Na Avondmaal fu Masra—San na dati?

FU SAN yu e prakseri te yu e yere wan sma taki fu „na avondmaal fu masra”? Furu sma e prakseri fu a bigi, barinen skedrei di Leonardo da Vinci (di ben libi fu 1452 te go miti 1519) meki tapu wan skotu na ini wan oso fu Milan, wan foto na Italiakondre. Fu taki en leti, na ini den hondrohondro yari di pasa, furu sma meki sani soleki skedrei, skrifi sani, èn meki poku di abi fu du nanga na Avondmaal fu Masra.

Ma san na a Avondmaal fu Masra, èn san a wani taki gi sma na ini a di fu twenti na wan yarihondro disi? Wortubuku e sori taki na Avondmaal fu Masra, noso a Lasti Nyanyan fu Masra, na a nyanyan di Yesus Krestes ben nyan makandra nanga den apostel fu en, na a neti fosi a gi en libi leki wan srakti-ofrandi. Fu di a ben de a lasti nyanyan di Yesus ben nyan na a neti dati makandra nanga den getrow bakaman fu en, meki son sma e kari en a Lasti Nyanyan fu Masra. Èn fu di na Masra Yesus Krestes srefi ben seti a nyanyan disi, meki a fiti fu kari en na Avondmaal fu Masra.

Na ini den hondrohondro yari di pasa, furu sma dede gi sani di ben de tumusi prenspari gi den. A dede fu sonwan fu den sma dati, ben tyari wini kon gi son sma fu wan pisi ten nomo. Ma awinsi sortu wini den dede disi tyari kon gi tra sma, toku te yu e teki den gersi nanga a di fu Yesus Krestes, dan nowan fu den de so prenspari leki a di fu en. Boiti dati, a dede fu nowan tra sma na ini a heri libisma historia di lai nanga feti èn nanga problema, ben abi so furu krakti tapu libisma na heri grontapu leki a dede fu Yesus. Fu san ede?

Wi e gi yu wan kari fu leisi na artikel di e kon now, so taki yu kan kisi wan piki tapu na aksi dati èn so taki yu kan kon sabi san na Avondmaal fu Masra wani taki gi yu.