1. San na Gado en nen èn fa wi du sabi taki a wani taki wi sabi en nen?

Na ini Bijbel Gado e taigi wi san na en nen. A e taki: „Mi na Yehovah. Dati na mi nen.” (Leisi Yesaya 42:5, 8.) Furu sabiman e taki dati a nen „Yehovah” na a vertaling fu a Hebrew nen di wani taki „A e meki kon tron”. Yehovah wani taki wi sabi en nen (Eksodes 3:15). Fa wi du sabi dati? A meki sma skrifi en nen moro leki 7000 leisi na ini Bijbel!a Yehovah na a nen fu „a tru Gado na hemel èn na grontapu”.​—Deuteronomium 4:39.

2. Fa wi musu anbegi Yehovah?

Fu di Yehovah na wi Mekiman, meki wi musu anbegi en wawan (Openbaring 4:11). Wi musu lobi en èn wi no musu gebroiki popki, prenki, noso tra sani fu anbegi en.​—Leisi Yesaya 42:8.

Na anbegi fu wi musu ’santa èn Yehovah musu feni en bun’ (Romesma 12:1). Disi wani taki dati wi musu libi leki fa a wani. Fu eksempre, den wan di lobi Yehovah e lespeki a trowlibi neleki en. Èn den no e du sani di no bun gi den gosontu. Den no e smoko, den no e gebroiki drugs èn den no e dringi tumusi furu sopi.a