Na apostel Paulus ben skrifi den fosi yarihondro Hebrew Kresten taki: „Wan sabadei rostu libi abra ete gi a pipel fu Gado. Bika a sma di go na ini a rostu fu Gado, ensrefi rostu tu fu en eigi wroko, neleki fa Gado ben rostu fu di fu en. Fu dati ede, meki wi du ala muiti fu go na ini a rostu dati.”—Hebrewsma 4:9-11.

Efu wi kon baka na a sani di Paulus ben taki na ini Hebrewsma, dan a ben sori taki „wan sabadei rostu libi abra ete gi a pipel fu Gado,” èn a ben gi den tra Kresten a deki-ati fu du ala san den ben man fu „go na ini a rostu dati”. Disi e sori taki di Paulus skrifi den wortu disi, „a di fu seibi dei” fu a rostu fu Gado, di ben bigin so wan 4000 yari na fesi, no ben kon na wan kaba ete. A no sa kon na wan kaba tu te leki a prakseri fu Gado nanga a libisma famiri èn grontapu kon tru. Dati sa de na a kaba fu a Dusun Yari Tiri fu Yesus Krestes, di de a „Masra fu a sabadei”.—Mateus 12:8; Openbaring 20:1-6; 21:1-4.