Incwadzi Yekucala YemaKhosi

11 INkhosi Solomoni yatsatsa bafati labanyenti bakuletinye tive+ ngaphandle kwendvodzakati yaFaro.+ Yabatsatsa esiveni sakaMowabi,+ saka-Amoni,+ saka-Edomu, sakaSidoni+ nesemaHethi.+ 2 Labafati bebachamuka etiveni Jehova lebekakhulume ngato kuma-Israyeli watsi: “Akukafaneli niye kuto* futsi akukafaneli tite kini ngobe titawuphambukisa tinhlitiyo tenu kutsi tilandzele bonkulunkulu bato.”+ Kodvwa Solomoni wanamatsela kulabafati futsi wabatsandza kakhulu. 3 Bekanebafati labangu-700 labebavela ebukhosini, kanye nemaphovela* langu-300 futsi kancane kancane labafati bakhe bayikhweshisa inhlitiyo yakhe* kuNkulunkulu. 4 Ekugugeni kwaSolomoni,+ bafati bakhe babangela kutsi inhlitiyo yakhe ilandzele* labanye bonkulunkulu+ futsi lenhlitiyo yakhe beyingakapheleli* kuJehova Nkulunkulu wakhe. Inhlitiyo yakhe ayizange ilingise inhlitiyo yababe wakhe Davide. 5 Solomoni walandzela Ashtarothe+ nkulunkulukati wesive semaSidoni kanye naMilkhomi+ nkulunkulu lowenyanyekako wesive sema-Amoni. 6 Solomoni wenta lokubi emehlweni aJehova, akazange amlandzele ngalokuphelele* Jehova futsi akazange amlingise babe wakhe Davide.+

7 Kwaba ngaleso sikhatsi lapho Solomoni akha indzawo lephakeme+ yaKhemoshi, nkulunkulu lowenyanyekako wesive sakaMowabi, neyaMoleki,+ nkulunkulu lowenyanyekako wesive saka-Amoni.+ Letindzawo letiphakeme watakha entsabeni lebeyibukene neJerusalema. 8 Nguloko lakwentela bonkhe bafati bakhe baletinye tive lebebenta imihlatjelo yekushiswa bayentela bonkulunkulu babo.

9 Jehova wamtfukutselela kakhulu Solomoni ngobe inhlitiyo yakhe beseyikhweshile kuJehova Nkulunkulu wema-Israyeli+ lobesekabonakele kuye kabili,+ 10 futsi bekamecwayisile ngekutsi akukafaneli alandzele labanye bonkulunkulu.+ Kodvwa Solomoni akazange akulalele loko Jehova bekamyale ngako. 11 Jehova wabese utsi kuSolomoni: “Ngesizatfu sekutsi wente loku futsi awukasigcini sivumelwane sami kanye nemitsetfo lengakutjela kutsi uyigcine, sengitawutsatsa umbuso kuwe futsi ngitawunika lomunye etincekwini takho.+ 12 Kodvwa ngenca yababe wakho Davide, angeke ngikwente loko usaphila. Lombuso ngitawemuka indvodzana yakho,+ 13 kodvwa angeke ngiwutsatse wonkhe.+ Sive sinye ngitasinika indvodzana yakho+ ngenca yaDavide inceku yami nangenca yeJerusalema, lokuyindzawo lengiyikhetsile.”+

14 Jehova wase uveta umuntfu lomelene naSolomoni+ lokunguHadadi wesive saka-Edomu lobekavela ebukhosini baka-Edomu.+ 15 Ngesikhatsi Davide ancoba i-Edomu,+ Jowabe indvuna yelibutfo lemphi, wakhuphuka wayongcwaba bantfu lebebabulewe futsi wetama kubulala bonkhe bantfu labadvuna ka-Edomu. 16 (Ngobe Jowabe nalo lonkhe libutfo laka-Israyeli bahlala lapho tinyanga letisitfupha kwaze kwaba ngulapho sekabulele* bonkhe bantfu labadvuna ka-Edomu.) 17 Kodvwa Hadadi kanye naletinye tinceku tababe wakhe taka-Edomu babaleka, baya eGibhithe; Hadadi bekasengumfanyana ngaleso sikhatsi. 18 Ngako besuka kaMidiyani baya ePharani. Babese bahamba nalamanye emadvodza ePharani+ baya eGibhithe kuFaro inkhosi yakhona, yena wanika Hadadi indlu, kudla kanye nemhlaba. 19 Hadadi watfola umusa emehlweni aFaro kangangekutsi wamnika umlamu wakhe* kutsi ashade naye. LomkaFaro bekuyindlovukazi Thapenesi.* 20 Ngekuhamba kwesikhatsi, dzadzewaboThapenesi watalela Hadadi indvodzana lokutsiwa nguGenubathi futsi Thapenesi wayikhulisela endlini yaFaro. Genubathi wahlala endlini yaFaro akanye nemadvodzana aFaro.

21 NakasaseGibhithe, Hadadi weva kutsi Davide ufile futsi sewungcwatjwe lakwangcwatjwa khona bokhokho bakhe,+ nekutsi Jowabe indvuna yelibutfo lemphi sewufile.+ Ngako Hadadi watsi kuFaro: “Ngicela ungikhulule ngiye eveni lakitsi.” 22 Faro watsi kuye: “Yini lengingakakuniki yona kangangekutsi ungaze ufune kuhamba uye eveni lakini?” Hadadi wamphendvula watsi: “Kute, kodvwa ngicela ungivumele ngihambe.”

