Waktitoren LIBRARY TAPU INTERNET

„Arki mi meki mi ferteri unu san psa”

„Preiki finfini” fu Gado Kownukondre
- 11. Sortu rai den owruman gi Paulus èn san a ben musu du te a ben o teki a rai dati? (Luku san skrifi na ondrosei.)
  
  ¹¹ Sobun, aladi den sani di sma ben taki fu Paulus no ben tru kwetkweti, tòg den sani dati ben bruya furu Dyu Kresten ete. Dati meki den owruman gi Paulus a rai disi: „Wi abi fo man dyaso di meki wan sweri. Meki den go nanga yu, èn krin yusrefi makandra nanga den soleki fa a Wet e taki, dan yu gi den moni fu krebi den ede. Na so ala sma o sabi taki den sani di trawan ferteri fu yu no tru. Den o sabi taki yu e tyari yusrefi na wan fasi di fiti èn taki yu e gi yesi na a Wet.”—Tori 21:23, 24.c
  
  12. Di den owruman fu Yerusalem gi Paulus rai, dan fa a sori taki a ben man fiti ensrefi na sma èn taki a ben wani wroko makandra nanga den?
  
  ¹² Paulus ben kan taki dati a problema no ben abi fu du nanga den lei di sma ben ferteri fu en, ma taki a ben abi fu du nanga den Dyu Kresten di ben de nomonomo fu hori a Wet di Gado gi Moses. Ma a ben wani fiti ensrefi na trawan, solanga a no ben abi fu psa den gronprakseri fu Gado. Wan leisi a ben skrifi kba: „Gi den sma di e gi yesi na a Wet, mi kon de leki wan sma di e gi yesi na a Wet, aladi misrefi no abi fu gi yesi na a Wet. Na so mi kan yepi den sma di e gi yesi na a Wet” (1 Kor. 9:20). Ma a leisi disi Paulus du san den owruman fu Yerusalem taki èn a ben kon de „leki wan sma di e gi yesi na a Wet”. Na so fasi a gi wi na ini a ten disi wan moi eksempre di e sori taki wi musu wroko makandra nanga den owruman èn taki wi no musu de nomonomo fu du sani soleki fa wi srefi wani.—Hebr. 13:17.
  
  Paulus ben e lespeki a besroiti fu trawan, solanga dati no ben e psa Bijbel gronprakseri. Fa a de nanga yu?
  
  DEN BORGU FU ROME NANGA A WET FU DEN ROMESMA
  
  Den tiriman fu Rome no ben e bemui furu nanga a fasi fa den tiriman fu den difrenti kontren ben e seti sani. Nofo tron den Dyu ben e seti den eigi afersi soleki fa a Dyu Wet ben e taki. Den Romesma kon bemui nanga a tori fu Paulus soso fu di wan dyugudyugu opo kon na ini a tempel, san ben kan meki taki bruya kon na ini a foto.
  
  Den tiriman fu Rome ben abi furu makti na tapu den sma di no ben de borgu fu Rome èn di ben libi na ini den difrenti kontren pe a Gran Kownukondre Rome ben e tiri. Ma sani ben de tra fasi te den ben kisi fu du nanga den sma di ben de borgu fu Rome.f Wan borgu fu Rome ben abi a reti fu du son sani èn ala sma na ini a gran kownukondre ben lespeki a reti dati. Fu eksempre, lanti no ben gi primisi taki sma tai noso fon wan Romesma sondro taki den krutu en, noso leisi strafu gi en. Den ben feni taki nanga srafu w’wan, sma ben kan du den sani dati. Te wan granman fu wan kontren ben teki wan besroiti, dan wan borgu fu Rome ben abi a reti tu fu aksi a grankownu na ini Rome fu luku a besroiti dati baka.
  
  Difrenti fasi ben de fa wan sma ben kan tron wan borgu fu Rome. A foswan na te wan afo fu en ben de wan Romesma. Ma wanwan leisi wan grankownu ben e gi difrenti sma noso friman fu wan heri foto noso kontren a reti fu tron borgu fu Rome fu di den wroko gi a kondre. Wan srafu ben kan pai wan borgu fu Rome fu kon fri. Wan borgu fu Rome srefi ben kan meki wan srafu kon fri. Boiti dati, wan srudati di no ben de wan Romesma, ma di ben de na ini a legre fu Rome fosi, ben kan tron wan borgu fu Rome tu. Soleki fa a sori, dan na ini spesrutu situwâsi wan sma ben kan pai tu fu tron wan borgu fu Rome. Dati meki a legre-edeman Klaudiyus Lisias taigi Paulus: „Mi pai bun furu moni fu tron wan Romesma.” Paulus taigi en: „Ma mi dati gebore leki wan Romesma” (Tori 22:28). Sobun, a ben musu fu de so taki wan afo fu Paulus ben tron wan borgu fu Rome, aladi wi no sabi fa.
  
  f A kan taki na ini a fosi yarihondro furu borgu fu Rome no ben e libi na ini Yudea. Ma na ini a di fu dri yarihondro, ala sma na ini den difrenti kontren fu a Gran Kownukondre Rome kisi a reti fu tron borgu fu Rome.

„Arki mi meki mi ferteri unu san psa”

„Preiki finfini” fu Gado Kownukondre
- c Sabiman e taki dati den fo man disi ben sweri fu libi leki wan Nasireisma (Num. 6:1-21). A tru taki sma ben meki a sweri dati fu di den ben e hori a Wet di Gado gi Moses. Ma a Wet dati no ben de fanowdu moro. Tòg Paulus ben kan denki taki a no ben o fowtu efu den man disi du a sani di den sweri fu du gi Yehovah. Fu dati ede a no ben de wan fowtu sani di a gi den a moni fu krebi den ede èn di a go nanga den. Wi no sabi sortu sweri den man disi ben meki. Ma awansi fa a no fa, Paulus no ben o agri efu den man disi ben o tyari wan meti leki ofrandi (soleki fa den Nasireisma ben gwenti du) fu krin den fu sondu. Krestes en ofrandi di bun dorodoro ben meki taki den sortu ofrandi dati no ben o tapu a sondu fu wan sma moro. Awansi san Paulus du, wi kan de seiker taki a no ben o agri nanga wan sani di ben o meki a kisi konsensi fonfon.