5 ABRAHAM
A du san Yehovah aksi en aladi a ben muilek
ABRAHAM e waka safsafri go na a presi di Yehovah taigi en fu go èn noti no man tapu en fu doro drape. A tru taki a waka go na furu presi kba na ini en libi ma tòg a waka disi na a moro muilek waka di a teki aladi a o teki wan tu dei nomo.
A e tan prakseri san Yehovah aksi en: „Teki Isak, a wan-enkri manpkin fu yu di yu lobi so te, dan un go na a kondre Moria. Drape na tapu wan fu den bergi di mi o sori yu, yu musu gi en leki wan bron-ofrandi.” Yehovah ben sabi o furu Abraham ben lobi Isak. Ma fu san ede Yehovah aksi en fu du a sani disi? Fa Abraham ben man abi nofo bribi nanga dek’ati fu du san Yehovah ben aksi en?
Bijbel e kari Abraham a „p’pa fu ala sma di e bribi” (Rom. 4:11). Fosi Yehovah ben aksi Abraham fu du a sani disi, en bribi ben tranga kba. Na ini ala den yari di psa Yehovah yepi en fu kon abi wan moro tranga bribi. Fu eksempre, wan tu yari na fesi Yehovah ben taigi Abraham taki a ben o pori den ogri foto Sodom nanga Gomora. Ma fu di Abraham ben broko en ede srefsrefi nanga a sani disi, meki a aksi Yehovah efu trutru a ben o pori den bun sma makandra nanga den ogri sma. Nanga pasensi Yehovah sori Abraham taki a no ben o pori den foto disi efu a ben o feni wan tu ret’ati sma drape (Gen. 18:16-33). Noiti Abraham no fergiti san a leri: Ala ten Yehovah e du san reti èn a abi sar’ati.
Di Yehovah ben aksi Abraham fu du wan sani di wan lob’ati p’pa no ben o du noiti, dan san yepi en fu abi dek’ati èn du san Gado aksi en?
Abraham ben sabi taki en nanga Sara no ben o man kisi pkin moro. Ma Yehovah du wan wondru gi den. Aladi Sara ben abi bijna 90 yari èn Abraham ben abi bijna 100 yari, Yehovah yepi den fu kisi wan manpkin èn den kari en Isak. A wondru disi leri Abraham wan tra sani: Noti no de di Yehovah no man du. —Rom. 4:18, 19.
Now sowan 25 yari baka dati, Abraham ben musu fu prakseri den sani dati di a ben e waka go na a bergi Moria. A kon ferstan taki srefi efu Isak ben o dede, Yehovah abi a krakti fu meki a kon na libi baka èn a ben o wani du dati tu (Hebr. 11:19). Na so Abraham go na a presi di Yehovah ben taigi en fu go. A howpu di a ben abi gi en dek’ati fu waka go doro.
Di Abraham doro krosbei fu a presi di Yehovah ben taigi en fu go, a taigi den futuboi fu en fu tan na baka èn wakti en drape. Dan en nanga Isak go na a bergi fu tyari wan ofrandi. A ben taigi den futuboi fu en taki en nanga Isak ben o drai kon baka. Na so Abraham sori taki a ben de seiker taki en nanga Isak ben o drai kon baka. Now di Abraham nanga Isak ben de den w’wan na tapu a bergi, a ten ben doro fu du san Yehovah ben aksi en. Aladi Isak ben yongu èn tranga moro en p’pa, tòg a du san en p’pa taigi en. Na so a meki en p’pa tai en anu nanga en futu èn poti en na tapu na altari. Dan Abraham ben de klarklari fu du wan sani san noiti wan lob’ati p’pa ben o du. A teki a nefi èn a opo en anu go na loktu. Ma na a momenti dati wan engel kari en na en nen èn a taigi en: „No du a boi ogri.” Ne Abraham stop.
