13. San Openbaring 18:7 e sori fu a fasi fa falsi Kresten bribi nanga den tra kerki na ini Babilon a Bigiwan, noso a huru-uma e denki fu densrefi?

¹³ A di fu dri sani na taki sma o krei èn kaw tifi. San o pasa baka te den engel tai a takru wiwiri na ini bondru? Luku fa a o de nanga den sma di yu kan agersi nanga a takru wiwiri. Yesus e taki: „Drape den o krei èn den o kaw tifi” (Mat. 13:42). A sani disi e pasa nownow? Nôno. Na ini a ten disi a huru-uma na ala den falsi bribi di de èn den falsi Kresten bribi de na ini tu. Te nanga now den falsi Kresten bribi disi e taki fu densrefi: „Mi e tiri leki umakownu èn mi masra no dede. Noiti mi o sari” (Openb. 18:7). Den falsi Kresten bribi feni taki na den abi a frantwortu fu taki fa sani musu pasa, den e taki srefi dati den de leki wan ’umakownu di e tiri’ den politiek tiriman. Na ini a ten disi, den wan di yu kan agersi nanga a takru wiwiri e dyaf, den no e sari. Ma dati o kenki.

14. (a) O ten èn fu san ede falsi Kresten o „kaw tifi”? (b) Now di wi kon frustan Mateyus 13:42 tra fasi, dan fa disi e kruderi nanga san skrifi na ini Psalm 112:10? (Luku „Ete wan tu prenspari sani”.)

¹⁴ Na a ten fu a bigi banawtu, baka te ala falsi bribi kisi pori, den sma di ben de fu den kerki dati o lon go suku kibri, ma den no o man feni wan presi fu kibri (Luk. 23:30; Openb. 6:15-17). Te den si taki den no man wai pasi gi a pori di den o kisi, den o krei fu di den no sabi san fu du èn den o „kaw tifi” fu di den ati o bron. Yesus fruteri na ini a profeititori fu a bigi banawtu taki na a muilek ten dati den „o sari”.​—Mat. 24:30; Openb. 1:7.e

15. San o pasa nanga den bondru takru wiwiri èn o ten disi o pasa?

¹⁵ A di fu fo sani na taki den o iti a takru wiwiri go na ini a faya onfu. San o pasa nanga den bondru takru wiwiri? „Den engel o iti den go na ini a faya onfu” (Mat. 13:42). Dati wani taki dati den o kisi pori krinkrin. Sobun, sma di ben de na ini den falsi bribi o kisi pori na a lasti pisi fu a bigi banawtu. Dati o de na ini Armagedon.​—Mal. 4:1.