Soifri sabi fu Gado èn fu en manpikin e tyari sma go na libi
„Disi wani taki tego libi, dati den teki doronomo sabi na ini den fu yu, na wan enkri tru Gado, èn fu en di yu ben seni kon, Yesus Kristus.” — YOHANNES 17:3.
1. Fu san-ede soifri sabi fu Gado nanga Yesus Kristus de so prenspari?
SOIFRI SABI fu Gado èn en Manpikin Yesus Kristus, de prenspari gi den sma di wani tego libi. „[Gado] wani de dati ala sortu fu sma kisi ferlusu èn kon na wan soifri sabi fu na waarheid” (1 Timóteus 2:4). Sowan sortu sabi fu na Wortu fu Gado di skrifi nanga santa yeye, na bijbel, sa sreka unu fu sabi suma na Gado èn san den ferplekti fu wi de na fesi fu en (2 Timóteus 3:16, 17; 1 Yohannes 2:17). A sa yepi wi fu kon sabi Yesus Kristus èn fu kon sabi san a matifasi fu wi mu de nanga en. — Psalm 2:12; Filipi 2:5-11.
2. San a mankeri fu soifri sabi kan abi leki bakapisi?
2 Sondro soifri sabi dan falsi leri di a gensman fu Gado Satan a Didibri di de „wan leiman èn na tata fu na lei” ben meki du kon ben sa kan kisi wi (Yohannes 8:44). Efu wan leri de di e taki kontrari a Wortu fu Gado, efu a de wan lei, dan efu wi sa bribi èn leri sma a leri dati dan wi ben sa tyari Gado kon ini ferleigi èn srefi kon tanapu kontrari en. Fu dat’ede meki wi mu ondrosuku na bijbel soifri fu kan si waarheid fu lei (Tori fu den Apostel 17:11). Wi no wani de leki den sma di „alaten e leri èn toku noiti kan kon na wan soifri sabi fu na waarheid”. — 2 Timóteus 3:1, 7.
3. San na a krin bijbelleri di e go fu Gado, Yesus Kristus nanga na santa yeye?
3 Soleki wi ben si na ini na tra artikel, dan na leri fu na Dri-wan-fasi no de wan bjbel leri. Gado e ferteri wi na ini en eigi Wortu krin dati en de na Mekiman fu ala sani èn dati na fosi mekisani na ini hemel ben de en Manpikin (Openbaring 4:11; Kolosse 1:15, 16). Gado ben seni en Manpikin leki wan libisma kon na grontapu fu gi na ferlusu-ofrandi, di ben sa de leki wan fundamenti ini na gi pardon fu na sondu fu na libismafamiri, èn ooktu fu leri opregti sma morofara fu Gado èn den prakseri fu en (Mattéus 20:28; Yohannes 6:38). Toku na eenvoudig krin leri, dati Gado nanga Kristus de tu aparti sma, èn dati na santa yeye no de wan sma, ma Gado wroko krakti na ini den hondrohondro yari sma ben kenki. Na presi fu dati dan na Dri-wan-fasi leri tron na fundamenti leri fu na kristenheid.
„Mi nanga na Tata na wan”
4. Fu san-ede san den kerki e taki fu Yohannes 10:30, no de yoisti?
4 Den kerki nofotron e teki Yohannes 10:30 ini wan muiti fu horibaka gi na Dri-wanfasi leri, aladi na ini na vers dati den no e taki fu wan di fu dri persoon. Yesus ben taki na ini na vers dati: „Mi nanga na Tata na wán.” Ma Yesus ben bedoel dati en srefi ben de Gado na Almaktiwan, soso na ini wan tra skin? Nono, dati no ben kan de so, fudi Yesus alaten ben taki dati a ben de Gado Manpikin, moro mendri leki en èn ben sa tan na ondro en. San Yesus ben bedoel dan ini Yohannes 10:30?
5, 6. (a) Na sortu fasi Yesus ben bedoel dati en nanga en papa ben de wán? (b) Sortu eksempre e gi ini a tori fu den disipel fu Yesus?
