Jesus ben kan abi bribi na ini Gado?

Wan moeilek problema gi den sma di e bribi ini a Dri-wánfasi

„FA JESUS ben kan abi bribi? Jesus na Gado; a sabi èn a e si ala sani sondro foe a abi foe froetrow na tapoe iniwan tra sma. Bribi abi joisti na ini a froetrow di wan sma e froetrow na tapoe wan tra sma èn a erken di a e erken wan sani di sma no man si; foe dati ede, taki Jesus-Gado ben kan abi bribi, na wan sani di no kan srefisrefi.”

Akroederi wan Fransi theoloogman Jacques Guillet, dati na a moro prenspari prakseri foe a Lomsoe kerki. A froeklari disi e froewondroe joe? Kande joe ben prakseri taki, foe di Jesus na wan eksempre ini ala sani gi kresten, a moesoe de wan model ini bribi toe, di wi kan waka na baka dati. Efoe na so joe ben prakseri, dan joe no hori a Dri-wánfasi leri foe a krestenhèit na prakseri.

Na aksi ini a tori foe a bribi foe Jesus de troetroe wan dangra sani gi Lomsoe, Protestant, nanga Orthodox theoloogman di e bribi ini a Dri-wánfasi leki „a moro prenspari kibritori foe a kresten bribi nanga libi”.a Ma a no alamala e taki dati Jesus no ben abi bribi foe Jesus. Jacques Guillet e sori taki a de troe dati „a no kan kwetikweti foe no erken taki Jesus ben abi bribi”, ala di Guillet e erken taki, ini a tori foe Dri-wánfasi, a de wan „sani di e sori foe de kontrari makandra”.

A Fransi Jezuïet Jean Galot, èn so leki en, moro foeroe foe den theoloogman, e taki krin dati foe di Krestes na „troetroe Gado nanga troetroe libisma, . . . meki A no kan bribi ini ensrefi”. „Bribi abi na ini a froetrow di wan sma abi ini wan tra sma, no a froetrow tapoe ensrefi”, na so a tijdschrift La Civiltà Cattolica e taki, di e kon na doro baka ibri pisi ten. So boen, a sani di e hendri sma foe den erken a bribi foe Jesus dan, na a leri foe a Dri-wánfasi, foe di den toe prakseri disi de krinkrin kontrari makandra.

„Den Evangelie-tori noiti no e taki foe a bribi foe Jesus”, na so den theoloogman e taki. Foe taki en leti, den wortoe pi·steuʹo (abi bribi) nanga piʹstis (a bribi), di gebroiki ini den kresten Griki Boekoe foe bijbel, e sori moro foeroe tapoe a bribi di den disipel abi ini Gado noso ini Krestes, na presi foe a bribi di Jesus abi ini en hemel Tata. Wi moesoe kon na a bosroiti dan, taki a Manpikin foe Gado no ben abi bribi? San wi kan froestan foe den sani di a ben doe èn di a ben taki? San den Boekoe foe bijbel e taki?

Begi sondro bribi?

Jesus ben de wan man foe begi. A ben begi na ibri okasi — di a ben teki dopoe (Lukas 3:21); a heri neti bifo a ben froekisi den 12 apostel foe en (Lukas 6:12, 13); èn bifo a wondroe transfiguratie foe en na tapoe a bergi, ala di a ben de nanga den apostel Petrus, Johanes nanga Jakobus (Lukas 9:28, 29). A ben e begi di wán foe den disipel foe en ben aksi en: „Leri wi fa wi moesoe begi.” So boen a ben leri den a Begi foe Masra (a „Wi Tata-begi”) (Lukas 11:1-4; Mateus 6:9-13). A ben begi te a ben de en wawan èn a ben begi langa, froekoe mamanten (Markus 1:35-39); a ben begi na neti, na tapoe wan bergi, baka di a ben seni den disipel foe en gowe (Markus 6:45, 46); a ben begi makandra nanga den disipel foe en èn gi den disipel foe en (Lukas 22:32; Johanes 17:1-26). Ija, begi ben de wan prenspari pisi foe a libi foe Jesus.