Gado prèise Abraham fu di a sori bribi èn fu di a gi yesi. A taigi en ete wan leisi taki a ben o blesi en fu di a o meki a kisi bun furu bakapkin èn na en o meki taki „ala den pipel fu grontapu” kisi blesi.
A pramisi di Yehovah ben meki nanga Abraham e kon tru te now ete. A pramisi dati o meki sma kisi blesi fu têgo. A tori fu Abraham nanga Isak e leri wi wan tra sani fu Yehovah tu. Yehovah e yepi wi fu ferstan a pen di a ben o firi fu ferlusu den sma di tan getrow na en. Neleki fa Abraham ben de klarklari fu gi en manpkin di a ben lobi srefsrefi leki ofrandi, na so Yehovah ben de klarklari fu gi en wan-enkri manpkin, Yesus, so taki ala sma ben o man abi wan bun libi ini a ten di e kon (Yoh. 3:16). Sobun te wi e luku fa Abraham ben de klarklari fu gi a moro prenspari sani di a ben abi, dan dati e yepi wi fu ferstan o furu Yehovah lobi wi.
Neleki Abraham, wi bribi o kon moro tranga te wi e tan denki den sani di Yehovah taki èn du ini a ten di psa. Te a bribi fu wi kon moro tranga, dan wi o kon abi moro dek’ati tu. Wi no abi fu broko wi ede taki Yehovah o aksi wi fu du san a ben aksi Abraham fu du. Yehovah no aksi nowan tra sma fu du a sani dati. Ma wi kan de seiker taki, awinsi san Yehovah e aksi wi fu du, wi o abi a dek’ati fu du en efu wi abi bribi. Èn te wi du san a aksi wi, dan wi o kisi moro blesi leki san wi ben ferwakti.
Leisi a tori:
Prakseri a sani disi:
Na sortu fasi Abraham sori taki a abi dek’ati na ini a pisi ten disi fu en libi?
Diki moro dipi
1. Fa wi du sabi taki Abraham ben de wan sma di ben e libi trutru? (g 5/12 18, faki-wcgr; it „Abraham” ¶22-23-wcgr) 1
Prenki 1: Na tapu wan owruten skotu na Karnak, ini Egepte, wan sani skrifi fu a „gron fu Abram”
2. Fa Abraham ben kon leri sabi Yehovah Gado? (ia 29 ¶4-5)
3. Fu san ede Yehovah ben feni na anbegi fu Abraham bun? (rr 20 ¶18)
4. Fa a pramisi di Yehovah meki nanga Abraham na ini Genesis 22:17 e sori taki den sani di Bijbel e taki tru? (g88 8/4 25-wcgr) 2
Prenki 2
Prenki 2
San yu leri
Fa a howpu di Abraham ben abi yepi en fu abi dek’ati? Te wi e poti prakseri na a howpu fu wi, dan fa dati o yepi wi fu abi dek’ati? 3
Prenki 3
Fa wi kan abi dek’ati leki Abraham èn gi Yehovah san wi abi te wi . . .
abi na okasi fu ferteri sma fu Yehovah? (Hebr. 13:15)
musu besroiti fa wi o gebroiki den gudu fu wi? (Odo 3:9)
kon sabi taki wi brada nanga sisa abi yepi fanowdu? (Fil. 4:18)
Soleki fa wi si na ini a kapitel disi, dan na sortu tra fasi yu kan sori taki yu abi dek’ati leki Abraham?
Denki dipi
San a tori disi e leri mi fu Yehovah?
San a tori disi abi fu du nanga a wani fu Yehovah?
San mi ben o wani aksi Abraham noso Isak te den opo baka?
Sortu tra sani yu kan leri
Luku a span felem fu a tori disi.
Teki na eksempre fu sma di ben abi bribi—Abraham, Pisi 2 (11:10)
Fa Abraham tron wan bun mati fu Yehovah? Fa yu kan tron wan moro bun mati fu Yehovah?