A switi srefisrefi te den sma fu wi osofamiri lobi makandra èn te den e libi na ini wánfasi! Nofo tron, den Grikisma ben e gebroiki a wortu stor·geʹ fu taki fu a lobi di famiriman abi gi makandra. Kresten e pruberi fu sori lobi gi den memre fu na osofamiri fu den. Na ini wan profeititori, Paulus ben taki dati na ini den lasti dei, furu sma „no sa lobi trawan”.b​—2 Tim. 3:1, 3.

A de wan sari sani taki na ini a ten disi, furu famiriman no lobi makandra. Fu san ede so furu uma e puru bere? Fu san ede so furu sma no e poti prakseri na a papa nanga mama fu den di kon owru? Fu san ede moro nanga moro sma e broko trow? Fu taki en leti, sma e du den sani disi, fu di den no abi lobi gi den famiriman fu den.