Yu nen de na ini a „buku” fu Gado?

YEHOVAH e si a muiti di den anbegiman fu en e du fu gi yesi na en? Iya, a e si dati. Ma den bun sani di den e du èn den sani di den e taki fu prèise en a no den wán-enkri sani di a e si. A e si sosrefi te den e prakseri bun sani fu en. Ma san moro prenspari, na taki noiti Yehovah o frigiti a pipel fu en èn noiti a o frigiti den sani di den du. Fa wi kan de seiker fu dati? Den wortu di a profeiti Maleaki skrifi, e gi piki tapu na aksi dati.​—Leisi Maleaki 3:16.

Na ini a di fu feifi yarihondro F.K., di Maleaki ben e taki profeititori, dan a fasi fa sma ben e libi èn na anbegi fu den no ben bun srefisrefi. Den priester no ben e du a wroko fu den, furu sma bigin du towfruwroko, den ben e du sutadu, èn den ben e bedrigi trawan. Den sani disi no ben e gi Gado grani (Maleaki 2:8; 3:5). Ma aladi den takru sani disi ben e pasa, toku wan grupu Israelsma ben de di ben e tan du a wani fu Gado. San den ben e du?

„Den wan di abi lespeki gi Yehovah ben e taki nanga makandra”, na so Maleaki e fruteri. Te sma abi lespeki gi Gado, dan dati na wan bun sani. Dyaso Maleaki e taki fu Israelsma di ben abi bigi lespeki gi Gado èn dati meki den no ben wani du sani di a no feni bun. Luku taki den sma dati di ben lespeki Gado ben e „taki nanga makandra”. Soleki fa a sori, dan den ben e kon makandra fu taki bun sani fu Yehovah èn fu gi makandra deki-ati. Dati yepi den fu no lasi-ati èn fu no kon de leki den sma na den lontu di ben e du kruktudu.

Den Israelsma di ben e gi yesi na Yehovah ben e sori lespeki gi Gado na ete wan prenspari fasi: Den ben e „hori en nen na prakseri”. Wan tra Bijbel e taki dati den ben e „lespeki a nen fu En”. Den sma dati di ben abi lespeki gi Yehovah ben e gi grani na en, srefi nanga den sani di den ben e prakseri. Na ini den ati den ben e prakseri a bigi nen fu Yehovah, noso den ben e denki dipi fu a nen dati. Yehovah ben sabi san den ben e du?

Maleaki e taki: „Yehovah ben e poti prakseri na den èn a ben e arki den.” Fu taki en leti, Yehovah ben e kaka en yesi arki komoto fu en tanpresi di de hei na hemel, èn a ben e yere ibri sani di den anbegiman fu en ben e taki fu prèise en. A ben e poti prakseri tu na ala den sani di den ben e prakseri na ini den ati (Psalm 94:11). Ma a ben e du moro leki fu poti prakseri nomo na den bun sani di den ben e taki èn ben e prakseri.

„Yehovah gi a komando fu skrifi wan buku fu memre den” sma disi, na so Maleaki e taki. A buku dati e taki fu ala den sma di dini Yehovah nanga den heri ati. Luku taki Bijbel e kari en „wan buku fu memre” sma.a Dati e sori taki noiti Yehovah o frigiti den reti-ati anbegiman fu en èn a no o frigiti den sani di den du fu prèise en. Iya, a o memre ibri bun sani, ibri bun wortu, nanga ibri bun prakseri fu den. Ma wan reide de fu san ede Gado e memre den. A pramisi taki den wan di nen skrifi fu ala ten na ini a buku fu en, o kisi têgo libi.b​—Psalm 37:29.

A de wan trowstu gi wi fu sabi taki Yehovah e warderi ala den sani di wi e du fu dini en soleki fa a wani. Den wortu na Maleaki 3:16 musu meki wi prakseri a sani disi bun. A bun te wi e aksi wisrefi: ’Mi nen skrifi na ini a „buku” fu Gado?’ Efu wi wani taki dati pasa, dan ibri dei wi musu du sani, taki sani, èn prakseri sani di Yehovah o wani memre.