Furu sma e syen fu taki fu seks. Ma Bijbel e taki fu seks èn a e sori taki seks a no wan fowtu sani. A bun fu sabi san Bijbel e taki fu a tori disi. Fu san ede? Fu di Bijbel komoto fu Yehovah a sma di meki wi èn di sabi san bun gi wi. Yehovah e leri wi fa wi musu tyari wisrefi èn fa wi kan de koloku fu têgo.

1. Fa Yehovah e denki fu seks?

Seks na wan kado fu Yehovah. A wani taki seks de wan prisiri sani gi wan man nanga uma di trow. Te wan trowpaar abi seks, den kan meki pikin. Te den abi seks, den e sori tu taki den lobi makandra. Dati meki Gado Wortu e taki: „Prisiri nanga a wefi di yu teki sensi yu yongu yari” (Odo 5:18, 19). Yehovah wani taki trowpaar musu tan nanga makandra. Den no musu waka gi makandra.​—Leisi Hebrewsma 13:4.

2. San na hurudu?

Bijbel e taki dati ’sma di e huru no o kisi a Kownukondre fu Gado’ (1 Korentesma 6:9, 10). Den Bijbel skrifiman di skrifi den Griki Buku fu Bijbel ben gebroiki a wortu porneya te den ben taki fu hurudu. A wortu abi fu du nanga (1) man nanga uma di abi seks nanga makandra aladi den no trowa, (2) mansma di abi seks nanga tra mansma noso umasma di abi seks nanga tra umasma, èn (3) sma di abi seks nanga meti. Te wi ’no e du hurudu’, dan dati e tyari wini kon gi wi èn wi e meki Yehovah prisiri.​—1 Tesalonikasma 4:3.

SORTU TRA SANI YU KAN LERI?

3. Du ala san yu man fu no du hurudu

Yosef, wan anbegiman fu Yehovah, ben weigri fu abi seks nanga wan uma di no ben de en frow. Leisi Genesis 39:1-12 èn taki fu den aksi disi:

• Fu san ede Yosef lon gowe?​—Luku vers 9.

• Yu feni taki Yosef teki wan bun bosroiti? Fu san ede yu taki dati?

FELEM: Lowe gi hurudu (5:06)

Yehovah no wani taki wi du hurudu. Leisi 1 Korentesma 6:18 èn taki fu den aksi disi:

• Sortu situwâsi kan meki taki wan sma du hurudu?

• Fa yu kan lon gi hurudu?

4. San o gi yu a krakti fu no du hurudu?

FELEM: Te yu e leisi Bijbel yu o abi a krakti fu no du hurudu (3:02)

• San a brada na ini a felem du di a si taki son sani di a ben e denki èn di a ben e du, ben kan meki taki a waka gi en frow?

Srefi sma di e dini Yehovah wan pisi ten kaba musu du muiti fu tan prakseri sani di krin. San o yepi yu fu no prakseri sani di no krin? Leisi Filipisma 4:8 èn taki fu den aksi disi:

• Sortu sani wi musu prakseri?

• Te wi e leisi Bijbel èn te wi e du a wroko fu Yehovah fayafaya, dan fa dati o yepi wi fu no sondu?

5. Den wet fu Yehovah bun gi wi

FELEM: No de leki wan sma di no abi frustan (9:31)

• Fa a yonguman poti ensrefi na ini wan muilek situwâsi?​—Luku Odo 7:8, 9.

• Odo 7:23, 26 e sori taki hurudu abi takru bakapisi. Efu yu no e du hurudu, dan sortu problema yu no o kisi?

• Te wi e libi wan krin libi, dan sortu blesi wi o kisi na ini a ten di e kon?

Den sani di Bijbel e taki fu homolibi e meki taki son sma e denki taki Gado no e firi gi den sma disi. Ma Yehovah na wan Gado fu lobi. A wani taki ala sma kisi têgo libi. Ma efu wi wani kisi a libi dati, dan wi musu libi soleki fa en e taki. Leisi 1 Korentesma 6:9-11 èn taki fu na aksi disi:

• Te yu luku a tekst, dan na soso a homolibi Gado no feni bun?