5 Yesus ben bedoel dati a ben de wan na ini denki èn na ini muiti nanga en Tata. Disi e kon a krin na ini Yohannes 17:21, 22, pe Yesus e begi na Gado ofu en disipel „alamala kan de wán, net soleki yu, Tata, de ini wanfasi nanga mi èn mi de ini wanfasi nanga yu, dati ooktu den kan de ini wanfasi nanga wi . . . sodati den mag de wan net soleki wi de wan”. Yesus ben begi efu ala en disipel ben mag tron wan sma? Nono, a ben begi efu den ben mag abi wanfasi, ofu den ben mag de netleki Yesus nanga Gado wan fu yeye èn muiti.
6 Nasrefi prakseri e kon a fesi na ini 1 Korinte 1:10, pe Paulus e fermane kristen ’dati den alamala mu taki ini akruderi nanga makandra èn dati pratifasi no mu de a mindri den, ma dati den de krosbei ini wanfasi nanga makandra ini asrefi yeye èn na ini nasrefi fasi fu denki’. Di Yesus ben taki dati en nanga en Tata ben de wan, a no ben bedoel sobun dati den ben de nasrefi sma, èn ooktu leki fa a no ben bedoel dati en disipel ben de asrefi sma di a ben taki dati den ben mu de wan.
Suma ben de „na Wortu”?
7. (a) San na kristenheid e taki fu Yohannes 1:1? (b) Fa wantron-wantron e kon na krin na ini Yohannes 1:1 dati den no e taki drape fu wan Dri-wan-fasi?
7 Ma san wi kan taki fu Yohannes 1:1, pe tanapu na ini na King James Version pe tanapu: „Na inl na bigin na Wortu ben de na Gado, èn na Wortu ben de Gado?” Yohannes 1:14 e ferteri wi dati ’na Wortu ben tron meti èn ben libi a wi mindri’. Na kristenheid e taki dati na „Wortu” disi (Griki: lo’gos), di ben kon na grontapu leki Yesus Kristus, ben de Gado na Almaktiwan srefi. Ma luku pikinso dati srefi na ini na King James Version e taki fu Yohannes 1:1 „Na Wortu ben de na Gado”. Wan sma di de na wan tra sma, no de asrefi sma leki na tra sma dati. Srefi na ini na vertaling disi den e sori wi sobun tu aparti sma. Boiti fu dati den no e taki kwetkweti fu wan di fu dri sma fu wan Dri-wan-fasi.
8. Fa wantu tra bijbelvertaling e vertaal na laatste pisi fu Yohannes 1:1?
8 Ma now na vertaling fu na laatste pisi fu Yohannes 1:1 ini na King James Version, dati na „Wortu ben de Gado”, tra vertaling e taki wan tra sani: Dyaso wantu fu den de:
1808: „èn na wortu ben de wan gado”. The New Testament, ini wan Improved Version, Upon the Basis of Archbishop Newcome’s New Translation: With a Corrected Text, Londen.
1864: „èn wan gado ben de a Wortu”. The Emphatic Diaglott fu Benjamin Wllson, New York èn Londen.
1935: „èn na Wortu ben de wan gado sma”. The Bible — An American Translation fu J.M.P Smith èn E.J. Goodspeed, Chicago.
1935: „na Logos ben de wan gado sma”. A New Translation of the Bible fu James Moffatt, New York.
1975: „èn wan gado (ofu: fu wan gadofasi) ben de na Wortu”. Das Evangelium nach Johannes van Siegfried Schulz, Göttingen, Doisrikondre.
1978: „èn fu wan gado fasi na Logos ben de”. Das Evangelium nach Johannes fu Yohannes Schneider, Berlijn.
1979: „èn wan gado na Logos ben de”. Das Evangelium nach Johannes fu Jurgen Becker, Würzburg, Doisrikondre.
Boiti fu dati na ini 1950 na New World Translation of the Christian Greek Scriptures, di na Watchtower Bible and Tract Society of New York, Inc. ben tyari kon a doro, ben vertaal na pisi dati nanga „èn na Wortu ben de wan gado”.
9. San tanapu na ini na Griki tekst fu na fositron di na zelfstandignaamwoord the’os (gado) de fu si na ini Yohannes 1:1, na fesi a wortu dati, san e meki wi si dati a abi fu du nanga na Almakti Gado?
