San Bijbel e taki fu a trowlibi?

A piki fu Bijbel

Baka di Gado meki a fosi man nanga uma, a trow den. A wani taki wan man nanga wan uma di trow musu lobi makandra èn den musu tan na makandra fu ala ten. A trowlibi na wan bun seti tu fu kweki pikin.​—Genesis 1:27, 28; 2:18.

Gado wani taki trowpaar musu de koloku (Odo 5:18). Na ini Bijbel a e sori fa a wani taki a trowlibi musu de èn san trowpaar kan du fu abi wan koloku trowlibi.

Na ini na artikel disi wi o luku den tori disi

• Sortu wet Gado poti gi a trowlibi?

• San Bijbel e taki fu trowpaar di wani prati èn di wani brokotrow?

• Fa Gado feni en efu a trow fu yu no skrifi na lanti buku?

• Sortu frantwortu masra nanga wefi abi na ini a trowlibi?

• Gado feni taki ala trowpaar na ini a ten disi musu meki pikin?

• Bijbel kan yepi mi fu abi wan moro bun trowlibi?

• Bijbeltekst di e taki fu a trowlibi

Sortu wet Gado poti gi a trowlibi?

Sensi a bigin Gado ben seti a trowlibi gi wan man nanga wan uma (Genesis 2:24). Gado no feni en bun te wan sma abi moro leki wán patna, a no feni en bun te mansma e trow nanga mansma, te umasma e trow nanga umasma, èn a no wani taki sma e libi nanga makandra sondro taki den trow (1 Korentesma 6:9; 1 Tesalonikasma 4:3). Yesus ben leri den bakaman fu en fu hori densrefi na den wet di Gado poti gi a trowlibi.​—Markus 10:6-8.

Gado wani taki wan man nanga wan uma di trow musu tan na makandra fu ala ten. Te wan man nanga wan uma trow, den e pramisi makandra taki den o tan lobi makandra den heri libi langa. Gado wani taki den e du san den pramisi.​—Markus 10:9.

San Bijbel e taki fu trowpaar di wani prati èn di wani brokotrow?

Son leisi wan masra nanga en wefi no kan de makandra fu wan pisi ten. Fu eksempre, kande wan fu den musu go sorgu gi wan famiriman di siki èn di e tan na wan tra presi. Ma Bijbel no e gi trowpaar deki-ati fu prati fu di den abi problema na ini a trowlibi. Na presi fu dati Gado wani taki trowpaar musu meki sani bun baka nanga makandra.​—1 Korentesma 7:10.

Bijbel e sori taki wan sma mag brokotrow soso te en patna waka gi en (Mateyus 19:9). Dati meki efu wan masra nanga en frow bosroiti fu prati noso fu brokotrow aladi nowan fu den sribi nanga wan tra sma, dan den no mag trow nanga wan tra sma.​—Mateyus 5:32; 1 Korentesma 7:11.

Fa Gado feni en efu a trow fu yu no skrifi na lanti buku?

Gado wani taki Kresten musu hori densrefi na den wet di lanti poti gi a trowlibi (Titus 3:1). Dati meki trowpaar musu du ala muiti fu skrifi a trow fu den na lantibuku efu a situwâsi na ini a kondre e gi den pasi fu du dati. Te den e du dati, dan den e sori taki den e lespeki den tiriman nanga den wet di Gado poti gi a trowlibi.a

Sortu frantwortu masra nanga wefi abi na ini a trowlibi?

• Sani di den ala tu musu du. Wan masra nanga en wefi musu sori lobi nanga lespeki gi makandra (Efeisesma 5:33). Den musu hori den seksfiri fu makandra na prakseri èn den no musu sori lobifiri gi nowan tra sma (1 Korentesma 7:3; Hebrewsma 13:4). Efu den abi pikin, dan den musu wroko makandra fu kweki den.​—Odo 6:20.

  

  Bijbel no e taki fa trowpaar musu seti sani soleki a wroko di den o du èn a wroko di musu du na oso. Den kan bosroiti makandra san o moro bun gi na osofamiri fu den.

• Den frantwortu fu wan masra. Bijbel e taki dati „wan masra na a ede fu en wefi” (Efeisesma 5:23). Dati wani taki dati a musu teki fesi na ini en osofamiri èn a musu teki bosroiti di o tyari wini kon gi en frow nanga en pikin.

  

  A musu sorgu en osofamiri bun, a musu meki den firi taki a lobi den èn a musu yepi den fu abi wan bun matifasi nanga Yehovah (1 Timoteyus 5:8). A musu sori taki a e warderi den bun sani di en frow e du èn den moi fasi fu en. Wan fasi fa a kan du dati na te a e wroko bun makandra nanga en èn te a e aksi en fa a e firi noso denki fu son bosroiti di a wani teki (Odo 31:11, 28). Bijbel e taki dati wan masra musu tyari den frantwortu fu en nanga lobi.​—Kolosesma 3:19.

• Den frantwortu fu wan wefi. Bijbel e taki dati wan „wefi musu abi bigi lespeki gi en masra” (Efeisesma 5:33). Gado breiti te wan wefi e saka ensrefi ondro en masra fu di en na a edeman fu na osofamiri.

  

  Wan wefi musu yepi en masra fu teki bun bosroiti èn a musu horibaka gi en (Genesis 2:18). Bijbel e taki bun fu den wefi di e tyari a frantwortu fu den na ini na osofamiri na wan bun fasi.​—Odo 31:10.

Gado feni taki ala trowpaar na ini a ten disi musu meki pikin?

Nôno. Na ini a ten di pasa Gado ben taigi son anbegiman fu en fu meki pikin (Genesis 1:28; 9:1). Ma Kresten no de fruplekti fu meki pikin. Noiti Yesus taigi den bakaman fu en fu meki pikin. Èn nowan fu den disipel fu en ben taki dati trowpaar musu meki pikin. Trowpaar kan bosroiti srefi efu den wani abi pikin.

Bijbel kan yepi mi fu abi wan moro bun trowlibi?

Bijbel abi rai di kan yepi trowpaar fu bigin a trowlibi fu den bun. Bijbel abi rai tu di kan yepi den fu lusu problema èn fu no du sani di o tyari problema kon gi den.

Den rai na ini Bijbel kan yepi trowpaar fu . . .

• sori trutru lobi.​—1 Korentesma 13:4-7; Kolosesma 3:14.

• lusu trobi.​—1 Korentesma 10:24.

• arki makandra bun.​—Yakobus 1:19.

• sori lespeki gi makandra.​—Romesma 12:10.

• gi makandra pardon.​—1 Petrus 4:8.

• tan na makandra.​—Markus 10:9.

• abi pasensi.​—Efeisesma 4:2, 3.

• wroko nanga makandra.​—Preikiman 4:9.

• meki a lobi fu den kon moro tranga.​—Singi fu Salomo 8:7.