Hezekeli

40 Ngemnyaka wesi-25 sisekutfunjweni,+ ekucaleni kwemnyaka, ngelilanga lesi-10 laleyo nyanga, ngemnyaka wesi-14 ngemuva kwekubhujiswa kwelidolobha,+ ngalo lelolanga sandla saJehova saba setikwami, futsi wangitsatsa wangiyisa kulelidolobha.+ 2 Ngemibono, Nkulunkulu wangiyisa eveni laka-Israyeli. Wafike wangihlalisa phansi etikwentsaba lendze kakhulu,+ ngaseningizimu kwayo bekunesakhiwo lebesifana nelidolobha.

3 Watsi nakangiyisa lapho, ngafike ngabona indvodza lebeyibukeka njengelitfusi.+ Esandleni sayo beyiphetse intsambo yeflekisi* kanye nemhlanga* wekukala+ futsi beyime egedeni. 4 Lendvodza yatsi kimi: “Ndvodzana yemuntfu, bukisisa, ulalelisise futsi unakisise* konkhe lengikukhombisa kona, ngobe uletselwe loko lana. Tjela bantfu baka-Israyeli konkhe lotakubona.”+

5 Ngabona lubondza lobelutungeletele lithempeli.* Esandleni salendvodza bekunemhlanga wekukala longaba ngemamitha lamatsatfu budze.* Yacala kukala lolubondza, bukhulu balo bebungangemhlanga, nekuphakama kwalo bekungangemhlanga.

6 Wabese uta egedeni lebelibuke emphumalanga,+ wenyuka titebhisi talo. Watsi nakakala leligede, bubanti balo bebulingana nemhlanga munye, nebubanti balololunye luhlangotsi bebulingana nemhlanga munye. 7 Indlu yabogadzi ngayinye beyilingana nemhlanga munye budze nemhlanga munye bubanti, futsi sikhala lebesikhona emkhatsini wendlu yabogadzi ngayinye besingemamitha langaba mabili nesigamu.*+ Bubanti beligede lebeliseceleni kwavulandi weligede lelibuke lithempeli belilingana nemhlanga munye budze.

8 Wakala vulandi weligede lelibuke lithempeli, futsi bewulingana nemhlanga munye. 9 Wabese ukala vulandi weligede lobewungemamitha langaba mane;* futsi wakala tinsika letisemaceleni lebetingaba limitha linye;* lovulandi weligede bewuseceleni ubuke lithempeli.

10 Bekunetindlu tabogadzi letintsatfu eluhlangotsini ngalunye lweligede lelingasemphumalanga. Letindlu letintsatfu betilingana ngebukhulu, futsi netinsika lebetisemahlangotsini ato betilingana ngebukhulu.

11 Wabese ukala bubanti beligede, watfola kutsi lingemamitha langaba sihlanu;* nebudze baleligede bebungemamitha langaba sitfupha nesigamu.*

12 Lubondza lolufishane lolungembili kwetindlu tabogadzi futsi lolusemaceleni belungaba sigamu selimitha.* Tindlu tabogadzi lebetisetinhlangotsini totimbili betingemamitha langaba matsatfu* iyinye.

13 Wabese ukala ligede kusukela eluphahleni lwalenye yetindlu tabogadzi* kuya eluphahleni lwalenye, betingemamitha langaba ngu-12 nesigamu* bubanti; iminyango yaletindlu tabogadzi beyibukene.+ 14 Wabese ukala tinsika letisemaceleni lebetingemamitha langaba ngu-30* budze, kanye netinsika letisemaceleni kwemagede lebekatungelete libala. 15 Kusukela ngembili ekungeneni kweligede kuya ngembili kwavulandi encenyeni lengekhatsi yeligede bekungemamitha langaba ngu-25.*

16 Bekunemafasitelo lebekanetikhala letingumntjuntju+ kuletindlu tabogadzi nakuletinsika lebetisemaceleni ngekhatsi kweligede eluhlangotsini ngalunye. Lingekhatsi lalabovulandi belinemafasitelo eluhlangotsini ngalunye, futsi bekudvwetjwe tihlahla telusundvu+ kuletinsika letisemaceleni.

