Esekièl

6 Yehovah taki baka nanga mi. A taigi mi: 2 „Manpkin fu libisma, luku go na den bergi fu Israel èn taigi den san o psa nanga den. 3 Yu musu taki: ’Bergi fu Israel, arki san a Moro Hei Masra Yehovah taki. A Moro Hei Masra Yehovah taigi den hei bergi, den pkin bergi, den liba nanga den lagipresi: „Luku! Mi o meki sma kon feti nanga unu èn mi o broko den hei presi pe unu e anbegi tra gado. 4 Mi o broko den altari fu unu pe unu e tyari ofrandi nanga den tra altari pe unu e bron switismeri. Mi o trowe den skin fu den sma di dede, na fesi den fisti gado* fu den. 5 Mi o trowe den dedeskin fu den Israelsma na fesi den fisti gado fu den èn mi o panya den bonyo fu unu lontu den altari fu unu. 6 Mi o pori ala den presi nanga den foto pe unu e tan èn nowan sma o de moro na den hei presi pe unu e anbegi tra gado. Den o tron brokopresi. Nowan sma o tyari ofrandi moro na den altari fu unu, bika mi o broko den. Nowan fisti gado fu unu o de moro èn mi o broko den altari fu unu pe unu e bron switismeri. Iya, mi o pori ala den sani di unu meki. 7 Mi o kiri furu sma na unu mindri. Unu sa musu fu sabi taki mi na Yehovah.

8 Ma mi o meki sonwan fu unu tan na libi te unu panya go na den tra kondre. 9 Den wan di tan na libi èn di e libi leki strafman na mindri den tra pipel, o memre mi. Den o memre taki mi ben e sari di den drai baka gi mi fu go huru* nanga den fisti gado fu den. Den o syen èn den o fisti fu ala den ogri nanga groskin sani di den du. 10 Dan den sa musu fu sabi taki mi na Yehovah èn taki mi no ben kori den di mi ben taigi den taki mi ben o tyari a rampu disi kon na den tapu.”’

11 Disi na san a Moro Hei Masra Yehovah taki: ’Naki anu, stampu nanga yu futu èn soktu fu di den Israelsma e du furu ogri sani di e gi sma groskin. Fet’owru, angri nanga takru siki o kiri den. 12 Takru siki o kiri den sma di de farawe, fet’owru o kiri den sma di de krosbei èn den sma di tan abra o dede fu angri. Mi o puru atibron na den tapu teleki mi ati kon kowru. 13 Den dedewan fu den o d’don lontu den fisti gado fu den èn lontu den altari fu den. Den o d’don na tapu ibri pkin bergi, na tapu ala den ede fu den tra bergi, na ondro ibri bon di abi furu w’wiri èn na ondro den bigi bon di lai bigi taki pe den ben e bron switismeri fu plisi ala den fisti gado fu den. Dan den sa musu fu sabi taki mi na Yehovah. 14 Mi o langa mi anu fu naki den èn mi o meki a heri kondre, iya, ala presi pe den e tan, tron wan brokopresi. A o ogri moro a sabana na ini a birti fu Dibla. Dan den sa musu fu sabi taki mi na Yehovah.’”