23 Nkulunkulu waveta lomunye umuntfu lowamelana naSolomoni.+ Libito lalomuntfu bekunguRezoni, indvodzana ya-Eliyada futsi bekabaleke enkhosini yakhe Hadadezeri+ inkhosi yaseSobha. 24 Wabutsa emadvodza amsingatsa futsi waba ngumholi welibutfo lemasotja lahlaselako ngesikhatsi Davide ancoba* emadvodza aseSobha.+ Ngako bahamba baya eDamaseko+ bafike bahlala lapho futsi wacala kubusa eDamaseko. 25 Rezoni wacala kumelana nema-Israyeli ngetikhatsi taSolomoni, wengeta umonakalo lobewentiwe nguHadadi futsi bekawenyanya ema-Israyeli ngesikhatsi abusa eSiriya.

26 Bekuphindze kube naJerobowamu+ indvodzana yaNebati wesive saka-Efrayimu lobekavela eSereda. Abeyinceku yaSolomoni+ futsi make wakhe bekangumfelokati, ligama lakhe kunguSeruya. Jerobowamu naye wacala kuvukela* inkhosi.+ 27 Naku lokwabangela kutsi avukele inkhosi: Solomoni bekakhe liGcuma*+ futsi wavala umkhatsi weliDolobha laDavide babe wakhe.+ 28 Jerobowamu bekalijaha lelinelikhono. Ngesikhatsi Solomoni abona kutsi lelijaha likhutsele, walibeka laphatsa+ bonkhe bantfu bendlu yaJosefa lebebenta umsebenti wenkhosi. 29 Ngaleso sikhatsi Jerobowamu waphuma eJerusalema futsi umphrofethi Ahiya+ wesive semaShilo wamkhandza asendleleni. Ahiya bekagcoke ingubo lensha futsi bebabodvwana esigangeni. 30 Ahiya wabamba lengubo lensha lebekayigcokile wayidzabula yaba ticucu letingu-12. 31 Wabese utsi kuJerobowamu:

“Titsatsele ticucu letingu-10 ngobe naku lokushiwo nguJehova Nkulunkulu wema-Israyeli: ‘Sengiyamemuka Solomoni umbuso futsi wena ngitakunika tive letingu-10.+ 32 Kodvwa sive sinye sitawusala sibe sakhe+ ngenca yenceku yami Davide+ nangenca yeJerusalema, lidolobha lengilikhetsile kuto tonkhe tive taka-Israyeli.+ 33 Ngitakwenta loku ngobe bangishiyile+ futsi bakhotsamela Ashtarothe nkulunkulukati wesive saseSidoni, naKhemoshi nkulunkulu wesive sakaMowabi kanye naMilkhomi nkulunkulu wesive saka-Amoni. Abakahambi etindleleni tami ngekwenta lokuhle emehlweni ami futsi abakatigcini timiso kanye netehlulelo tami njengobe Davide babe waSolomoni enta. 34 Kodvwa angeke ngiwutsatse wonkhe umbuso esandleni sakhe futsi ngitamgcina angumholi onkhe emalanga ekuphila kwakhe ngenca yaDavide inceku yami lengayikhetsa+ ngobe walalela imitsetfo netimiso tami. 35 Kodvwa ngitabutsatsa lobukhosi esandleni sendvodzana yakhe ngibunike wena, lokutive letingu-10.+ 36 Indvodzana yakhe ngitayinika sive sinye kuze Davide inceku yami ahlale anesibane embikwami eJerusalema,+ lidolobha lengilikhetsile kutsi ngibeke kulo libito lami. 37 Ngitakutsatsa, futsi utawubusa kuko konkhe lokufisako, utawuba yinkhosi ka-Israyeli. 38 Ngitawuba nawe nangabe ulalela yonkhe imiyalo yami futsi uhamba etindleleni tami, wente lokuhle emehlweni ami ngekutsi ulalele timiso tami nemitsetfo yami, njengobe Davide inceku yami enta.+ Nawe ngitakwakhela indlu letawuhlala njalo njengobe naDavide ngimakhele+ futsi ngitakunika ema-Israyeli. 39 Ngitayihlaza intalelwane yaDavide ngenca yaloko,+ kodvwa hhayi ngaso sonkhe sikhatsi.’”+

40 Ngako Solomoni wazama kubulala Jerobowamu kodvwa Jerobowamu wabalekela eGibhithe, waya kuShishaki+ inkhosi yaseGibhithe+ futsi wahlala lapho waze wafa Solomoni.

41 Lomunye umlandvo waSolomoni, nako konkhe lakwenta kanye nekuhlakanipha kwakhe, kubhaliwe encwadzini yemlandvo waSolomoni.+ 42 Sikhatsi* sekubusa kwaSolomoni eJerusalema kulo lonkhe laka-Israyeli, bekuyiminyaka lengu-40. 43 Solomoni wabese uyafa futsi wangcwatjwa lapho kwangcwatjwa khona bokhokho bakhe, eDolobheni laDavide babe wakhe; indvodzana yakhe Rehobhowamu+ yaba yinkhosi ngemuva kwakhe.