Gebroiki Bijbel gronprakseri fu oefen yu konsensi

1-2. (a) Sortu kado Yehovah ben gi Adam nanga Eva? (b) Fa den ben musu sori taki den ben de nanga tangi gi a kado dati?

METI e du sani fu di Gado meki den fu du den sani dati. Furu masyin e wroko na wan spesrutu fasi fu di na fu dati ede sma meki den. Ma libisma de tra fasi. Di Gado meki wi, dan a gi wi wan kado di prenspari srefsrefi gi wi. A kado dati, na taki wi man teki wi eigi besroiti. Bijbel e taki dati Gado ben meki a fosi man, Adam, fu gersi en (Gen. 1:26, 27). Di Yehovah ben meki Adam nanga Eva, dan a gi den a grani fu teki den eigi besroiti.

² Yehovah no ben gi Adam nanga Eva wan lo wet. A ben taigi den nomo fu sorgu gi a grontapu, fu furu grontapu nanga den pkin fu den, èn fu lespeki a reti di a abi fu besroiti gi den san den ben mag du èn san den no ben mag du (Gen. 1:28; 2:16, 17). Te wi e luku ala den sani di Yehovah ben gi Adam nanga Eva, dan fu taki en leti, den ben musu de klarklari fu du wan tu simpel sani di Gado ben aksi fu den. Na so den ben o sori taki den lobi Yehovah èn taki den ben wani prisiri en ati.​—Odo 23:15.

3. Fa Adam nanga Eva gebroiki a grani di Gado ben gi den fu teki den eigi besroiti?

³ Soleki fa Bijbel e sori, dan Adam nanga Eva no gebroiki a grani dati na wan koni fasi. Na presi fu dati, den besroiti fu trangayesi Yehovah. Den ben teki a besroiti dati fu di den ben e denki densrefi nomo. Den no ben lobi Yehovah (Gen. 3:1-7). Te na a dei fu tide, wi e pina fu di den ben teki a besroiti dati.​—Rom. 5:12.

4. (a) Soleki fa Galasiasma 6:5 e sori, dan san wi alamala musu du? (b) Fu sortu tra kado wi o taki na ini na artikel disi?

⁴ Na ini a ten disi, a libi fu wi muilek srefsrefi fu di wi musu teki wan lo besroiti ibri dei. (Leisi Galasiasma 6:5.) Son besroiti di wi musu teki na simpel besroiti, ma tra besroiti moro muilek. Fa wi kan teki besroiti di o meki taki Yehovah breiti nanga wi? Wi musu ferstan fosi taki wi abi a yepi fu Yehovah fanowdu (Odo 16:3; Yer. 10:23). Srefi Yesus di no ben abi nowan sondu, ben sabi taki a ben abi a yepi fu Gado fanowdu (Hebr. 5:7). Wi na sondu libisma, dus wi abi a tiri fu Yehovah moro fanowdu leki Yesus. Meki wi poti prakseri now na wan tra kado di wi kisi fu Gado èn di o yepi wi fu teki bun besroiti. Dati na a konsensi fu wi.

SAN NA A KONSENSI?

5. (a) San na a konsensi? (b) Fa a konsensi fu wi e yepi wi? (Romesma 2:14, 15)

⁵ Gado gi libisma wan konsensi di e yepi den fu kon sabi san bun èn san no bun. Srefi wan sma di no sabi noti fu den wet fu Gado abi wan konsensi (2 Kor. 4:2). A konsensi fu wi de leki wan krutuman na insei fu wi di kan taigi wi efu san wi e denki noso e du bun noso ogri. (Leisi Romesma 2:14, 15.) A konsensi fu wi kan warskow wi so taki wi no e du wan sani di no bun (1 Sam. 26:8-11). Noso a kan gi wi dek’ati fu du san bun. A grani di wi kisi fu teki wi eigi besroiti, no wani taki dati Yehovah feni ibri besroiti di wi e teki bun. A konsensi fu wi musu yepi wi fu kon si efu wan besroiti di wi o teki bun noso efu a no bun.

6. Fu san ede a konsensi fu wi no e yepi wi ala ten fu teki koni besroiti?

⁶ Ma a de wan sari sani taki a konsensi fu wi no e yepi wi ala ten. Neleki fa wi abi fowtu, na so a konsensi fu wi abi en fowtu tu. A fasi fa wi kweki, a kulturu fu wi, èn den lostu fu a sondu skin kan abi krakti tapu a konsensi fu wi so taki a no e wroko bun. Bijbel e taki dati a konsensi kan kon „swaki”, a kan kon „doti”, a kan „dede neleki na wan faya isri bron en”, noso a kan kon „takru” srefi (1 Kor. 8:12; Tit. 1:15; 1 Tim. 4:2; Hebr. 10:22). So wan konsensi no o yepi wi moro fu teki bun besroiti. A de leki wan broko wegi di musu seti kon bun baka. Dati meki wi musu du tranga muiti fu kan abi wan konsensi di e wroko bun (1 Petr. 3:16). Fa wi kan du dati?

