Elia go na Akab èn a taigi en: „Kren go na tapu a bergi, dan yu nyan èn dringi wan sani, bika mi e yere wan hebi alen e saka kon” (Vers 41). Na ogri-ati kownu disi ben leri wan sani fu den sani di pasa a dei dati? A tori no e taki efu a leri wan sani, ma a tori no e sori wi taki Akab abi berow. A tori no e taki tu dati Akab aksi Elia fu begi Yehovah gi en, so taki a kan kisi pardon. Ma a sani di Akab ben du nomo, na taki a „ben go nyan èn dringi” (Vers 42). Ma san Elia ben du?

Elia ben sabi taki Yehovah ben o du wan sani heri esi, èn fu dati ede a seni a futuboi fu en go na wan hei presi fu pe a ben kan si bun fara. Drape a ben musu luku efu a ben e si iniwan sani na loktu di ben e sori taki alen ben o kon. Di a futuboi drai kon baka, a taigi Elia: „Mi no e si noti.” A loktu ben krin, èn soleki fa a sori, nowan wolku no ben de fu si. Ma a pisi tori disi e sori wi wan aparti sani tu. Yu sabi san na dati? We, kande yu e memre ete taki Elia ben taigi Kownu Akab: „Mi e yere wan hebi alen e saka kon.” Fa a profeiti ben kan taki so wan sani, efu a no ben e si nowan wolku di ben e sori taki alen ben o kon?

Elia ben sabi taki Yehovah pramisi fu meki alen fadon. Leki profeiti di ben e teki presi gi Yehovah, a ben de seiker taki a Gado fu en o du san A taki. Elia ben e frutrow so furu tapu a sani di Yehovah taki, dati a ben de leki a ben e yere a hebi alen kaba. Kande dati e meki wi prakseri a sani disi di Bijbel e taki fu Moses: „A ben tan tanapu kánkan leki a ben e si a Sma di wi no man si nanga ai.” Yu e si Gado leki wan trutru sma tu? A du furu sani di e sori wi krin fu san ede wi kan poti so wan tranga bribi na en èn na ini den pramisi fu en.—Hebrewsma 11:1, 27.