O ten wan sisa musu weri wan sani fu tapu en ede? Fu san ede a musu du dati?

Te a abi fu du nanga na anbegi, dan o ten wan Kresten sisa musu weri wan sani fu tapu en ede, èn fu san ede a musu du dati? Meki wi go luku san na apostel Paulus ben skrifi fu a tori disi. A rai di Paulus e gi kan yepi wi fu teki bun bosroiti di Gado feni bun. Na 1 Korentesma 11:3-16, Paulus e poti prakseri na dri prenspari sani: (1) O ten wan sisa musu weri wan sani fu tapu en ede, (2) den situwâsi pe a musu du dati, èn (3) fu san ede a musu du dati.

Paulus e taki o ten wan sisa musu du dati: Te a e begi èn te a e taki profeititori (vers 4, 5). A no de fu taki dati te wan sma e begi, dan a e taki nanga Yehovah na wan lespeki fasi. Na ini a ten disi, a taki di sma e taki profeititori kan abi fu du nanga iniwan Bijbel leri di wan Kresten preikiman e gi trawan. Ma a de so taki Paulus e taki dati wan sisa musu weri wan sani fu tapu en ede ibri leisi te a e begi, noso te a e gi sma Bijbel leri? Nôno. Na a situwâsi o sori efu a musu du dati.

Paulus e taki fu tu situwâsi pe wan sisa musu du dati. Na ini na osofamiri èn na ini a gemeente. Paulus e taki: „A man na a ede fu na uma . . . Ibri uma di no abi wan sani na tapu en ede te a e begi noso te a e taki profeititori, e tyari syen kon na tapu en ede” (vers 3, 5). Na ini na osofamiri, Yehovah poti a masra leki ede fu na uma. Wan uma musu lespeki a seti disi. Efu a ben o teki den frantwortu di Yehovah gi a masra, dan a ben o gi en masra syen. Fu eksempre, efu a musu studeri Bijbel nanga wan sma, èn a masra fu en de drape, dan a musu weri wan sani fu tapu en ede. Na so a e sori lespeki gi a frantwortu di en masra abi leki edeman. A musu du dati awansi a masra fu en dopu, noso awansi a no dopu, fu di en na a edeman fu na osofamiri.a Efu a musu begi, noso gi leri, èn a yongu manpikin fu en di dopu de drape, dan a musu weri wan sani tu fu tapu en ede. A no e du dati fu di a manpikin disi na edeman fu na osofamiri, ma a e du dati fu di a manpikin disi na wan dopu brada fu a Kresten gemeente.

Luku san Paulus e taki te a abi fu du nanga a gemeente: „Efu wan sma e krutukrutu taki a sani disi musu de tra fasi, we, wi no gwenti tra fasi èn den gemeente fu Gado no gwenti tra fasi tu” (vers 16). Na ini a Kresten gemeente, na dopu brada abi a frantwortu fu teki fesi (1 Timoteyus 2:11-14; Hebrewsma 13:17). Na soso mansma e tron owruman nanga dinari ini a diniwroko, èn Gado gi den man disi a frantwortu fu luku den skapu fu en (Tori fu den apostel 20:28). Ma son leisi, a kan de fanowdu taki wan Kresten sisa musu du wan wroko di dopu brada musu du. Kande a musu teki fesi na wan preikiwroko konmakandra, fu di dopu brada di man du dati no de drape. Noso, kande a ben meki mofo fu hori wan Bijbelstudie, èn a musu du dati aladi wan dopu brada de drape.b Fu di den sani dati na wan seti fu a gemeente, meki a musu weri wan sani fu tapu en ede. Na so a e sori taki a e frustan taki a e du wan wroko di wan brada musu du.

Ma furu okasi de tu pe wan Kresten sisa no abi fu weri wan sani fu tapu en ede. Fu eksempre, a no abi fu du dati te a e gi piki na den Kresten konmakandra, èn te a e preiki oso fu oso makandra nanga en masra, noso nanga wan tra dopu brada. A no abi fu du dati tu te a e studeri, noso te a e begi nanga den pikin fu en di no dopu ete. Ma efu wan sisa de na ini wan situwâsi pe a no sabi san fu du, dan a kan ondrosuku sani moro fini.c Efu toku a no sabi seiker, èn efu en konsensi e piki en taki a musu weri wan sani fu tapu en ede, dan a no de wan fowtu sani fu du dati, soleki fa a prenki e sori.

Vers 10 e sori fu san ede wan Kresten sisa musu weri wan sani fu tapu en ede: „Fu den engel ede, meki na uma musu poti wan sani na tapu en ede fu sori taki a e saka ensrefi na a man ondro.” Luku den wortu „fu sori taki a e saka ensrefi na a man ondro”. Te wan uma e weri wan sani fu tapu en ede, dan a e sori taki a e lespeki a frantwortu di Yehovah gi dopu brada na ini a gemeente. Na so a e sori taki a lobi Yehovah Gado èn taki a e gi yesi na en. Wan tra sani fu san ede wan sisa e du dati, na „fu den engel ede”. Te wan sisa e weri wan sani fu tapu en ede, dan sortu krakti dati abi tapu den makti engel?

Den engel breiti te den e si taki na ini a heri organisâsi fu Yehovah, na hemel èn na grontapu, sma e sori lespeki gi a seti fu Gado. Den engel e kisi wini tu te sondu libisma e saka densrefi na ondro a seti fu Gado. Fu taki en leti, den engel musu saka densrefi tu na ondro a seti fu Yehovah, wan sani di bun furu engel no ben du na ini a ten di pasa (Yudas 6). Fu eksempre, den engel kan si taki son leisi wan Kresten sisa abi moro ondrofeni, moro sabi, nanga moro koni leki wan dopu brada na ini a gemeente. Ma toku a sisa de klariklari fu saka ensrefi na ondro a brada. Son leisi, a sisa na wan salfu Kresten di bakaten o tiri leki kownu makandra nanga Krestes. Te fu kaba, a sisa disi o abi wan posisi di hei moro di fu den engel. Dati na wan moi eksempre gi den engel! Iya, ala sisa abi a grani fu sori taki den e gi yesi èn taki den e saka densrefi na ondro a seti fu Yehovah. Na so den de wan moi eksempre gi den milyunmilyun reti-ati engel di e luku den.