9 Den sortu vertaling disi e kruderi nanga na grammaticale constructie fu Yohannes 1:1 na ini na Griki tongo? Iya, futru. Na ini Yohannes 1:1 tapu tu presi na Griki zelfstandig naamwoord The’os (gado) de fu si. Na fosi tron abi fu du nanga na Almakti Gado di na Wortu ben de na en — „èn na Wortu [lo’gos] ben de na Gado [wan vorm fu the’os]”. Na fosi the’os disi ben abi na en fesi wan vorm fu na Griki bepalend lidwoord ho. Na zelfstandig naamwoord the’os nanga na bepalend lidwoord ho na en fesi e sori tapu wan aparti sani, ini a geval disi na Almakti Gado — „èn a Wortu ben de [na] Gado”.
10. San e sori dati te na wortu the’os na ini Yohannes 1:1 de fu si na di fu tu tron, na lidwoord ho ben libi a wan sei?
10 Ma ini a laatste pisi fu Yohannes 1:1 den vertaling soleki na ini paragraaf 8 e vertaal na tweede the’os di kari (wan predikaatsnomen, wan zelfstandignaamwoord di den gebroiki predicatief) e vertaal nanga „gadofasi” ofu wan „gado” na presi fu nanga „Gado”. Fu san-ede? Fudi na di fu tu the’os de wan predikaatsnomen ini enkelvoud di tanapu a fesi na werkwoord èn no abi na bepalend lidwoord ho na ini Griki tongo. Na ini a vers disi sowan zinsconstructie e sori tapu wan aparti fasi ofu hoedanigheid fu na onderwrp. A e meki unu si krin na fasi fu na wortu, dati wani taki dati a ben abi „gadofasi”, „wan gado”, ma no de na Almakti Gado. Disi de ini akruderi nanga den furu tekst di e meki wi si dati „na Wortu” ben de na takiman fu Gado, di Gado ben seni kon na grontapu. Soleki fa Yohannes 1:18 e ferklari: „Nowan sma ben si Gado oiti; na wan enkri gebore „gado” [na Manpikin di na Almakti Gado ben meki na ini hemel], di ben na ini na borsupositie na a Tata, en dati [ben kon na grontapu leki na libisma Yesus èn] ben ferklari en [na Almakti Gado].”
11. Sortu bijbel eksempre de dati wan vertaler e poti a mindri na lidwoord „wan” pe na ini na Griki a no tanapu, èn fu san-ede disi e du?
11 Furu moro bijbeltekst de, pe den sma di e vertaal fu Griki go ini wan tra tongo e poti na lidwoord „wan” na fesi na predikaatsnomen aladi na ini na Griki tekst nowan lidwoord de. Na poti fu na lidwoord na ini na vertaling e meki na aparti fasi ofu hoedanigheid fu na zelfstandignaamwoord kon krin a fesi. Na ini Markus 6:49 fu eksempre, pe den disipel e si Yesus e waka tapu a watra, na King James Version: „den ben prakseri dati a ben de wan yeye [Griki: fan-ta’sma]”. Na Nyun Grontapuvertaling e vertaal na zinssnede disi moro soifri nanga: „A de wan sani di sori ensrefi!” Na asrefi fasi na yoisti vertaling fu Yohannes 1:1 e meki wi si dati na Wortu no ben de „Gado” ma „wan gado”.
12. Sortu eksempre fu wan srefi sortu gebroiki fu na onbepaald lidwoord „wan” wi e feni na ini Yohannes 8:44?
12 Tu srefi sortu eksempre wan sma e feni na ini Yohannes kapitel 8 vers 44. Te Yesus e taki fu Didibri dan a e taki drape: „En dati ben de wan kiriman di a ben bigin. . . en de wan leiman èn na tata fu na lei.” Net soleki na ini Yohannes 1:1 na ini na Griki tongo fu a bigin na predikaatsnomen ini den tu wortu („kiriman”, „leiman”) e de afesi na werkwoord èn a no abi wan bepalend lidwoord. Ini ala tu geval wan hoedanigheid ofu wan apartifasi fu Didibri e kon a fesi èn ini furu vertaling na ini modern tongo a de fanowdu fu poti na onbepalend lidwoord („wan”) fu tyari dati kon abra. Na so na King James Version e vertaal den wortu disi: „A ben de wan kiriman . . . a de wan leiman èn na tata fu dati.” — Luku ooktu Markus 11:32; Yohannes 4:19; 6:70; 9:17; 10:1, 13, 21; 12:6.
„Mi Masra èn mi Gado”
13, 14. Fa san-ede Thomas ben kan kari Yesus „mi Gado” sondro fu bedoel dati Yesus ben de Yehovah?