Efu wi wani taki Gado prisiri nanga wi, dan wi alamala musu tyari kenki kon. Sortu wini dati e tyari kon gi wi? Leisi Psalm 19:8, 11 èn taki fu den aksi disi:

• Yu feni taki den wet fu Yehovah bun noso yu feni taki den hebi tumusi? Fu san ede yu piki so?

SAN YU LERI?

Seks na wan kado di Yehovah gi wan man nanga wan uma di trow èn a wani taki a gi den prisiri.

Fa yu ben o piki den aksi disi?

• San na hurudu?

• San o yepi wi fu no du hurudu?

• Sortu wini wi e kisi te wi e hori wisrefi na den wet fu Yehovah?

TRA SANI DI YU KAN LUKU

Na ini na artikel disi yu o si fu san ede Gado wani taki wan man nanga wan uma musu trow, fosi den libi nanga makandra.

„San Bijbel e taki fu libi nanga makandra sondro fu trow?” (Web-artikel)

Bijbel e leri taki a homolibi no bun. Na artikel disi e sori fu san ede a sani disi no wani taki dati wi musu teige den sma di de homo.

„A fowtu fu de wan homo?” (Web-artikel)

Na ini na artikel disi yu o si fa den wet fu Gado di abi fu du nanga seks e kibri wi.

„Orale seks na seks trutru?” (Web-artikel)

Na ini na artikel „Den sori lespeki gi mi”, yu o si fu san ede wan man di ben de wan homo fosi, kenki en libi.

„Bijbel e kenki sma libi” (A Waktitoren, 1 april 2011)

Na ini son kulturu sma e bribi taki soso te wan sma trow a o de koloku. Toku wi e si taki son sma di trow no de koloku. Na a tra sei yu abi sma di de koloku, aladi den no trow. Bijbel e sori taki te wan sma trow, dan dati bun. Ma efu wan sma no trow, dan dati srefi bun.

1. Sortu wini a abi te yu no trow?

Bijbel e taki: „A sma di trow, e du bun, ma a sma di no trow, o du moro bun.” (Leisi 1 Korentesma 7:32, 33, 38.) Fu san ede Bijbel e taki dati sma di no trow e „du moro bun”? Sma di no trow no abi a frantwortu fu sorgu wan trowpatna. Dati meki den abi moro ten fu du sani gi Yehovah. Fu eksempre, sonwan fu den froisi go na wan tra presi fu yepi nanga a preikiwroko. Ma san moro prenspari na taki den abi moro ten fu du sani di o yepi den fu tron bun mati fu Yehovah.

2. Sortu wini a abi te yu trow?

Te wan sma trow, dan dati srefi e tyari wini kon. Bijbel e taki dati „tu sma moro bun leki wán” (Preikiman 4:9). A sani disi de so, spesrutu te wan trowpaar e du san Bijbel e taki. Sma di trow pramisi fu lobi makandra, fu lespeki makandra èn fu sorgu makandra. A sani disi e meki taki den no e frede taki den o prati fu pikinpikin sani ede. Wan tra sani na taki a trowlibi na wan bun seti fu kweki pikin.

3. Fa Yehovah e si a trowlibi?

Di Yehovah trow a fosi man nanga uma, a taki: ’Wan man o gowe libi en papa nanga en mama èn a o tai hori na en wefi’ (Genesis 2:24). Yehovah wani taki wan man nanga wan uma di trow lobi makandra èn taki den tan nanga makandra den heri libi langa. A trow kan broko soso te wan fu den waka gi a trawan. Efu wan sma en trowpatna waka gi en, dan Yehovah e gi en a reti fu bosroiti efu a o broko a trow (Mateyus 19:9).a Yehovah no feni en bun te wan sma abi moro leki wán trowpatna.​—1 Timoteyus 3:2.

SORTU TRA SANI YU KAN LERI?

4. Gebroiki yu ten bun te yu no trow

Yesus ben sabi taki sma di no trow kan du furu gi Yehovah (Mateyus 19:11, 12). Leisi Mateyus 4:23 èn taki fu na aksi disi:

• Yesus no ben trow. Fa a ben gebroiki en ten?