A ben begi bifo a ben doe wondroe. Foe eksempre, bifo a ben opo en mati Lasarus baka foe dede: „Tata, mi e taigi joe tangi foe di joe jere mi. Foe troe, mi ben sabi taki joe e jere mi ala ten; ma foe na ipi sma di tanapoe lontoe dja, mi ben taki, so taki den ben kan bribi taki joe ben seni mi kon” (Johanes 11:41, 42). A djaranti di a ben abi, taki en Tata ben sa piki a begi dati, e sori a tranga foe a bribi foe en. A abi di a begi na Gado abi foe doe nanga a bribi di a abi na ini En, de krin foe si ini san Krestes ben taigi den disipel foe en: „Ala den sani di oenoe e begi èn e aksi foe den, abi bribi taki joe kisi den kaba.” — Markus 11:24.

Efoe Jesus no ben abi bribi, foe san ede a ben begi na Gado? A Dri-wánfasi leri foe krestenhèit di no gron tapoe bijbel, taki Jesus ben de libisma èn Gado na a srefi ten, e meki a de moeilek foe froestan a boskopoe foe bijbel. A e tapoe sma foe den froestan a eenvoudigfasi èn a krakti foe bijbel. Na soema a man Jesus ben kari? Na ensrefi? A no ben sabi taki en ben de Gado? Èn efoe a ben de Gado èn efoe a ben sabi dati toe, dan foe san ede a ben begi?

Den begi foe Jesus tapoe a lasti dei foe en libi na grontapoe, e gi wi wan moro dipi inzicht srefi na ini a tranga bribi di a ben abi ini en hemel Tata. A ben e sori howpoe èn wan tranga froewakti di a ben aksi: „Èn now, Tata, gi mi a glori na joe sei di mi ben abi na joe sei bifo grontapoe ben de.” — Johanes 17:5.

Foe di a ben sabi taki den moro moeilek tesi nanga a dede foe en ben de krosibei, meki a neti di a ben de ini a djari foe Getseimanei na tapoe na Olijfbergi, „a ben bigin firi sari èn a ben firi broeja troetroe”, èn a ben taki: „Mi sili de nanga dipi sari, te foe dede” (Mateus 26:36-38). Dan a ben kindi èn ben begi: „Tata, efoe joe wani, teki a beker disi poeroe foe mi. Ma tokoe, no meki mi wani pasa, ma a wani foe joe.” Dan „wan engel foe hemel kon na en èn ben tranga en”. Gado ben arki a begi foe en. Bika foe a dipi di den firi foe en ben dipi èn foe a tranga di a tesi ben tranga, meki „a sweti foe en ben kon tron leki dropoe broedoe di ben fadon na gron”. — Lukas 22:42-44.

San den pina di Jesus ben moesoe pina, a tranga di a ben abi fanowdoe, nanga den tranga begi foe en e sori? „Wan sani de seiker”, Jacques Guillet e skrifi, „Jesus ben begi, èn begi na wan prenspari pisi foe a libi foe en èn foe den sani di a e doe. A ben begi so leki fa libisma e begi, èn a ben begi gi a boen foe libisma. A de joisti so, taki Gado no e teki den begi foe libisma sondro foe den abi bribi. Gado ben sa teki den begi foe Jesus efoe Jesus no ben abi bribi?”

Ala di a ben e anga na a pina-oedoe leti bifo a dede, Jesus ben bari nanga wan tranga sten, ala di a ben kari wan psalm foe David. Dan, ini bribi, nanga wan tranga sten a ben bari wan lasti tranga begi: „Tata, na ini joe anoe mi e froetrow a jeje foe mi” (Lukas 23:46; Mateus 27:46). Parola del Signore, wan Italia vertaling di wan toe kerki meki makandra, e taki dati Jesus ’ben froetrow en libi’ na en Tata.