13 Trinitariërs (sma di e bribi ini wan Dri-wan-fasi) e teki ooktu Yohannes 20:28 fu hori baka gi san den e taki. Drape Thomas taigi Yesus Kristus: „Mi Masra èn mi Gado!” Soleki ben sori dya na tapsei problema no de taki Thomas e sori tapu Yesus leki wan gado. Dati ben sa de ini akruderi dati Yesus ini en libi bifo a ben tron libisma ben de wan gado, dati wani taki wan makti gado sma. Èn seiker a de dati fu sensi en dede èn opobaka go na hemel libi. Yesus srefi ben teki wan pisi fu den Psalm fu meki sma si dati makti sma den e kari leki „gado” (Psalm 82:1-6; Yohannes 10:34, 35). Na apostel Paulus ben taki dati „furu gado” èn furu „masra” ben de (1 Korinte 8:5). Srefi Satan den e kari „na gado fu na seti fu sani disi”. — 2 Korinte 4:4.
14 Kristus abi wan moro hei positie leki onvolmaakti libisma ofu Satan. Efu den disi den kan kari kaba „gado”, dan seiker na wortu wan gado kan gebroiki gi Yesus èn disi psa ooktu. Fu na aparti positie fu en te yu sa luku en nanga Yehovah meki Yesus de na „wan enkri gebore gado” (Yohannes 1:18), wan „Tranga Gado” (Yesaya 9:6) èn „wan gado” (Yohannes 1:1). A no ben de sobun wan sani di no ben fiti dati Thomas ben kari Yesus so. Thomas ben taki dati Yesus ben de wan gado gi en, wan gado makti sma. Ma a no ben taki dati Yesus ben de Yehovah, san ben de a reide fu san-ede Thomas ben taki „mi” Gado èn no „na” Gado.
15. Fa vers 31 fu Yohannes 20 e sori krin suma Yesus de?
15 Soso dri vers a baka dati na ini Yohannes 20:31, a bijbel e ferklari: „Ma den sani disi skrifi sodati yu mag bribi dati Yesus na Kristus, na Manpikin fu Gado.” Ala degedege puru a pasi fu san Thomas ben kan bedoel. Na bijbelskrifiman Yohannes taki krin dati Yesus de na Manpikin fu Gado no na Almakti Gado srefi.
A No de speri fu Gado
16. San den dyu e taki, èn fa Yesus e puru dati poti a wan sei?
16 Wan tra tekst di den kerki e gebroiki, na Yohannes 5:18. Drape tanapu dati den dyu ben wani kiri Yesus fudi en ben kari „Gado en eigi Tata, sodati a ben poti ensrefi speri fu Gado”. Suma ben taki dati Yesus ben meki ensrefi speri fu Gado? No Yesus. A e tyari disi kon a krin ini na vers di e kon direkt a baka (vers 19) fudi a e taki: „Na Manpikin no kan noti fu ensrefi, ma soso san ai si a Tata e du.” Yesus sobun no e taki dati en ben de na Almakti Gado ben de speri fu en. A ben sori den dyu dati den ben denki fowtu, dati en no ben de Gado, ma dati en ben de na Manpikin fu Gado èn leki Gado takiman no tapu en eigi srefi ben kan handri. Wi kan tyari kon na ini prakseri dati na Almakti Gado fu na Universum e taki dati no tapu en eigi srefi a kan du sani? Sobun, den dyu ben tyari wan kragi kon a fesi èn Yesus ben puru dati a pasi.
17. (a) San na krin kotoigi fu Gado eigi Wortu di skrifi ondro krakti fu santa yeye suma Yehovah, Yesus Kristus nanga na santa yeye? (b) San mu du nanga ibri tekst di sma di e bribi ini Dri-wan-fasi e sori a tapu ini wan muiti fu regtvardiki na bribi fu den?
17 Te yu luku ala sani finifini — na kotoigi fu Gado ini en eigi Wortu di skrifi ondro krakti fu santa yeye, na kotoigi fu Yesus èn na kotoigi fu den disipel fu Yesus — dan na bun furu buwijsmateriaal e sori dati na Almakti Gado èn Yesus Kristus de tu aparti persoon, Tata èn Manpikin. Na buwijsmateraal dati e meki wi si ooktu krin dati na santa yeye no de na di fu dri persoon fu no wan enkri Dri-wan-Fasi. Ma dati a de Gado wroko krakti. A de wan soso sani fu go puru tekst ini a verband fu den ofu fu pruberi fu drai den fu yepi na Dri-wan-fasi. Ala den sortu tekst disi mu tyari kon ini akruderi nanga na tra pisi fu na krin kotoigi fu na bijbel.
