David ben du wan seryusu sondu. Ma di a profeiti Natan taigi en fa Yehovah ben e si a sani dati, dan David no draidrai fu sori berow (Ps. 51:3, 4, 17). Kownu Heskia ben sondu tu teige Yehovah (2 Kron. 32:25). Ma neleki David, Heskia no draidrai fu sori berow (2 Kron. 32:26). Te wi e luku ala den sani disi, dan fa Yehovah ben e si Heskia? A ben e si en leki wan getrow kownu di „tan du ala sani di Yehovah feni bun”(2 Kow. 18:3). San wi e leri? Wi musu abi berow fu den sondu fu wi èn wi musu du ala san wi man fu no meki den srefi fowtu moro. Ma san wi musu du efu wi kisi rai fu den gemeente owruman, awinsi wi e denki taki a sani di wi du no seryusu so? Te wi e kisi rai, dan wi no musu denki taki Yehovah no lobi wi, noso taki den owruman de teige wi. Srefi den bun Kownu fu Israel ben e kisi rai nanga pir’ai (Hebr. 12:6). Sobun, te wi e kisi rai wi musu (1) sori sakafasi èn teki a rai, (2) wi musu tyari den kenki kon di de fanowdu, èn (3) wi musu tan dini Yehovah nanga wi heri ati. Efu wi abi berow fu den sondu fu wi, dan Yehovah o gi wi pardon​—2 Kor. 7:9, 11. w24.07 21 ¶8; 22 ¶9, 11

Te wan sma di du wan seryusu sondu weigri fu kenki den fasi fu en, srefi baka di den owruman pruberi omeni leisi fu yepi en, dan den o puru en fu a gemeente (2 Kow. 17:12-15). Den sani di a e du e sori taki a no wani gi yesi na den wet fu Yehovah (Deut. 30:19, 20). Den brada e meki bekènti taki a sma disi no de wan Yehovah Kotoigi moro. Den no e du dati fu di den wani gi a sma syen, ma den e du en fu sorgu taki a gemeente kan gi yesi na a rai di e taki dati den „no musu bumui nanga” a sma dati. Den no musu „nyan srefi nanga so wan sma” (1 Kor. 5:9-11). Bun reide de fu san ede Yehovah gi a komando dati. Na apostel Paulus ben skrifi: „Pikinso srudeki nomo e meki ala blon sweri” (1 Kor. 5:6). Te sma di du wan seryusu sondu e weigri fu sori berow, dan tra sma ben kan denki taki den no abi fu gi yesi na den komando fu Yehovah.​—Odo 13:20; 1 Kor. 15:33. w24.08 27 ¶3-4

Wi no abi krakti psa marki neleki Yehovah èn wi no man gi trawan krakti neleki fa en e du dati. Ma neleki Yehovah wi kan gebroiki a krakti fu wi fu yepi trawan. Fu eksempre, kande wi kan du wan tu sani gi wan brada noso wan sisa di owru noso di siki, noso kande wi kan go na wenkri gi den. Noso yepi fu krin a Kownukondre zaal èn fu hori en bun. No fergiti tu taki wi kan gi trawan dek’ati nanga den sani di wi e taki. Yu sabi wan sma di ben o firi moro bun te yu e taigi en taki yu e warderi san a e du? Yu sabi wan sma di abi trowstu fanowdu? Efu dati de so, dan meki a sma sabi taki yu e broko yu ede nanga en. Yu kan go luku a sma, yu kan bel en, noso kande yu kan seni wan karta, wan e-mail, noso wan app gi en. No broko yu ede tumsi nanga san yu o taki. Te yu e taki wan tu san di e sori taki yu lobi yu brada noso sisa, dan dati kan gi en dek’ati kba fu tan hordoro noso fu no las’ati na ini a situwâsi fu en.​—Odo 12:25; Ef. 4:29. w24.09 28 ¶8-10