Fisinet na ini Bijbel ten

Kande sma di e leisi Bijbel sabi ete taki sonwan fu den bakaman fu Yesus ben de fisman (Mark. 1:16-20). Den ben e gebroiki net fu fanga fisi na ini a Se fu Galilea.

Nofo tron sma ben e tai t’tei fu vlas kon na wan fu meki den net disi. Efu wan fisman ben wani fanga pkin fisi, dan a ben e meki wan net nanga pkin olo. Ma efu a ben wani fanga bigi fisi, dan a ben e meki wan net nanga moro bigi olo. Nofo tron sma ben e tai loto noso ston na den pkin net so taki den ben kan sungu go na ini a watra. Den bigi net ben abi hebi sani na ondrosei èn korku na tapsei.

Fisinet ben diri. Den ben kan priti te den ben fasi na ston di ben de na ini a se, noso te den fisi ben hebi tumsi (Luk. 5:6). Te Bijbel e taki dati Yakobus nanga Yohanes ben e „meki den fisinet fu den”, dan a kan taki den ben e gebroiki wan nanai nanga linnen t’tei (Mat. 4:21). A kan taki den fisman ben e du a sani disi ibri leisi baka te den ben go fisi. Lukas e taki tu fu fisman di ben e „wasi den fisinet fu den” (Luk. 5:2). Baka dati, den fisman ben e anga den net fu den fu drei. Kande den ben e du disi fu sorgu taki den net no ben e pori.​—Esek. 47:10.

Yesus ben aksi den man di ben gwenti gebroiki fisinet, efu den ben wani tron „fisiman di e fanga libisma”.