17 Wabese ungiyisa ebaleni lelingephandle, futsi ngabona emakamelo ekudlela*+ kanye nesiyilo kulo lonkhe lelibala. Bekunemakamelo ekudlela langu-30 kulesiyilo. 18 Siyilo lebesiseceleni kwemagede besilingana nebudze balamagede, lesi bekusiyilo lesingentansi.

19 Wabese ukala budze kusukela embikweligede lelingentansi kuya egedeni lokungenwa kulo nawuya ebaleni lelingekhatsi. Bebungemamitha langaba ngu-50* ngasemphumalanga nasenyakatfo.

20 Libala lelingephandle belineligede lelibuke enyakatfo, futsi wakala budze balo nebubanti balo. 21 Bekunetindlu tabogadzi letintsatfu eluhlangotsini ngalunye. Tinsika lebetisemaceleni kanye navulandi bekukalwe ngesikali lesilinganako neligede lekucala. Bekungemamitha langaba ngu-25 budze nalangaba ngu-12 nesigamu bubanti. 22 Emafasitelo ato, vulandi wato nemidvwebo yato yetihlahla telusundvu+ bekulingana naloko lobekusegedeni lelingasemphumalanga. Bantfu bebangafika kuto ngekunyuka titebhisi letingu-7, futsi vulandi wato bewusembikwato.

23 Bekuneligede ebaleni lelingekhatsi lebelibukene neligede lelingasenyakatfo, futsi bekukhona nalelinye lebelibukene nalelingasemphumalanga. Wakala libanga lelisemkhatsini walamagede, watfola kutsi belingemamitha langaba ngu-50.

24 Ngemuva kwaloko wangiyisa ngaseningizimu, futsi ngafike ngabona ligede lapho.+ Wakala tinsika lebetisemaceleni kwalo navulandi walo, futsi bekulingana nekwalalamanye emagede. 25 Bekunemafasitelo eluhlangotsini ngalunye lwalo nakuvulandi walo, futsi bewanjengalawa lamanye emafasitelo. Leligede belingemamitha langaba ngu-25 budze nalangaba ngu-12 nesigamu bubanti. 26 Bekunetitebhisi letingu-7 letenyukela kulo,+ futsi vulandi walo bewusembikwalo. Belinemdvwebo wetihlahla telusundvu etinsikeni talo lebetisemaceleni. Bekunensika yinye eluhlangotsini ngalunye lwaleligede.

27 Libala lelingekhatsi belineligede lelibuke eningizimu; wakala luhlangotsi loluseningizimu kusuka egedeni linye uye kulelinye, futsi bekungemamitha langaba ngu-50. 28 Ngemuva kwaloko wangiyisa ebaleni lelingekhatsi futsi ngangena ngeligede lelingaseningizimu; watsi nakakala ligede lelingaseningizimu watfola kutsi belilingana nalawa lamanye. 29 Tindlu tabogadzi letikulo, tinsika letisemaceleni kwalo, kanye navulandi walo bekulingana naloku lokunye. Bekunemafasitelo eluhlangotsini ngalunye lwalo nakuvulandi walo. Belingemamitha langaba ngu-25 budze nalangaba ngu-12 nesigamu bubanti.+ 30 Bekunabovulandi kuyo yonkhe lendzawo; bebangemamitha langu-12 nesigamu budze nemamitha langaba mabili nesigamu bubanti. 31 Vulandi walo bewubuke ebaleni lelingephandle, futsi bekunemdvwebo wetihlahla telusundvu etinsikeni lebetisemaceleni kwalo.+ Bekunetitebhisi letingu-8 lebetenyukela kulo.+

32 Watsi nakangiyisa ebaleni lelingekhatsi ngisuka emphumalanga, wakala leligede futsi watfola kutsi belilingana nalawa lamanye. 33 Tindlu tabogadzi letikulo, tinsika letisemaceleni kwalo, kanye navulandi walo bekulingana naloku lokunye. Bekunemafasitelo eluhlangotsini ngalunye lwalo nakuvulandi walo. Belingemamitha langaba ngu-25 budze nalangaba ngu-12 nesigamu bubanti. 34 Vulandi walo bewubuke ebaleni lelingephandle, futsi bekunemdvwebo wetihlahla telusundvu etinsikeni lebetisemaceleni kwalo. Bekunetitebhisi letingu-8 lebetenyukela kulo.