FA WI KAN OEFEN A KONSENSI FU WI

7-8. (a) Fa wi kan oefen a konsensi fu wi? (b) Fa Bijbel gronprakseri e yepi wi fu kon sabi san bun èn san no bun? Gi wan eksempre. (Luku a prenki.)

⁷ Fa wi kan oefen a konsensi fu wi? Wi musu abi a gwenti fu leisi Bijbel fu kon sabi san Yehovah feni bun èn san a no feni bun. Te wi e studeri den wet fu Yehovah, dan dati o yepi wi fu ferstan fa a e denki. Ma soleki fa wi si na ini na artikel na fesi, dan den wet fu en no e yepi wi na ini ala situwâsi. Dati meki wi musu suku gronprakseri na ini Bijbel, fu di den o yepi wi fu ferstan moro krin fa Yehovah e denki èn fa a e firi.​—Yes. 55:9.

⁸ Wi kan agersi a libi fu wi nanga wan waka di wi e teki na ini wan sabana pe sani no de di e sori wi a pasi. Kande wi o sabi pe wi musu go te wi e luku a son noso den stari. Ma a ben o moro bun fu abi wan karta di e sori wi sani na ini a sabana, soleki bergi noso liba, di wi o man si makelek. A karta dati ben o yepi wi fu de seiker taki wi e teki a yoisti pasi. Èn te wi no ben o teki a yoisti pasi, dan a karta ben o sori wi dati tu. Wi alamala e suku fu plisi Yehovah. Bijbel de leki wan karta di e sori wi krin fa wi kan du dati. Bijbel gronprakseri de leki den sani di wi e si na pasi èn di e sori wi pe wi musu go. Te wi e hori wisrefi na den gronprakseri dati, dan wi kan de seiker taki wi o doro pe wi musu go.

9. Sortu tra sani kan yepi wi fu oefen wi konsensi? (Romesma 9:1)

⁹ Efu wi wani taki a konsensi fu wi wroko bun, dan wi abi a yepi fu Yehovah en santa yeye fanowdu. (Leisi Romesma 9:1.) Santa yeye o yepi wi fu ferstan fa Yehovah e denki fu sani. A kan yepi wi èn a kan gi wi dek’ati fu du san Yehovah wani taki wi musu du (Fil. 2:13). Ma fa wi kan kisi yepi fu Yehovah en santa yeye?

10. Fa wi kan kisi yepi fu Yehovah en santa yeye? (Lukas 11:10, 13)

¹⁰ Begi fu kisi santa yeye. (Leisi Lukas 11:10, 13.) Wi kan de seiker taki Yehovah wani gi wi a santa yeye fu en (Yoh. 3:34). A de klarklari fu gi den wan di e gi yesi na en a santa yeye fu en (Odo 1:23; Yak. 1:5). Ma sortu tra sani o yepi wi fu oefen a konsensi fu wi?

11. (a) San musu de a moro prenspari sani gi wi? (b) Fu san ede wi musu sorgu taki a konsensi fu wi e wroko bun?

¹¹ Ala ten pruberi fu plisi Yehovah (Odo 8:34, 35). Disi musu de a moro prenspari sani gi wi. Te wi e suku fu plisi Yehovah nanga ibri besroiti di wi e teki, dan dati kan yepi wi fu oefen a konsensi fu wi. A konsensi fu wi o wroko bun te wi e denki leki Yehovah èn te wi e broko wi ede nanga a fasi fa a e firi. Te wi e luku fa a libi muilek na ini a ten disi, dan wi e kon si o prenspari a de taki wi konsensi e wroko bun. Nofo tron wi musu teki besroiti di abi fu du nanga sani di Bijbel no e taki fu den. Fu eksempre, wi musu besroiti san wi o luku noso san wi o arki te wi e relax, wi musu besroiti sortu skoroleri wi o teki, èn wi musu besroiti nanga sortu sma wi o abi demakandra. Dus fa wi kan de seiker taki Yehovah feni den besroiti bun di wi e teki na ini den sortu situwâsi disi?​—2 Kor. 1:12.

