Yu „wani” yepi trawan?
1 Yesus ben e broko en ede trutru nanga sma. Di wan gwasiman ben begi Yesus fu yepi en, dan Yesus ben langa en anu, a ben fasi a man, èn a ben taki: „Mi wani. Kon krin” (Mark. 1:40-42). Fa wi kan sori a srefi fasi fu Yesus te wi musu yepi trawan?
2 Sma di wani sabi moro fu Bijbel: Ibri memre fu a gemeente musu yepi sma di wani sabi moro fu Bijbel so taki den kan tron anbegiman fu Yehovah. Te nyunwan e kon na den konmakandra, dan taki den odi èn kon leri sabi suma na den. Suku okasi fu gi den deki-ati. Prèise den gi den komentaar di den e gi. Prèise den fu den muiti di den e meki fu fiti Bijbel gronprakseri ini den libi. Yepi den fu frustan taki den kan feni tru mati na ini a gemeente.
3 Tra bribiman: Spesrutu „den wan di de na ini a srefi bribi leki wi” na den sma di abi wi yepi fanowdu nanga ala sortu sani (Gal. 6:10). Furu fu den e feti nanga problema di abi fu du nanga a gosontu fu den. Te yu e go luku den fu kan gi den deki-ati, dan den kan abi bun demakandra èn kande yu kan yepi den nanga tra sani tu. Sonwan kande abi fu du nanga tra problema ini a libi. Sori taki yu e broko yu ede nanga den fu di yu teki ten fu arki den èn fu gi den tranga (1 Tes. 5:14). A de fanowdu tu taki wi e wroko makandra nanga den owruman, te den e du a wroko fu den (Hebr. 13:17). Efu wi e sori taki wi de klariklari fu yepi trawan, dan wi kan ’de wan yepi di e gi tranga’ na tra bribiman.—Kol. 4:11.
4 Memre fu wi osofamiri: Wi musu broko wi ede srefisrefi nanga den memre fu wi eigi osofamiri tu, soleki fa Yesus ben e broko en ede nanga sma. Fu di papa nanga mama e broko den ede trutru nanga den pikin fu den, meki den „tan kweki den na ini a trangaleri èn a seryusu frumane fu Yehovah” (Ef. 6:4). Den pikin kan de wan yepi te den e sreka densrefi wantewante te a yuru doro gi na osofamiri studie, gi den gemeente konmakandra noso gi a preikiwroko. Pikin di bigi kaba kan sori a srefi sari-ati di Yesus ben abi nanga sma, te den e yepi a papa nanga mama fu den na wan switi fasi fu kakafutu gi den problema fu den di e kon fu di den kon owru. Na a fasi disi èn nanga tra sani di wi kan du, wi alamala kan ’gi wisrefi na ini a dini fu Gado ini wi eigi osofamiri’.—1 Tim. 5:4.
5 Te wi e yepi trawan neleki fa Yesus ben e du dati, dan kande wi e meki den problema di trawan abi kon moro mendri, èn wi e yepi wi osofamiri nanga a gemeente fu kisi wan moro bun matifasi nanga makandra. San de moro prenspari, na taki wi e gi grani na Yehovah, „a Tata fu safu sari-ati fasi”.—2 Kor. 1:3.