Sembulo Lesembulelwa Johane
18 Ngemuva kwaloku ngabona lenye ingilosi yehla ivela ezulwini ineligunya lelikhulu; umhlaba wakhanyiswa yinkhatimulo yayo. 2 Yamemeta ngelivi lelikhulu yatsi: “Iwile! IBhabhulona Lenkhulu iwile,+ futsi seyibe yindzawo yekuhlala yemadimoni nendzawo lapho kubhaca khona yonkhe imimoya* lengcolile kanye nato tonkhe tinyoni letingcolile naletenyanywako!+ 3 Tonkhe tive tidzakwe liwayini lenkhanuko* yebugwadla* bayo,+ emakhosi emhlaba agwadla nayo,+ nebatsengisi* bemhlaba banjingile ngenca yelizinga lekuphila kwayo ntofontofo ngephandle kwekudliwa ngemahloni.”
4 Ngeva lelinye livi livela ezulwini litsi: “Phumani kuyo bantfu bami,+ nangabe ningafuni kuhlanganyela nayo etonweni tayo, futsi ningafuni nekutfola incenye yetishayo tayo.+ 5 Ngobe tono tayo setincwabelene taze tefika ezulwini,+ naNkulunkulu utikhumbulile tento tayo letimbi.*+ 6 Yiphatseni ngendlela lebeyibaphetse ngayo labanye,+ netintfo letentile nani tenteni kuyo ngalokuphindvwe kabili;+ endzebeni+ lehlanganise kuyo liwayini, nani yihlanganiseleni kuyo ngalokuphindvwe kabili.+ 7 Ngelizinga letiphakamise ngalo yaphindze yaphila ntofontofo ngalo ngaphandle kwekudliwa ngemahloni, nani yihlupheni, niyente ilile ngalelo zinga. Ngobe enhlitiyweni yayo ihlale itsi: ‘Ngihleti njengendlovukazi, angisuye nemfelokati, futsi angiyoze ngilile.’+ 8 Kungaleso sizatfu tishayo tayo titawufika ngelilanga linye: kufa, kulila, nendlala; futsi itawushiswa ingcongce,+ ngobe Jehova* Nkulunkulu, lokunguye loyehlulele unemandla.+
9 “Emakhosi emhlaba lebekagwadla* nayo futsi aphila nayo ntofontofo ngaphandle kwekudliwa ngemahloni, ayawukhala aphindze alile nakabona intfutfu yekushiswa kwayo. 10 Ayawumela khashane ngobe esaba kuhlushwa kwayo, futsi atsi: ‘Kwaze kwaba kubi, kwaze kwaba kubi dolobha lelikhulu,+ Bhabhulona, dolobha lelinemandla, ngobe kwehlulelwa kwakho kufike ngeli-awa linye nje!’
11 “Nebatsengisi bemhlaba bayawukhala futsi balile, ngobe kutawube sekute lotawutsenga tonkhe tintfo tabo: 12 lokuligolide, lisiliva, ematje laligugu, emapharele, ilineni lecolisakele, indvwangu lenembala lobukhwebeletane,* isilika nendvwangu lebovu; tonkhe tintfo letentiwe ngesigodvo lesinemakha; nayo yonkhe inhlobo yetintfo letentiwe ngelitinyo lendlovu, ngesigodvo lesihle, ngelitfusi, ngensimbi, nangemabuli; 13 nesinamoni, sinongo saseNdiya, imphepho, emafutsa lanemakha, emakha esihlahla semphepho, liwayini, emafutsa emncumo, fulaha locolisakele, kolo, tinkhomo, timvu, emahhashi, tincola, tigcili kanye nalabanye bantfu. 14 Sitselo lesihle lebewusifisa asisekho, nato tonkhe tintfo letimnandzi naletinhle setinyamalele kuwe, ngeke tiphindze titfolakale.
15 “Labatsengisi lebebatsengisa letintfo futsi labanjinga ngayo, bayawumela khashane ngenca yekwesaba kuhlushwa kwayo, bakhale baphindze balile, 16 batsi: ‘Kwaze kwaba kubi, kwaze kwaba kubi dolobha lelikhulu, lelembetse ilineni lecolisakele nalokunembala lobukhwebeletane nalobovu, lelihlotjiswe kakhulu ngeligolide, ngematje laligugu nangemapharele,+ 17 ngobe lomcebo longaka uphele ngeli-awa linye nje!’
“Bonkhe labacondzisa imikhumbi, bonkhe labahamba elwandle, labasebenta emikhunjini nabo bonkhe labatiphilisa ngekusebenta elwandle bamela khashane, 18 futsi bamemeta njengobe bebabuka intfutfu yekushiswa kwayo, batsi: ‘Likhona yini lidolobha lelinjengalelidolobha lelikhulu?’ 19 Batitsela ngemhlabatsi etinhloko, bamemeta, bakhala futsi balila batsi: ‘Kwaze kwaba kubi, kwaze kwaba kubi dolobha lelikhulu, lelo bonkhe bantfu labanemikhumbi elwandle labanjinge ngemcebo walo, ngobe libhujiswe ngeli-awa linye nje!’+
20 “Jabula wena zulu,+ nijabule nani nine labangcwele,+ nani nine baphostoli kanye nebaphrofethi, ngobe Nkulunkulu uyehlulele ngenca yenu!”+
21 Ingilosi lenemandla yatsatsa litje lelinjengelitje lelikhulu lekusila, yalijikijela elwandle, yatsi: “NeBhabhulona, lokulidolobha lelikhulu, itawujikwa phansi ngekushesha lokukhulu, futsi ngeke iphindze itfolakale.+ 22 Nemsindvo walabahlabelako labashaya emahabhu, newalabadlala tinsimbi temculo, labashaya imintjingo kanye nalabashaya emacilongo ngeke uphindze uvakale eBhabhulona. Sisebenti lesinelikhono lesenta nobe ngumuphi umsebenti naso ngeke siphindze sitfolakale khona, kantsi nemsindvo welitje lekusila ngeke uphindze uvakale. 23 Kukhanya kwesibane ngeke kuphindze kukhanye kuyo, kute nelivi lemkhwenyane nelamakoti lelitawuphindze livakale kuyo; ngobe batsengisi bayo bekungemadvodza latikhulu temhlaba, futsi tonkhe tive tidukisiwe ngenca yekusebentelana kwayo nemimoya.+ 24 Kuyo kwatfolakala ingati yebaphrofethi neyalabangcwele+ kanye neyabo bonkhe lababulawa emhlabeni.”+