Esekièl

2 Ne a taigi mi: „Manpkin fu libisma,* opo tnapu na tapu yu futu, bika mi wani taki nanga yu.” 2 Di a taki nanga mi, en yeye kon na mi tapu. A meki mi opo tnapu na tapu mi futu, so taki mi ben kan arki en.

3 A taigi mi: „Manpkin fu libisma, mi e seni yu go na den Israelsma, wan pipel di opo densrefi teige mi. Neleki den afo fu den, den no hori den wet fu mi èn teleki now den no e du dati. 4 Mi e seni yu go na sma di no abi lespeki èn di trangayesi. Yu musu taigi den: ’Disi na san a Moro Hei Masra Yehovah taki.’ 5 Den na wan pipel di e opo densrefi teige mi. Awinsi den arki noso den no arki, den o sabi taki wan profeiti ben de na den mindri.

6 Ma yu, manpkin fu libisma, no frede den èn no frede den sani di den o taki awinsi maka lontu yu* èn awinsi yu e tan na mindri kruktutere.* Yu no musu frede den sani di den o taki èn no beifi te yu si den fesi fu den, bika den na sma di e opo densrefi teige mi. 7 Awinsi den arki, noso den no arki, tòg yu musu taigi den san mi taigi yu fu taki. Den na sma di e opo densrefi teige mi.

8 Manpkin fu libisma, arki san mi e taigi yu. No opo yusrefi teige mi leki den sma disi di e opo densrefi teige mi. Opo yu mofo èn nyan a sani di mi o gi yu.”

9 Di mi luku, mi si wan sma e langa en anu kon na mi èn a ben abi wan bukulolo na ini en anu. 10 A opo a bukulolo na mi fesi. Na fes’sei èn na bakasei fu a bukulolo sari singi nanga tra tori ben skrifi di ben meki sma sari èn bari krei.