Sembulo Lesembulelwa Johane
11 Nganikwa umhlanga lonjengendvuku,*+ futsi naku lengatjelwa kona: “Sukuma ukale indzawo lengcwele yelithempeli laNkulunkulu neli-al’thare kanye nalabo labakhonta kuyo. 2 Kodvwa libala lelingephandle kwalendzawo lengcwele yelithempeli lishiye ungalikali, ngobe linikwe tive, futsi titaligcobagcoba ngetinyawo lidolobha lelingcwele+ tinyanga letingu-42.+ 3 Ngitawubangela kutsi bofakazi bami lababili baphrofethe emalanga langu-1 260 bembetse tindvwangu temasaka.” 4 Laba bamelelwa tihlahla temncumo letimbili,+ netintsi tetibane letimbili,+ futsi beme embikweNkhosi yemhlaba.+
5 Nangabe kukhona lofuna kubalimata, kuphuma umlilo emilonyeni yabo ucedze titsa tabo. Nakukhona lotawufuna kubalimata, kufanele abulawe ngaleyo ndlela. 6 Baneligunya lekuvala sibhakabhaka*+ kuze imvula ingani+ ngalamalanga labaphrofetha ngawo, futsi baneligunya etikwemanti kuze bawagucule abe yingati,+ kanye neligunya lekushaya umhlaba ngayo yonkhe inhlobo yetinhlupho nobe kangakhi kuye ngekutsandza kwabo.
7 Nasebacedzile kufakaza, silwane sesiganga lesiphuma emgodzini longenamkhawulo sitawulwa nabo, sibancobe futsi sibabulale.+ 8 Tidvumbu tabo titawuba semgwacweni lomkhulu welidolobha lelikhulu, lelimelelwa yiSodoma neGibhithe, lapho iNkhosi yabo yabulawa khona elugodvweni. 9 Bantfu, tinhlanga, tilwimi netive batawutibuka letidvumbu tabo emalanga lamatsatfu nehhafu,+ futsi ngeke bavume kutsi letidvumbu tingcwatjwe. 10 Nalabo labahlala emhlabeni batawujabula, bahalalise, bephane netipho, ngobe labaphrofethi lababili bebahlupha labo labahlala emhlabeni.
11 Ngemuva kwalamalanga lamatsatfu nehhafu, umoya wekuphila lovela kuNkulunkulu wangena kubo,+ basukuma bema ngetinyawo, futsi labo labababona besaba kakhulu. 12 Beva livi lelikhulu livela ezulwini litsi kubo: “Yenyukelani lapha.” Ngako benyukela ezulwini ngelifu, netitsa tabo tababona.* 13 Ngaleso sikhatsi kwaba nekutamatama lokukhulu kwemhlaba, futsi incenye yinye kuletilishumi telidolobha yawa; bantfu labangu-7 000 babulawa ngulokutamatama kwemhlaba, labanye bona besaba futsi bakhatimulisa Nkulunkulu welizulu.
14 Sewendlulile maye wesibili,+ futsi maye wesitsatfu uta ngekushesha.
15 Ingilosi yesi-7 nayo yashaya licilongo layo.+ Kwevakala emavi lamakhulu ezulwini atsi: “Umbuso wemhlaba sewunguMbuso weNkhosi+ yetfu newaKhristu wayo,+ yona itawuba yinkhosi phakadze naphakadze.”+
16 Labadzala labangu-24+ lebebahleti etihlalweni tabo tebukhosi embikwaNkulunkulu, bakhotsama futsi bakhonta Nkulunkulu, 17 batsi: “Siyakubonga Jehova* Nkulunkulu, Somandla, loyo lokhona nalobekakhona,+ ngobe usebentise emandla akho lamakhulu, wacala kuba yinkhosi.+ 18 Kodvwa tive tatfukutsela, intfukutselo yakho nayo yefika, sefika nesikhatsi lesibekiwe sekutsi labafile behlulelwe, sefika nesikhatsi sekutinika umvuzo+ tinceku takho letibaphrofethi,+ kuhlanganise nalabangcwele kanye nalabo labesaba libito lakho, kusukela kulabancane kuye kulabakhulu, futsi sefika nesikhatsi sekubhubhisa labo labalimata* umhlaba.”+
19 Kwabese kuvulwa indzawo lengcwele yelithempeli laNkulunkulu ezulwini, nelibhokisi lesivumelwane labonakala kulendzawo lengcwele yelithempeli lakhe.+ Kwaba nemibane, kwevakala emavi, kwaba nekudvuma kwelitulu, nekutamatama kwemhlaba, kanye nesangcotfo lesikhulu.