12. San o yepi wi fu kon sabi efu a konsensi fu wi e yepi wi fu du san bun? (Efeisesma 5:10)

¹² Denki dipi fu den sani di yu e leisi na ini Gado Wortu (Ps. 49:3). Te yu e leisi Bijbel, dan suku gronprakseri di kan yepi yu fu kon ferstan fa Yehovah e denki fu sani. (Leisi Efeisesma 5:10.) Te muilek problema e miti wi na ini a libi, dan wi musu suku gronprakseri na ini Bijbel di o yepi wi fu kon sabi efu a konsensi fu wi e yepi wi fu teki bun besroiti (Odo 2:4-9, 11-13). Den gronprakseri disi kan yepi wi fu oefen wi konsensi so taki wi kan tan gi yesi na Yehovah.​—Hebr. 5:14.

13. San wi no musu du te wi e teki besroiti? Gi wan eksempre.

¹³ No teki wan besroiti fosi yu kon sabi fa Yehovah e denki fu a tori. Wi no wani de leki den Israelsma di ben e libi ete na ini Yuda baka di Yerusalem kisi pori na ini 607 Fosi Krestes. Den ben taigi Yeremia: „Meki Yehovah yu Gado taigi wi sortu pasi wi musu waka èn san wi musu du” (Yer. 42:3-6). Ma den ben besroiti kba san den ben o du. Fu di den no ben lobi san Yehovah ben taigi den fu du, meki den no gi yesi na en, ma den du san den srefi ben wani du. A sani disi meki taki furu rampu miti den (Yer. 42:19-22; 43:1, 2, 4). Sobun, fosi wi teki wan besroiti, wi musu kon sabi sortu Bijbel gronprakseri e tyari kon na krin fa Yehovah e denki fu a tori èn san a wani taki wi musu du, èn baka dati wi musu du san wi leri.

14. Fu san ede wi musu hori a denki fu Yehovah na prakseri te wi e teki besroiti?

¹⁴ Teki besroiti di e kruderi nanga a denki fu Yehovah (Mat. 7:24-29; Yak. 1:23-25). Te wi e hori a denki fu Yehovah na prakseri te wi e teki besroiti, dan wi e meki a santa yeye yepi wi. Na so Yehovah o tan gi wi en santa yeye (Tori 5:32). Ma efu wi no e meki a santa yeye fu Yehovah yepi wi, dan wi ben kan meki a santa yeye „sari”, noso wi ben kan gens a yeye disi (Ef. 4:30; Yes. 63:10; Tori 7:51). Yehovah ben kan puru en yeye fu en na wi tapu srefi (Ps. 51:11; 1 Tes. 5:19). Dati ben o de wan bigi rampu gi wi fu di wi abi a krakti fu a santa yeye fanowdu.​—Ef. 3:16.

FA FU FENI BIJBEL GRONPRAKSERI DI O YEPI WI

15-16. (a) Fa wi kan feni Bijbel gronprakseri di o yepi wi? (b) Sortu Bijbel gronprakseri kan yepi wan Bijbelstudenti fu tapu nanga smoko?

¹⁵ Gebroiki den sani di wi kisi fu studeri Bijbel moro bun. Fosi wi kan fiti Bijbel gronprakseri, wi musu man feni den na ini Bijbel. Fu eksempre, kow taki dati a Bijbelstudenti fu yu no wani tapu nanga smoko. Kande a e denki: ’Bijbel no e taki noti fu smoko. Dus fa wi du sabi efu a no bun fu smoko?’ Fa yu kan yepi a studenti disi fu feni Bijbel gronprakseri di o yepi en fu ferstan taki a no bun fu smoko? Wan prenspari sani di yu kan gebroiki, na a buku Ondrosuku Bijbel moro fini​—Gi Yehovah Kotoigi. Yu kan sori yu studenti na edeprakseri di nen „Tabaka nanga smoko”. Drape a o si na artikel di nen „Fa Gado feni en te sma e smoko?” (Luku A Waktitoren fu 1 yuni 2014.) Te a leisi na artikel dati, dan sortu Bijbeltekst nanga gronprakseri a o feni?

¹⁶ Luku feifi fu den gronprakseri di kari na ini na artikel dati. (1) Wi no musu tron wan srafu fu wan sani di kan tyari dede kon gi wi (Rom. 6:16). (2) Wi musu wai pasi gi iniwan sani di kan pori wi skin (2 Kor. 7:1). (3) Yehovah wani taki wi musu dini en nanga wi heri libi (Mat. 22:37). (4) Wi no musu du sani di e tyari takru bakapisi kon gi trawan (Mat. 22:39; 1 Kor. 10:24). (5) Yehovah kan gi wi a krakti di wi abi fanowdu fu man du san bun (Fil. 4:13). Dus, aladi Bijbel no e taki noti fu smoko, tòg den gronprakseri di de fu feni na ini kan yepi yu studenti fu kon sabi fa Yehovah e denki fu a tori disi.

