16, 17. (a) Fa Paulus ben kisi deki-ati fu du a diniwroko? (b) San wi musu du efu wi feni taki wan sani fu a Kresten diniwroko fu wi, e frede wi?

¹⁶ Paulus ben skrifi den Kresten na Tesalonika: „Baka di wi ben pina fosi èn den ben handri wi na wan syen fasi (soleki fa unu sabi) na Filipi, dan wi ben teki deki-ati nanga yepi fu wi Gado, fu fruteri unu a bun nyunsu fu Gado nanga furu strei” (1 Tesalonikasma 2:2). Fa sma „ben handri” Paulus nanga den kompe fu en „na wan wan syen fasi” na Filipi? Soleki fa son sabiman e taki, dan a Griki wortu di Paulus ben gebroiki e sori na tapu a hati di sma e hati a firi fu trawan, èn a handri di den e handri trawan na wan syen fasi noso na wan tumusi ogri fasi. Den tiriman fu Filipi ben fon den nanga tiki, den ben trowe den na strafu-oso, èn den ben poti den na ini bui (Tori fu den Apostel 16:16-24). San a hati sani dati ben du nanga Paulus? ¿Den sma fu Tesalonika, a tra foto pe Paulus ben musu go na a zendingwaka fu en, ben si taki a ben hari ensrefi puru dan fu di a ben kon frede? Nôno, a „ben teki deki-ati”. A ben kakafutu gi frede èn a ben tan preiki nanga deki-ati.

¹⁷ Fu pe a deki-ati fu Paulus ben komoto? ¿Fu ensrefi? Nôno, a ben taki dati a ben teki deki-ati „nanga yepi fu wi Gado”. Wan buku gi sma di e vertaal Bijbel e taki dati wi kan vertaal den wortu disi leki „Gado ben puru frede na ini wi ati”. So bun, efu yu no abi furu deki-ati fu du a diniwroko fu yu, noso wan sani fu a diniwroko e frede yu kande, dan fu san ede yu no e aksi Yehovah fu du a srefi gi yu? Aksi en fu puru frede na ini yu ati. Aksi en fu yepi yu, so taki yu kan teki deki-ati fu du a wroko. Boiti dati, du wan tu sani di kan yepi yu. Fu eksempre, sreka sani so taki yu kan wroko nanga wan sma di sabi du a sortu kotoigiwroko di e frede yu. Kande a abi fu du nanga bisnis kontren, stratiwroko, okasipreiki, noso fu gi kotoigi nanga telefon. Kande a patna fu yu sa wani gi yu na eksempre fosi. Efu dati de so, dan luku san a e du èn leri fu en. Ma baka dati, teki deki-ati fu pruberi en yusrefi.

18. Sortu blesi wi kan kisi te wi e teki deki-ati fu du a diniwroko fu wi?

¹⁸ Efu yu e teki deki-ati trutru, dan prakseri san kan de a bakapisi. Efu yu e horidoro èn yu e sorgu taki yu no e lasi-ati, dan yu kan ondrofeni moi sani te yu e taki fu a waarheid nanga sma, sani di yu no ben o ondrofeni te yu no ben o du disi. (Luku bladzijde 25.) A sa prisiri yu te yu sabi taki yu plisi Yehovah, fu di yu du wan sani di muilek gi yu. Yu sa kisi a blesi èn a yepi fu en te yu e kakafutu gi sani di e frede yu. A bribi fu yu sa kon moro tranga. Trutru, yu no kan meki muiti fu tranga a bribi fu trawan sondro taki yu e tranga yu eigi bribi tu.—Yudas 20, 21.

Den Ben Teki Deki-ati

A NO ala ten a makriki fu teki deki-ati fu du a preikiwroko. Fu taki en leti, na apostel Paulus ben taki dati wan leisi a ben du disi „nanga furu strei” (1 Tesalonikasma 2:2). ¿A ’strei’ fu du a preikiwroko warti a muiti? Wi no abi a dyaranti taki wi sa ondrofeni kefalek sani, ma a pipel fu Gado prisiri nofotron taki den ben teki deki-ati. Luku wan tu eksempre.

