Esekièl

5 Manpkin fu libisma, teki wan srapu fet’owru. Gebroiki en leki wan scheermes fu koti yu ede-w’wiri nanga yu barba. Dan yu musu teki wan wegi èn prati a w’wiri na ini dri ipi. 2 Te yu kba feti nanga a foto, dan yu musu bron wan ipi fu a w’wiri nanga faya. Baka dati yu musu teki wan tra ipi èn yu musu naki en nanga a fet’owru lontu a foto. A lasti ipi fu a w’wiri yu musu meki winti wai go na ala sei, dan mi o seni wan fet’owru go na den baka.

3 Yu musu teki pkinso w’wiri fu na ipi disi èn domru en na ini yu krosi. 4 Teki ete wan tu w’wiri fu a lasti ipi èn trowe dati na ini faya meki a bron teleki a tron asisi. A faya disi o bron ala den Israelsma.

5 Disi na san a Moro Hei Masra Yehovah taki: ’Disi na Yerusalem. Mi poti en na mindri tra pipel èn tra kondre de na en lontu. 6 Ma a no hori den wet fu mi èn a no du san mi taki. A ogri moro den tra pipel nanga den kondre di de lontu en. Iya, a poti den wet fu mi na wan sei èn a no du san mi taki.’

7 Dati meki a Moro Hei Masra Yehovah taki: ’Unu opo unsrefi teige mi, moro leki den tra pipel na un lontu. Unu no hori den wet fu mi èn unu no du san mi taki, ma unu hori den wet fu den pipel di de na un lontu. 8 Fu dati ede a Moro Hei Masra Yehovah taki: „Yerusalem, misrefi o strafu yu na fesi den tra pipel. 9 Fu di yu du so furu sani di e gi groskin, meki mi o du wan sani nanga yu di mi no du noiti ete èn di mi no o du noiti moro.

10 Fu dati ede papa o nyan den pkin èn pkin o nyan den papa. Mi o strafu unu èn ala den sma di tan abra mi o panya go na ala sei.”’*

11 A Moro Hei Masra Yehovah taki: ’Mi e sweri na mi libi taki mi o drai mi baka gi unu.* Mi no o firi gi unu èn mi no o sari unu, fu di unu doti mi santapresi nanga den fisti gado fu unu èn nanga na afkodrei di unu e du. 12 Siki nanga angri o kiri wan grupu sma na ini a foto. Na ala sei fu a foto fet’owru o kiri wan tra grupu. Den wan di tan abra mi o panya go na ala sei,* dan mi o seni wan fet’owru go na den baka. 13 Baka te mi puru atibron na den tapu, mi ati o kon kowru èn mi o firi bun baka. Te mi puru atibron na den tapu, dan den sa musu fu sabi taki mi, Yehovah, taki nanga den fu di mi wani taki den musu anbegi mi w’wan.

14 Mi o meki yu tron wan brokopresi. Ala den pipel na yu lontu èn ala den sma di e waka psa o spotu yu. 15 Yu o kisi syen èn sma o wiswasi yu. Den sani di o psa nanga yu o de leki wan warskow gi den pipel na yu lontu. Den o frede te mi o puru atibron na yu tapu, te mi o krutu yu èn te mi o strafu yu. Na mi, Yehovah, taki dati disi o psa.

16 Mi o meki angriten kiri unu neleki fa peiri e kiri sma. Mi o meki na angriten kon moro hebi gi unu fu di mi o sorgu taki unu no abi n’nyan.* 17 Mi o meki angriten nanga ogri meti kiri den pkin fu unu. Takru siki nanga fet’owru o kiri unu èn furu brudu o lon. Na mi, Yehovah, taki dati disi o psa.’”