Sori lobi gi den wan di de na ini nowtoe
KRESTEN abi a plekti nanga a grani foe sori lobi gi den brada nanga sisa foe den di de na ini nowtoe (1 Johanes 3:17, 18). Na apostel Paulus ben skrifi: „Meki wi doe boen gi ala sma, ma spesroetoe gi den wan di de na ini a srefi bribi leki wi” (Galasiasma 6:10). Wan brada di dini Jehovah pikinmoro fotenti jari kaba, no so langa pasa ben ondrofeni a lobi foe a kresten bradafasi na ini a pisi ten di en wefi ben siki èn dede baka dati. A e skrifi:
„Foe di mi ben sorgoe gi mi wefi na oso di a ben siki, meki mi no ben man doe grontapoe wroko pikinmoro toe moen langa. Mi ben kisi froelekti srefisrefi di den mati na ini a gemeente ben de klariklari foe kon jepi wi! Wi ben kisi foeroe presenti na moni sei — ’foe jepi nanga den extra kostoe’, soleki fa den karta di den seni makandra nanga dati ben taki — foe pai gi hypotheek, watra nanga faja, nanga tra kostoe.
Toe wiki bifo mi wefi dede, a kring-opziener foe wi ben kon loekoe wi èn ben gi wi deki-ati. A ben sori srefi den a-troesoe-gi di a gemeente ben o si na a kaba foe a wiki. Wi ben man arki den konmakandra nanga jepi foe a telefon — so srefi den velddienst konmakandra di a kring-opziener ben hori. Na wan foe den konmakandra disi, a ben meki ala sma di ben de drape gi a velddienst taki mi wefi odi, leki wan groepoe. So boen, ala di na skin sei a ben de en wawan, tokoe noiti a ben firi taki a ben de en wawan.
Ini wán joeroe baka di a dede, pikinmoro ala den owroeman ben de na mi oso. Moro leki wán hondro brada nanga sisa ben kon na a dei dati wawan. Njanjan ben kon ’na wan wondroe fasi’ na tapoe a tafra gi ala den sma di ben de drape. Mi no kan bigin froeteri foe ala den presenti di mi kisi, den fasi di sma ben sori firi gi mi, den trowstoe wortoe, nanga begi di ben seni go na Gado gi mi. Den ben gi mi tranga troetroe! Te foe kaba mi ben moesoe aksi den brada foe stòp foe sorgoe gi njanjan èn foe jepi krin na oso!
Tra presi de leki na ini Jehovah en organisâsi pe wi kan feni so wan fasi foe sori sari-ati, broko-ede nanga lobi, sondro taki sma ben prakseri den eigi boen nomo? Moro foeroe sma na ini a ten disi kan teri na wán anoe omeni troetroe mati den abi. Jehovah blesi wi nanga wan kefalek bigi famiri foe brada nanga sisa na jejefasi!” — Markus 10:29, 30.