Wan umapikin fu aiti yari di nen Tara ben arki bun di a leriman fu en ben taigi a klas taki na ini a Di Fu Tu Grontapufeti, den sma na ini den Dyu strafuman kampu ben musu weri wan geri Stari fu David, so taki sma ben kan sabi suma na den. Tara ben aksi ensrefi efu a ben musu taki wan sani. „Mi ben begi ala di mi ai ben opo,” a e memre ete. Baka dati a ben sutu en anu go na loktu èn a ben taki dati Yehovah Kotoigi ben de na ini den kampu disi tu, èn den ben abi fu weri wan paars dri-uku. A leriman ben wani sabi moro èn a ben taigi Tara tangi. A sani di Tara ben taki, ben meki taki a ben man taki moro fara nanga a leriman, èn baka ten a leriman ben sori srefi a heri klas fu en a video Jehovah’s Getuigen — Stand­vastig onder nazi-terreur.

Na Guinea, West-Afrika, wan yongu preikiman di no dopu ete èn di nen Irène ben wani du a diniwroko fu en moro bun. A zendeling di ben studeri Bijbel nanga en ben gi en deki-ati fu pruberi prati den tijdschrift A Waktitoren nanga Ontwaakt! na tra studenti na skoro. Irène ben frede bika den pikin fu en klas no ben wani arki. Ma fu di a zendeling ben gi en deki-ati, meki Irène ben bosroiti taki a ben o go fosi na a studenti di ben gersi fu de a wan di ben o gens Irène moro leki den trawan. Irène ben fruwondru di na umapikin ben arki èn di a ben wani teki den tijdschrift trutru. Tra studenti ben teki tijdschrift tu. A mun dati, Irène ben prati moro tijdschrift leki san a ben prati na ini ala den feifi mun makandra di ben pasa na fesi.

Na Trinidad wan owruman ben frede fu go taki nanga na edemisi fu wan skoro fu sori en sortu waarde a tijdschrift Ontwaakt! abi fu gi sma leri. Ma toku na owruman ben teki deki-ati. A e taki: „Mi ben begi di mi ben doro a skoroprasi. Mi no ben man bribi di na edemisi fu a skoro ben prisiri trutru.” A ben teki wan Ontwaakt! di ben taki fu „Sortu Howpu Yonguwan Abi na ini a Ten Disi?” èn a ben agri srefi fu gebroiki en te a ben o gi les. Sensi a ten dati, a teki 40 tijdschrift di ben taki fu difrenti tori.

Di Vaughn ben de wan yongusma ete, dan ala ten a ben feni a preikiwroko wan muilek sani. „Mi ben senwe, den anu fu mi ben sweti, èn mi ben e taki esi-esi — mi no ben man taki moro safri.” Ma toku a ben tron wan furuten dinari. Toku a no ben makriki gi en ala ten fu taki. Wan dei, baka di a no ben abi furu koloku fu feni wan wroko, a ben wani gi kotoigi na wan sma na ini a loko, „so taki toku wan bun sani kan pasa na tapu wan takru dei”. Ma a ben frede fu taki nanga wan bisnisman di ben de na ini a loko di e waka ondrogron. A man ben gersi wan heihei man. Te fu kaba, a ben teki deki-ati fu taki nanga wan owru man na en sei. Den ben taki bun langa. „Yu na wan yongu sma, ma yu e poti so bun aksi”, a bisnisman ben taki, èn a ben aksi: „¿Yu na wan theoloog?” Vaughn ben piki: „Nôno, mi na wan Kotoigi fu Yehovah.” „O,” a man ben lafu. „Now mi e frustan.”

Ala den Kotoigi disi — èn heri ipi trawan — breiti taki den ben teki deki-ati fu preiki. ¿Yu o du a srefi?