Neleki Yesus, Kresten di no trow kan gebroiki den ten fu du moro gi Yehovah. Disi o gi den furu prisiri. Prei a FELEM èn taki fu na aksi disi:

FELEM: Den wan di no trow èn di e horidoro (3:11)

• Fa sma di no trow kan gebroiki den ten na wan bun fasi?

Yu ben sabi a sani disi?

Bijbel no e taki o owru wan sma musu de fosi a man trow. Ma a e sori taki wan sma di wani trow ’no musu yongu tumusi’. Te wan sma yongu, dan den seksfiri fu en tranga èn dati kan meki en muilek gi en fu teki koni bosroiti.​—1 Korentesma 7:36.

5. Luku bun nanga suma yu e trow

Wan fu den moro prenspari bosroiti di yu o teki na fu luku nanga suma yu o trow. Leisi Mateyus 19:4-6, 9 èn taki fu na aksi disi:

• Fu san ede wan Kresten musu denki bun fosi a trow?

Bijbel kan yepi yu fu sabi sortu fasi wan bun trowpatna musu abi. Ma a moro prenspari sani na taki a sma musu lobi Yehovah.b Leisi 1 Korentesma 7:39 nanga 2 Korentesma 6:14. Baka dati taki fu den aksi disi:

• Fu san ede wi musu trow soso nanga wan sma di e dini Yehovah?

• Fa yu denki taki Yehovah o firi efu yu trow nanga wan sma di no lobi en?

6. Si a trowlibi leki fa Yehovah e si en

Na ini Israel fu owruten, son man ben broko trow fu pikinpikin sani ede. Leisi Maleaki 2:13, 14, 16 èn taki fu na aksi disi:

• Fu san ede Yehovah no lobi en te sma e broko trow aladi a patna fu den no du hurudu?

Prei a FELEM èn taki fu na aksi disi:

FELEM: A trowlibi musu tan fu ala ten (4:30)

• Efu yu trow nanga wan sma di no e dini Yehovah, dan san kan yepi yu fu abi wan bun trowlibi?

7. Hori yusrefi na den wet di Yehovah meki gi a trowlibi

FELEM: Yu kan gi yesi na den wet fu Yehovah di abi fu du nanga trow (4:14)

Leisi Hebrewsma 13:4 èn taki fu den aksi disi:

• Yu denki taki wi man hori wisrefi na den wet di Yehovah meki gi a trowlibi? Fu san ede yu taki dati?

Yehovah wani taki Kresten musu meki lanti sabi te den trow noso te den broko trow, fu di na ini furu kondre lanti e aksi dati fu sma. Leisi Titus 3:1 èn taki fu na aksi disi:

• Efu yu trow, a trow fu yu skrifi na lantibuku?

SAN YU LERI?

Solanga yu e libi soleki fa Yehovah wani, yu o de koloku awinsi yu trow noso awinsi yu no trow.

Fa yu ben o piki den aksi disi?

• Fa wan sma di no trow kan gebroiki en ten bun?

• Fu san ede Bijbel e taki dati wi musu trow soso nanga wan sma di e dini Yehovah?

• Te wi luku san Bijbel e taki, dan san na a wan-enkri reide fu san ede sma mag broko trow?

TRA SANI DI YU KAN LUKU

San a wani taki fu trow „soso nanga wan sma di de wan bakaman fu Masra”?

„Aksi fu leisiman” (A Waktitoren, 1 yuli 2004)

Luku tu syatu felem di o yepi yu fu teki bun bosroiti te yu wani trow.

Sreka gi a trowlibi (11:53)

Na ini a felem disi yu o si fu san ede wan brada feni taki den sani di Yehovah gi en warti moro den sani di a libi na baka.

Mi ben howpu ete taki a ben o tron wan Kotoigi (1:56)

San wan sma musu hori na prakseri fosi a prati noso a broko trow?

„Lespeki a trowlibi di Gado seti” (A Waktitoren, december 2018)