Jacques Guillet e froeteri: „Foe di den skrifiman foe den Evangelie-tori e froeteri wi foe a kiri di sma ben kiri Jesus na a kroisi, dan nanga a bari di a ben bari kari en Tata nanga jepi foe den psalm foe Israèl, den skrifiman foe den Evangelie-tori overtoigi wi taki a babari dati, a babari foe a wan-enkri Manpikin, wan babari foe troetroe banawtoe, wan babari foe dorodoro froetrow, na wan babari foe bribi, wan babari foe wan dede ini bribi.”

Te wan toe theoloogman e si a krin boeweisi disi foe bribi di e naki sma ati, dan den e proeberi foe meki wan difrenti na mindri bribi nanga „froetrow”. Ma so wan difrenti di den e meki, no abi en gron na tapoe den Boekoe foe bijbel.

Ma san den tranga tesi di Jesus ben hori doro na ondro, e tjari kon na krin troetroe foe a bribi foe en?

A „Sma di e meki a bribi foe wi kon boen dorodoro”, ben kon boen dorodoro

Ini a di foe 11 kapitel foe a brifi foe na apostel Paulus gi den Hebrewsma, a e taki foe a bigi wolkoe foe getrow man nanga oema foe a ten bifo Krestes. A e kaba a kapitel disi, foe di a e sori go na a moro bigi eksempre foe bribi di boen dorodoro: „Wi e hori wi ai boen na tapoe a Moro Boen Fesiman èn a Sma di e meki a bribi foe wi kon boen dorodoro, Jesus. Foe a prisiri di ben poti na en fesi a ben froedrage wan pina-oedoe, ben wisiwasi sjen . . . Hori ai boen na tapoe a sma di ben froedrage so wan genstaki foe a sei foe sondari teige den eigi belang, so taki oenoe no kon weri èn broko saka na ini oenoe sili.” — Hebrewsma 12:1-3.

Moro foeroe foe den theoloogman e taki dati a vers disi no e taki foe „a bribi foe Jesus persoonlijk”, ma na presi foe dati, foe en ròl leki a „sma di meki wan bigin nanga bribi noso di de a fondamenti foe dati”. A Griki wortoe te·lei·o·teś di de foe feni ini den wortoe disi, e sori na tapoe wan sma di e meki sani kon boen dorodoro, wan sma di e meki wan sani kon troe noso e kaba wan sani. Leki a „Sma di e meki wi kon boen dorodoro”, Jesus ben kaba a bribi foe di a kon di a ben kon na grontapoe, ben meki bijbel profeititori kon troe èn na so fasi a ben seti wan moro tranga fondamenti gi bribi. Ma disi wani taki dati a no ben abi bribi?

Den pisi foe a brifi gi den Hebrewsma di joe kan si ini a boksoe na tapoe bladzijde 11 no e meki wi tweifri srefisrefi. Jesus ben kon boen dorodoro, foe di a ben njan pina èn foe di a ben gi jesi. Ala di a ben de wan volmaakti sma kaba, tokoe den ondrofeni foe en ben meki en volmaakti èn boen dorodoro na ini ala sani, srefi ini bribi, so taki a kan abi ala den eigifasi leki Heipriester, foe a froeloesoe foe den troe kresten. A ben begi tranga na en Tata „nanga tranga babari nanga watra-ai”, a ben de „getrow” na Gado, èn a ben abi „frede gi Gado” (Hebrewsma 3:1, 2; 5:7-9). Den ben „tesi en na ala fasi”, soifri „neleki wi”, na so Hebrewsma 4:15 e taki, dati wani taki, leki iniwan getrow kresten di a bribi foe en de ondro „difrenti tesi” (Jakobus 1:2, 3). A de reidelek foe bribi taki den ben kan poti Jesus na ondro tesi „neleki” den bakaman foe en, sondro taki a ben kisi tesi foe en bribi na a fasi fa den bakaman ben kisi tesi?

Tranga begi, a gi di a ben gi jesi, a njan di a ben njan pina, den tesi, a getrowfasi, nanga a frede gi Gado, e kotoigi foe a volmaakti bribi foe Jesus. Den e sori taki a ben tron a „Sma di meki a bribi foe wi kon boen dorodoro”, soso baka di a ben kon boen dorodoro ini en eigi bribi. A de krin, taki a no ben de Gado a Manpikin, so leki fa a Dri-wànfasi leri e froeklari. — 1 Johanes 5:5.

