Den disipel fu Yesus ben abi dek’ati fanowdu. Fu san ede? Sonwan fu den ben gwe libi den oso, den famiri, nanga den bisnis fu den fu go waka baka Yesus (Mat. 19:27). Sma ben e du ogri nanga sonwan fu den, fu di den ben tron disipel fu Yesus (Yoh. 9:22). Den Kresten disi ben de klarklari fu tyari kenki kon na ini den libi èn fu nyan pina fu di den ben e bribi taki Yesus ben de a Mesias di Gado ben pramisi (Mat. 16:16). Ma di sma kiri Yesus, dan den disipel disi ben e sari srefsrefi èn den las’ati fu di den ben e denki taki den sani di den ben howpu na tapu no ben o kon tru. A no de fu taki dati Yesus ben e ferstan taki den disipel fu en ben o sari taki a dede, ma dati no wani taki dati a bribi fu den ben swaki. Dati meki a srefi dei di a kisi wan opobaka, a bigin gi den mati fu en dek’ati. Fu eksempre, a sori ensrefi na Maria Magdalena di ben e krei na a grebi (Yoh. 20:11, 16). A sori ensrefi tu na den tu disipel di ben e waka go na a foto Ema-us. Èn baka dati, a sori ensrefi na a apostel Petrus. w24.10 13 ¶5-6

P’pa nanga m’ma yepi yu pkin fu sabi fa fu ferklari gi trawan fu san ede a e bribi taki wan Mekiman de. Kande yu nanga yu pkin kan luku den artikel tapu jw.org di e taki fu den sani di Gado meki èn fu na evolutie-leri. Disi o yepi yu pkin fu sabi na sortu fasi a musu ferklari sani so taki sma man ferstan taki wan Mekiman de. Oefen nanga yu pkin san a kan taki. Gi en dek’ati fu hori en simpel efu wan sma wani taki nanga en fu a tori. Kande wan fu den pkin na skoro o taki: „Mi e bribi soso san mi man si nanga mi ai, èn noiti mi no si Gado.” Wan Kresten yonguwan ben kan piki: „Kow taki dati yu e waka na ini wan busi di de farawe fu a foto èn yu e si wan moi oso drape. San yu ben o denki? Yu no ben o denki taki na wan sma bow na oso disi? Na so a de tu nanga a planeiti fu wi nanga ala libisani na tapu. A de krin taki den sani disi no kon fu densrefi.” w24.12 18 ¶16

Wi alamala abi rai fanowdu fu man teki bun besroiti na ini a libi. Nofo tron wi kan kisi den rai dati fu owruman èn fu tra lepi Kresten. Efu den sma disi owru furu yari moro wi, dan wi no musu denki taki den rai fu den no e wroko moro. Yehovah wani taki wi e leri fu den owruwan. Den abi moro ondrofeni leki wi, den sabi moro wi, èn den koni moro wi.Na ini Bijbel ten, Yehovah gebroiki getrow owruwan fu tiri en pipel èn fu gi den dek’ati. Fu eksempre, Moses, David, nanga na apostel Yohanes ben e libi na difrenti ten èn den situwâsi fu den ben e difrenti fu makandra. Di den ben doro na a kba fu den libi, dan den gi sma di ben yongu moro den bun rai. Ibriwan fu den getrow man disi ben taki o prenspari a de fu gi yesi na Gado. Awinsi wi yongu noso owru, tòg wi kan kisi wini te wi e poti prakseri na a rai fu den.​—Rom. 15:4; 2 Tim. 3:16. w24.11 8 ¶1-2