Fa na Dri-wan-fasi ben kan gro kon?
18. Pe na leri fu a Dri-wan-fasi komoto?
18 Te yu e luku bladzijde 18, „Historia gro fu na Dri-wan-fasi”, dan yu sa si dati na Dri-wan-fasi abi en rutu ini na heidendom. A no de wan bijbel leri, ma wan leri di na kristenheid ben teki na ini na di fu fo yarhondro. Ma langaten a fesi yu ben abi kaba dri-wan-fasi ini na owru Babylon, Egypte nanga tra kontren. Na kristenheid ben teki sobun wan heiden denki kon ini en leri. Disi ben pasa fudi na Romein keizer Constatijn, di no ben abi belangstelling ini san ben de ini na afersi disi waarheid, ma di ben wani wan moro tranga banti kon na ini en kownukondre fu heidensma nanga kristensma di ben fadon komoto fu na bribi, ben gi tranga fu dati. Na Dri-wan-fasi sobun no ben de kwetkweti wan gro fu wan kristenleri, ma ben de morofuru wan buwijsi dati na kristenheid ben fadon komoto fu den leri fu Kristus, èn ini a presi fu dati ben teki heiden leri abra.
19. Fu san-ede na Dri-wan-fasi leri ben gro kon?
19 Fu san-ede sowan leri ben sa gro kon? A de seker dati disi no ben dini den belang fu Gado fu e meki en Manpikin, èn en santa yeye kon bruya èn de wan sortu kibritori. Èn disi no ben dini libisma fudi den kon ini bruya. Omoro sma e kon ini bruya ini a tori fu Gado nan den prakseri fu en, omoro a de bun a a tra sei gi Satan na Didibri, na gensman fu Gado, ’na gado fu na grontapu disi’, di de bezig fu breni ’na yeye fu den sma di no e bribi’ (2 Korinte 4:4). A e kon bun gi den kerkifesiman, fu na kristenheid, fudi sowan leri e meki sma kon bribi dati soso theoloog kan ferstan den leri fu na bijbel. Disi e yepi den fu hori na gewoon pipel a den ondro.
20. (a) San na na eenvoudig waarheid fu na Dri-wan-fasi? (b) San na kisi fu soifri sabi sa wani taki gi wi?
20 Toku na waarheid fu na afersi disi de so eenvoudig dati wan pikin kan ferstan en. Wan pikin boi sabi dati en no de asrefi sma leki en papa, ma dati den de tu aparti sma. A so ooktu a de te a bjbel e taki dati Yesus Kristus de Gado Manpikin, dati de precies san a e bedoel. Dati na eenvoudig waarheid, aladi na Dri-wan-fasi leri no de dati. A de wan lei. Fu dat’ede a musu feni en bigin na a sma „di den e kari Didibri èn Satan, di e kori na heri grontapu pe libisma e libi a tapu” (Openbaring 12:9). Ma na eenvoudig waarheid di e gi kowru-ati èn di e go fu Gado, en Manpikin, Yesus Kristus èn Gado krakti santa yeye e fri sma komoto fu katibo na falsi leri di abi den rutu ini heidendom èn di Satan de na mekiman fu den. Soleki Yesus ben taigi opregti sukuman fu waarheid: „Unu sa sabi na waarheid èn na waarheid sa meki unu kon fri” (Yohannes 8:32). Kisi soifri sabi fu waarheid di kan fri sma èn fu handri tapu na gron dati, „wani taki tego libi”. — Yohannes 17:3.
San yu ben sa piki?
◻ Fu san-ede soifri sabi fu waarheid fu Gado nanga en Manpikin de so prenspari?
◻ San Yesus ben bedoel di a ben taki: „Mi nanga na Tata na wan”?
◻ Fa Yohannes 1:1 e meki wan difrenti a mindri a Wortu èn Gado?
◻ Fu san-ede Thomas nanga reti ben kan kari Yesus „mi Gado”?
◻ Fa na Dri-wan-fasi leri ben du kon, èn suma de a mekiman fu en?