A no ben bribi ini a Wortoe foe Gado?

A leri foe a Dri-wánfasi abi so wan krakti na tapoe a prakseri foe den theoloogman, taki den doro so fara taki den e tan na a denki dati Jesus „no kan bribi a Wortoe foe Gado èn a boskopoe di de na ini”, bika en, „leki a Wortoe foe Gado srefi, kan meki a wortoe bekènti wawan”. — Angelo Amato, Gesù il Signore, wan boekoe di abi a primisi foe kerki na ini.

Ma san a sori di Jesus ben sori doronomo go na den Boekoe foe bijbel, e sori wi troetroe? Dri leisi a ben teki sani di taki foe den Boekoe foe bijbel, di a ben kisi tesi. Na a di foe dri piki di a ben gi Satan, Jesus ben taigi Satan taki a ben anbegi Gado wawan (Mateus 4:4, 7, 10). Na difrenti okasi Jesus ben taki foe profeititori di ben abi foe doe nanga ensrefi, san e sori taki a ben abi bribi ini a kontroe foe den. (Markus 14:21, 27; Lukas 18:31-33; 22:37; teki gersi Lukas 9:22; 24:44-46.) Foe na ondrosoekoe disi wi moesoe kon na a bosroiti taki Jesus ben sabi den Boekoe foe bijbel di ben skrifi nanga jepi foe a santa jeje foe en Tata, a ben ondrow den ini bribi, èn a ben abi dorodoro froetrow ini a kontroe foe den profeititori di ben taki na fesi foe den tesi foe en, a pina di a ben sa njan, en dede, nanga na opobaka foe en.

Jesus, a model foe bribi di wi moesoe waka na baka

Jesus ben abi foe feti a strei foe a bribi te na a kaba, so taki a ben kan tan loyaal na en Tata èn foe ’wini grontapoe’ (Johanes 16:33). Sondro bribi a no kan srefisrefi foe wini so wan strei (Hebrewsma 11:6; 1 Johanes 5:4). A ben de wan eksempre gi den getrow bakaman foe en, foe di a bribi dati foe en ben wini. Foe troe, a ben abi bribi ini a troe Gado.

[Foetoewortoe]

[Faki na tapoe bladzijde 11]

Jesus, a „Sma di e meki kon boen dorodoro”, ben kon boen dorodoro

Hebrewsma 2:10: „A ben fiti taki a sma foe soema ede ala sani de èn di nanga jepi foe soema ala sani de, foe tjari foeroe manpikin kon na ini glori, foe meki a Moro Boen Fesiman foe a froeloesoe foe den kon boen dorodoro nanga foeroe pina.”

Hebrewsma 2:17, 18: „A ben moesoe foe kon de ini ala fasi leki den ’brada’ foe en, so taki a ben kan tron wan sari-ati nanga getrow heipriester ini ala sani di abi foe doe nanga Gado, so taki a kan gi wan zoen-ofrandi gi den sondoe foe a pipel. Foe di ensrefi ben pina di den ben tesi en, meki a man foe jepi denwan di den e tesi.”

Hebrewsma 3:2: „A ben de getrow na a Wan di ben poti en foe dati ede, so leki fa Moses ben de dati toe na ini na oso foe a Wan dati.”

Hebrewsma 4:15: „Wi no abi leki heipriester wan sma di no kan firi nanga wi ini den swakifasi foe wi, ma wan sma di neleki wi den ben tesi na ini ala fasi, ma sondro sondoe.”

Hebrewsma 5:7-9: “Ini den dei foe en libisma skin, Krestes nanga tranga babari èn watra-ai ben seni tranga begi èn so srefi faja begi go na a Wan di ben man froeloesoe en foe dede, èn Gado ben jere en foe a frede di a ben abi gi En. Ala di a ben de wan Manpikin, tokoe a ben leri foe gi jesi, foe den sani di a ben njan pina foe den; èn baka di a ben kon boen dorodoro, a ben tron a wan di kan gi têgo froeloesoe.”