17. Fa wan brada nanga wan sisa di e seti sani fu trow kan feni Bijbel gronprakseri di o yepi den fu teki bun besroiti?

¹⁷ Fa wan brada nanga wan sisa di e seti sani fu trow kan feni Bijbel gronprakseri di o yepi den fu teki bun besroiti? Na Ondrosuku Bijbel-buku kan yepi den tu. Ondro na edeprakseri di nen „Trowdei nanga trowfesa”, wan lijst de nanga artikel di abi wan tu prenspari Bijbel gronprakseri na ini. Luku siksi gronprakseri di kan yepi wan brada nanga wan sisa di e seti sani fu trow. (1) Ala sani di e psa na a trow musu gi grani na Yehovah (1 Kor. 10:31, 32). (2) Den krosi di a trowpaar o weri musu fiti gi na okasi, den no musu meki sma naki futu (1 Tim. 2:9; 1 Petr. 3:3, 4). (3) Wi no musu de leki den sma fu a grontapu fu Satan di e du sma-ai sani (Yoh. 17:14; Yak. 1:27; 1 Yoh. 2:15, 16). (4) Ala sani musu orga bun (1 Kor. 14:40). (5) Na a trowfesa sma no musu dringi sopi teleki den drungu (Gal. 5:21). (6) Wan sma musu kisi a frantwortu fu teki fesi na a fesa.​—Yoh. 2:8, 9.

18-19. (a) San na ete wan sani di kan yepi wi? (b) Fa a buku disi kan yepi yu fu kon sabi sortu fesa fiti gi Kresten? (Luku a faki „Yu man si den gronprakseri?”)

¹⁸ Wan tra sani di yepi furu sma, na a buku Bijbelteksten voor ons leven als christen. A buku disi abi Bijbeltekst di fiti gi difrenti sortu situwâsi. Te yu feni a tori di yu wani ondrosuku, dan yu o si wan lijst nanga aksi nanga Bijbeltekst di kan yepi yu fu kon ferstan Bijbel gronprakseri. Fu eksempre, wan Kresten ben kan aksi ensrefi efu a bun fu go na wan spesrutu fesa. Na a edeprakseri „Feestdagen en vieringen”, a o feni na ondro-edeprakseri „Vieringen die christenen vermijden”.

¹⁹ Poti prakseri na wan tu fu den sani di skrifi na a pisi di nen: „Waarom is het verkeerd om feestdagen te vieren die een link hebben met valse religie? (1Kor 10:21; 2Kor 6:14-18; Ef 5:10, 11)” Na artikel e kari wan tu fesa di no fiti gi Kresten. Na a ondro-edeprakseri „Nationalistische vieringen” yu o feni wan lijst fu Bijbel gronprakseri. Den gronprakseri disi o yepi yu fu kon sabi efu wan Kresten kan teki prati na fesa di e hori fu memre sani di wan regering noso wan kondre du, na fesa di e gi grani na feti, noso na fesa di e gi libisma a grani di Yehovah w’wan musu kisi. Wi de nanga tangi trutru taki Yehovah en organisâsi gi wi den buku nanga den artikel disi di e yepi wi fu sorgu taki a konsensi fu wi e wroko bun.

SORI TAKI A KONSENSI FU YU E WROKO BUN

20. Fa wi kan sori taki a konsensi fu wi e wroko bun?

²⁰ Wi e warderi a grani di Gado gi wi fu teki wi eigi besroiti. Ma wi e ferstan tu taki wi musu du san de fanowdu fu sorgu taki a konsensi fu wi e wroko bun, fu di dati o yepi wi fu teki besroiti di Yehovah feni bun. Wan konsensi di e wroko bun o yepi wi fu teki besroiti di e gi Yehovah grani. Fu man du disi, wi o abi Yehovah en santa yeye fanowdu. Dati meki wi musu tan aksi Yehovah fu gi wi en santa yeye èn wi musu meki a yeye disi tiri wi. Bijbel gronprakseri o yepi wi tu fu sorgu taki a konsensi fu wi e wroko bun. Te wi e gebroiki den kado disi di Gado gi wi na wan bun fasi, dan wi o si fa Gado Wortu o yepi wi na ini wi libi.​—2 Tim. 3:16, 17; Hebr. 4:12.