35 Wabese ungiyisa egedeni lelisenyakatfo+ futsi walikala; belilingana nalawa lamanye. 36 Tindlu tabogadzi letikulo, tinsika letisemaceleni kwalo, kanye navulandi walo bekulingana naloku lokunye. Bekunemafasitelo eluhlangotsini ngalunye lwalo. Belingemamitha langaba ngu-25 budze nalangaba ngu-12 nesigamu bubanti. 37 Tinsika talo letisemaceleni betibuke libala lelingephandle, futsi bekunemdvwebo wetihlahla telusundvu etinsikeni lebetisemaceleni kwalo. Bekunetitebhisi letingu-8 lebetikhuphukela kulo.

38 Likamelo lekudlela kanye nemnyango walo bekuseceleni kwetinsika temagede, lapho bekugezelwa khona iminikelo yekushiswa.+

39 Bekunematafula lamabili eluhlangotsini ngalunye lwavulandi weligede lapho bekuhlatjelwa khona iminikelo yekushiswa,+ iminikelo yetono+ neminikelo yelicala.+ 40 Eceleni kweligede lelingasenyakatfo bekunematafula lamabili ngephandle kweligede. Bekuphindze kube nematafula lamabili ngekhatsi kuvulandi waleligede. 41 Bekunematafula lamane eluhlangotsini ngalunye lwaleligede—bekangu-8 sekaphelele—yonkhe lemihlatjelo beyihlatjelwa lapho. 42 Ematafula lamane lebekwentelwa kuwo umnikelo wekushiswa bekakhiwe ngelitje. Budze bawo bebungemasentimitha langaba ngu-75,* nebubanti bawo bebungemasentimitha langaba ngu-75 futsi kuphakama kwawo bekungemasentimitha langaba ngu-50. Ngetulu kwawo, bekugcinwa emathuluzi ekuhlaba iminikelo yekushiswa nemihlatjelo. 43 Bekunemashelufa kulo lonkhe lubondza lolungekhatsi, bubanti bawo bungangemphama yesandla; inyama yeminikelo beyibekwa etikwalamatafula.

44 Ngephandle kweligede lelingekhatsi bekunemakamelo ekudlela ebahlabeleli;+ lamakamelo bekasebaleni lelingekhatsi eceleni kweligede lelingasenyakatfo futsi bekabuke eningizimu. Lelinye likamelo lekudlela beliseceleni kweligede lelingasemphumalanga futsi belibuke enyakatfo.

45 Lendvodza yatsi kimi: “Lelikamelo lekudlela lelibuke eningizimu, lebaphristi labenta imisebenti yasethempelini.+ 46 Lelikamelo lekudlela lelibuke enyakatfo, lebaphristi labenta umsebenti wase-al’thare.+ Bangemadvodzana aSadoki,+ lavela kumaLevi labelwe kutsi ete embikwaJehova kuze amsebentele.”+

47 Wabese ukala libala lelingekhatsi. Belingaba ngemamitha langu-50 budze nebubanti. Li-al’thare lona belisembikwelithempeli.

48 Wabese ungiyisa kuvulandi welithempeli,+ futsi wakala insika leseceleni yalovulandi, beyingemamitha langaba mabili nesigamu eluhlangotsini lunye nakulolu lolunye. Bubanti beligede bebungaba limitha linye nesigamu* eluhlangotsini lunye nakulolu lolunye.

49 Lovulandi bewungemamitha langaba ngu-10* budze nalangaba sitfupha bubanti.* Bantfu bebangafika kuwo ngekwenyuka titebhisi. Bekunetinsika emaceleni kwelubondza ngalunye.+