10. (a) San Yehovah taigi den Israelsma na ini a mun Nisan fu a yari 1513 Fosi Krestes? (b) Fu san ede Moses du san Yehovah taigi en?

¹⁰ Na ini a mun Nisan fu a yari 1513 Fosi Krestes, Yehovah taigi Moses nanga Aron fu taigi den Israelsma wan tu aparti sani. Den ben musu teki wan gosontu manskapu noso bokoboko, den ben musu srakti en, dan den ben musu teki pikinso fu a brudu èn natinati den doropostu nanga dati (Eks. 12:3-7). San Moses du? Bakaten na apostel Paulus skrifi fu Moses: „Na fu di Moses ben abi bribi, meki a hori a Paskafesa èn a natinati den doropostu nanga brudu, so taki na engel fu Gado no ben o kon fu kiri den fosi pikin fu den Israelsma” (Hebr. 11:28). Moses ben sabi taki a ben kan frutrow Yehovah èn a ben bribi taki Yehovah ben o du san a pramisi di a taki dati a o kiri den fosi manpikin fu den Egeptesma.

11. Fu san ede Moses warskow den Israelsma?

¹¹ A kan taki di „na engel fu Gado” pasa na ini Egepte, den manpikin fu Moses ben de farawe na ini a kondre Midian (Eks. 18:1-6). Toku Moses du san Gado taki èn a taigi den osofamiri fu den Israelsma taki den fosi manpikin fu den ben kan lasi den libi. Moses ben lobi den kondreman fu en. Fu dati ede Bijbel e taki dati „wantewante Moses kari den owru man fu Israel èn a taigi den: ’Go teki skapu nanga bokoboko . . . èn srakti dati leki Paska-ofrandi.’”​—Eks. 12:21.

12. Sortu prenspari boskopu Yehovah taigi wi fu preiki?

¹² Nanga yepi fu engel, a pipel fu Yehovah e preiki wan prenspari boskopu di e taki: „Un frede Gado èn gi en glori, bika a yuru doro kaba taki a o krutu sma. Fu dati ede, anbegi a sma di meki hemel, grontapu, a se, nanga ala den presi pe watra e komopo” (Openb. 14:7). Now na a ten fu meki a boskopu dati bekènti. Wi musu warskow sma taki den musu komoto na ini Babilon a Bigiwan efu den ’no wani taki den rampu fu en kon na den tapu tu’ (Openb. 18:4). Makandra nanga den salfu Kresten, den „tra skapu” e begi sma di no sabi Gado fu „kon bun” nanga en.​—Yoh. 10:16; 2 Kor. 5:20.

13. San o meki taki un abi deki-ati fu preiki a bun nyunsu?

¹³ Wi sabi taki „a yuru doro kaba taki [Gado] o krutu sma”. Neleki Yehovah, na so wi e si a preikiwroko leki wan tumusi prenspari wroko di musu du nownow. Na ini wan fisyun na apostel Yohanes ’si fo engel e tanapu na den fo uku fu grontapu èn den e hori den fo winti fu grontapu bun steifi’ (Openb. 7:1). A bribi fu yu e meki taki yu man si fa den engel disi e hori den winti di o pori grontapu na a ten fu a bigi banawtu? Tan bribi na ini den pramisi fu Yehovah, dan yu o abi deki-ati fu preiki a bun nyunsu.