwondru te den si san mi du nanga yu.
18 Na fu di yu du furu ogri èn yu du bisnis na wan kruka fasi, meki yu doti den santapresi fu yu.
Mi o seti wan faya na ini yu èn a o bron yu krinkrin.
Mi o meki yu tron asisi tapu a gron, so taki ala sma kan si yu.
19 Ala den pipel di ben sabi yu, o luku yu nanga opo mofo.
Mi o meki rampu kon na yu tapu wantronso.
Noiti moro yu o de.”’”
20 Yehovah taigi mi tu: 21 „Manpkin fu libisma, luku go na a sei fu Sidon èn taigi en san o psa nanga en. 22 Yu musu taigi en: ’Disi na san a Moro Hei Masra Yehovah taki:
„Sidon, a strafu di mi o gi yu o meki mi kisi glori.
Te mi o strafu yu, dan sma o sabi taki mi na Yehovah èn taki mi na wan santa Gado.
23 Mi o seni takru siki kon na yu tapu. Brudu o lon na tapu den strati fu yu.
A fet’owru o kon fu ala sei èn furu dede o fadon.
Sma sa musu fu sabi taki mi na Yehovah.
24 Den pipel di de lontu den Israelsma èn di e wiswasi den, no o dyuku den moro leki maka. Sma sa musu fu sabi taki mi na a Moro Hei Masra Yehovah.”’
25 ’Disi na san a Moro Hei Masra Yehovah taki: „Te mi o tyari den Israelsma kon na wán baka fu ala den kondre pe den ben panya go, dan sma fu ala kondre o si taki mi na wan santa Gado. Dan den Israelsma o tan na ini a kondre fu den di mi ben gi mi futuboi Yakob. 26 Den no o abi nowan brok’ede te den e libi drape. Den o bow oso èn den o prani droifidyari. Iya, den o libi drape sondro brok’ede te mi o strafu ala den pipel na den lontu di ben spotu den. Den sa musu fu sabi taki mi na Yehovah, a Gado fu den.”’”