[Faki na tapu bladzijde 10]
Historia gro fu na Dri-wan-fasi leri
The New Encyclopedia Britannica, 1985, Micropaedia, Deel 11, blz. 928, e taki fu na tori Dri-wan-fasi: „No na spesrutu fasi fa den ben taki fu a leri e kon na ini na Nyun Testamenti, èn ooktu Yesus nana en bakaman ben abi na prakseri fu taki teige na Sjema fu na Owru Testamenti: ’Yere, O Israël: Masra wi Gado na wán Masra’ (Deut. 6:4)”. Na Encyclopedia disi e taki ooktu: „Na leri gro ini a pisten fu difrenti yarhondro èn via furu strei ini denki. . . . na concilie fu Nicéa ini 325 ben poti na moro prenspari formule gi na leri dati ini en belijdenis dati na Manpikin ’de fu nasrefi skin leki na Tata’, aladi na concilie dati no e taki furu fu na santa yeye. . . . na a kaba fu na di fu fo yarhondro . . . dan na leri fu na Dri-wan-fasi na ini bigi ben kon ini na vorm di fu sensi a ten dati a ben abi alaten.”
Na New Catholic Encyclopedia, 1967, Deel 14, blz. 299 e erken: „Bifo na kaba fu na di fu fo yarhondro dan na formulering ’wán Gado na ini dri persoon’ no ben abi fasti futu èn no ben teki krinkrin ini na kristen libi èn na belijdenis fu na kristen bribi. . . . A mindri den apostolische tata noti ben de di e kon krosbei fu sowan denki ofu fruwakti ooktu.”
Na Dri-wan-fasi leri de sobun wan sani di no de fu bijbel ma di den ben teki officieel tapu na concilie fu Nicéa ini na yari 325 G.T. Na ini na leri wan heiden prakseri ben de di langa a fesi ben du kon na ini na owru Babylon nanga Eypte èn di ooktu ban de wan sani di sma ben bribi ini tra kondre. Na historiaskrifiman Wil Durant ben taki na ini The Story of Civilazation: Part III, blz. 595: „Na kristendom no ben puru na heidendom na pasi; a ben teki en kon ini ensrefi. . . . Fu Egypte den denki fu wan Dri-wan-fasi fu Gado ben komoto.”
Ini An Encylopedia of Religion, ondro redactie fu Vergilius Ferm, 1964, tapu den bladzijde 793 nanga 794 ondro na trefwoord: „Triade” den e kari baka makandra den dri-wan-fasi fu na fasi fu anbegi fu Babylon, Boeddha, Hindu, Noors, taoïst, nanga tra fasi fu anbegi, èn ooktu fu di fu na kristenheid. Leki eksempre den e taki taki ini India „na bigi triade (dri-wan-fasi) de Brahma, na Mekiman, Vishnu, na sma di e kibri sani, èn Shiva, na Sma di e pori sani. Den disi e teki presi fu na fasi fa a de fu sani e waka, net soleki na Dri-wan-fasi Anoe, Enlil nanga Ea fu Babylon e teki a presi fu den materiaal fu na de fu sani, loktu, watra, doti.”
Na British Museum na ini Londn abi na ini den sani di a tyari kon makandra sani pe dri-wan-fasi fu owrutrn marki a tapu soleki Isis, Harpocrates èn Nephthys fu Eypte. Wan buku fu wan fu den afdeling fu na museum disi e ferteri dati tapu owru gowtusani ben tanapu: „Fes’sei, den gado fu Egypte Horus-Baït (nanga ede fu wan havik), Buto-Akori (na sneki) èn Hathor (nanga ede fu wan todo). Na a bakasei, na Griki vers: ’Wán Baït, wán Hathor, wán Akori; na makti fu den disi na wan. Ferlusu, tata fu na grontapu, ferlusu, na drievormige gado!’ Na sofasi den sma e kon sabi den gado leki dri sori fu densrefi leki wán makti, kande seiker na songado.”
Na historia taki dati a de so dati na Dri-wan-fasi ben komoto fu heiden èn hondro-hondro yari kaba bifo Yesus ben kon na grontapu, den sma di ben de na ondro na krakti heiden filosofie èn ben fadon komoto fu na tru anbegi fu Gado, soleki Yesus nanga en apostel ben leri disi, ben meki na leri disi go na fesi baka na dede fu Yesus.
[Prenki na tapu bladzijde 7]
Yesus ben begi ofu en disipel ben kan de wán ini denki nanga muiti soleki en nanga en Tata ben de wán