Incwadzi Yekucala YemaKhosi

14 Ngaleso sikhatsi, Abiya indvodzana yaJerobowamu wahlatjwa kugula. 2 Ngako Jerobowamu watsi kumfati wakhe: “Ngicela usukume uhambe uye eShilo, ugcoke ngendlela yekutsi bangakuboni kutsi ungumfati wami. Ahiya umphrofethi ukhona lapho. Nguye lowakhuluma nami ngekutsi ngitawuba yinkhosi yalabantfu.+ 3 Hamba uye kuye, umphatsele tinkhwa letingu-10, emacebelengwane kanye nelijeke lelineluju. Yena utawubese uyakutjela kutsi yini letakwenteka kulomfana.”

4 Umfati waJerobowamu wenta njengobe indvodza yakhe imtjelile. Wasukuma wahamba waya eShilo+ futsi wafika endlini ya-Ahiya. Emehlo a-Ahiya besekabuke ndzawonye futsi angasaboni ngobe besekakhulile.

5 Kodvwa Jehova abesamtjelile Ahiya watsi: “Umfati waJerobowamu uyeta kuze abute ngendvodzana yakhe ngobe iyagula. Ngitakutjela kutsi umphendvule utsini.* Utatifihla kutsi ungubani.”

6 Ngekushesha nje Ahiya nakeva umsindvo wetinyatselo talomfati nakangena emnyango, watsi kuye: “Ngena mfati waJerobowamu. Utifihlelani kutsi ungubani? Ngitfunywe kutsi ngikutjele umlayeto lobuhlungu. 7 Hamba uyotjela Jerobowamu, utsi: ‘Naku lokushiwo nguJehova Nkulunkulu wema-Israyeli: “Wena ngakukhetsa kubantfu bakini kuze ngikwente umholi webantfu bami ema-Israyeli.+ 8 Ngabese ngiyawutsatsa umbuso endlini yaDavide ngawunika wena,+ kodvwa awukayilingisi inceku yami Davide, leyagcina imiyalo yami futsi yangilandzela ngayo yonkhe inhlitiyo yayo, yenta lokuhle emehlweni ami.+ 9 Kodvwa wena wente lokubi kakhulu kubendlula bonkhe lobalandzele, watentela nalomunye nkulunkulu netithico tensimbi* wangitfukutselisa,+ futsi wena ungishiyile.+ 10 Ngenca yaloko, ngiletsa inhlekelele endlini yaJerobowamu futsi ngitawucotfula* kuJerobowamu bonkhe bantfu labadvuna,* lokufaka ekhatsi ema-Israyeli ladzinga lusito nalabutsakatsaka. Ngitayishanyelisisa indlu yaJerobowamu+ njengobe kwenta umuntfu nakasusa emangcoliso aze aphele! 11 Noma ngubani lovela endlini yaJerobowamu lofela edolobheni, tinja titamudla; noma ngabe ngubani lofela esigangeni, tinyoni temazulu titamudla ngobe Jehova ukhulumile.”’

12 “Nyalo sukuma uhambe uye endlini yakho. Utawutsi nje nawubeka lunyawo lwakho edolobheni, lomntfwana afe. 13 Onkhe ema-Israyeli atamlilela, bese ayamngcwaba ngobe nguye kuphela emndenini waJerobowamu lotawungcwatjwa, futsi nguye kuphela endlini yaJerobowamu Jehova Nkulunkulu wema-Israyeli latfole kutsi kunalokutsite lokuhle kuye. 14 Jehova utatikhetsela inkhosi letawubusa ema-Israyeli, letawususa* indlu yaJerobowamu+ kusukela ngalelolanga kuchubeke, futsi sengilo namanje. 15 Jehova utawushaya ema-Israyeli futsi atawufanana nemhlanga lonyakatiswa ngemanti, utawusiphula ema-Israyeli kulelive lelihle lalinika bokhokho bawo,+ aphindze awente asakateke aze ayofika ngesheya kweMfula*+ ngobe sekente tinsika letingcwele*+ letitfukutselisa Jehova. 16 Utawalahla ema-Israyeli ngenca yetono letentiwa nguJerobowamu kanye naleto labangele ema-Israyeli kutsi atente.”+

17 Umfati waJerobowamu wabese uyasukuma uyahamba, waze wayofika eThisa. Watsi nakafika ebaleni lekubhulela lemuti wakhe, lomfana wafa. 18 Ngako bamngcwaba futsi onkhe ema-Israyeli amlilela njengobe Jehova bekashito ngenceku yakhe Ahiya umphrofethi.

19 Lomunye umlandvo waJerobowamu, indlela lalwa+ ngayo nendlela labusa ngayo, kubhaliwe encwadzini yemlandvo wangetikhatsi temakhosi aka-Israyeli. 20 Sikhatsi* sekubusa kwaJerobowamu saba yiminyaka lengu-22, ngemuva kwaloko wangcwatjwa lapho kwangcwatjwa khona bokhokho+ bakhe futsi indvodzana yakhe Nadabi yaba yinkhosi ngemuva kwakhe.+

21 Ngaleso sikhatsi, Rehobhowamu indvodzana yaSolomoni bekayinkhosi kaJuda. Bekaneminyaka lengu-41 ngesikhatsi aba yinkhosi futsi wabusa iminyaka lengu-17 eJerusalema, lokulidolobha lebelikhetfwe+ nguJehova kuto tonkhe tive taka-Israyeli kuze abeke libito lakhe kulo.+ Libito lamake waRehobhowamu bekunguNama um-Amoni.+ 22 EmaJuda bekenta lokubi emehlweni aJehova+ futsi tono latenta tamtfukutselisa kakhulu kwendlula leto lebetentiwe bokhokho bawo.+ 23 Nawo futsi achubeka atakhela tindzawo letiphakeme, nematje langcwele, netinsika letingcwele*+ kuwo onkhe emagcuma+ kanye nangephansi kwetihlahla letinkhulu.+ 24 Bekuphindze kube netingwadla letindvuna tasethempelini kulelolive.+ EmaJuda enta tonkhe tintfo letenyanyekako lebetentiwa nguletive Jehova lebekaticoshile embikwema-Israyeli.

25 Ngemnyaka wesihlanu wekubusa kweNkhosi Rehobhowamu, iNkhosi Shishaki+ yaseGibhithe yakhuphuka yayohlasela iJerusalema.+ 26 Yatsatsa umcebo endlini yaJehova nasendlini* yenkhosi.+ Yatsatsa konkhe, lokufaka ekhatsi emahawu eligolide lebekakhiwe nguSolomoni.+ 27 Ngako iNkhosi Rehobhowamu yakha emahawu ngelitfusi kuze avale sikhala salawa latsatfwa nguShishaki, yawanika tindvuna tabogadzi* labebagadza emasangweni endlu yenkhosi. 28 Noma nini lapho inkhosi ita endlini yaJehova, labogadzi bebawaphatsa, bese bawabuyisela endlini yabogadzi.

29 Lomunye umlandvo waRehobhowamu nako konkhe lakwenta, kubhaliwe encwadzini yemlandvo wangetikhatsi temakhosi akaJuda.+ 30 Bekunemphi lengapheli emkhatsini waRehobhowamu naJerobowamu.+ 31 Ngako Rehobhowamu wafa, wase ungcwatjwa lapho bekungcwatjwe khona bokhokho bakhe, eDolobheni laDavide.+ Libito lamake wakhe bekunguNama wesive saka-Amoni.+ Ngemuva kwekufa kwakhe, indvodzana yakhe Abijamu*+ yaba yinkhosi.