Imisebenti Yebaphostoli
3 BoPhetro naJohane baya ethempelini nasekusondzela insimbi yesitsatfu ntsambama,* futsi bekuli-awa lekuthantaza. 2 Kunendvodza letsite lebeyetfwelwe, futsi kusukela yatalwa, beyingakhoni kuhamba. Malanga onkhe bantfu bebavame kuyibeka eceleni kwemnyango welithempeli lobewubitwa ngekutsi Ligede Lelihle, kuze iticelele tipho kulabo lebebangena ethempelini. 3 Ngesikhatsi ibona boPhetro naJohane bangena, yacela kutsi bayiphe tipho. 4 Kodvwa bayibukisisa, futsi batsi kuyo: “Sibuke.” 5 Ngako yababuka ilindzele kutfola lokutsite kubo. 6 Kepha Phetro watsi: “Ngite lisiliva neligolide, kodvwa ngitakunika loko lenginako. Egameni laJesu Khristu waseNazaretha ngitsi kuwe, sukuma uhambe!”+ 7 Ngemuva kwaloko, wayibamba ngesandla sangesekudla wayisukumisa.+ Masinyane tinyawo tayo nemacakala ayo kwacina;+ 8 yagcuma yaya etulu,+ yase icala kuhamba. Ngemuva kwaloko yahamba nabo yaya ethempelini, igcumagcuma futsi idvumisa Nkulunkulu. 9 Bonkhe bantfu bayibona ngesikhatsi ihamba futsi idvumisa Nkulunkulu. 10 Babona nekutsi lena bekungulendvodza lebeyivame kucela tipho emnyango welithempeli lobitwa ngekutsi Ligede Lelihle,+ bamangala kakhulu futsi bajabula ngaloko lobekwenteke kuyo.
11 Ngesikhatsi lendvodza isabambe boPhetro naJohane, bonkhe bantfu bagijima kanyekanye bamangele baya kubo, endzaweni lebitwa ngekutsi nguMhubhe waSolomoni.+ 12 Nakabona loku, Phetro watsi kulabantfu: “Nine bantfu baka-Israyeli, kungani loku kunimangalisa, futsi nisibukani kangaka shengatsi ngemandla etfu nobe kwetsembeka kwetfu kuNkulunkulu lokwente lomuntfu wahamba? 13 Nkulunkulu wa-Abrahama, wa-Isaka, newaJakobe,+ longuNkulunkulu wabokhokho betfu, umkhatimulisile Jesu+ iNceku yakhe,+ loyo lenamnikela+ futsi namala embikwaPilatu, ngesikhatsi yena sekancume kumkhulula. 14 Namala lona longcwele nalolungile, futsi nacela kutsi nikhululelwe umbulali,+ 15 kepha nabulala uMmeleli Loyinhloko wekuphila.+ Kodvwa Nkulunkulu wamvusa ekufeni, futsi tsine sibofakazi baloko.+ 16 Ngelibito lakhe, nangekukholwa kwetfu kulo, lomuntfu lenimbonako nalenimatiko sewunikwe emandla. Kukholwa kuye sekwente lendvodza yaphila saka embikwenu nonkhe. 17 Banaketfu, ngiyati kutsi loku nakwentiswa kungati+ njengebaholi benu.+ 18 Kodvwa ngalendlela, Nkulunkulu wente kutsi tigcwaliseke tintfo lakhuluma ngato asebentisa baphrofethi, kutsi Khristu bekatawuhlupheka.+
19 “Ngako-ke phendvukani+ futsi nigucuke,+ khona tono tenu titowesulwa,+ kuze kufike sikhatsi sekuvuseleleka lesivela kuJehova,* 20 futsi anitfumelele Khristu lamgcobile, lokunguJesu. 21 Lona kufanele ahlale ezulwini, kuze kube ngulapho Nkulunkulu abuyisela tonkhe tintfo latetsembisa ngebaphrofethi bakhe labangcwele basendvulo. 22 Ecinisweni Mosi watsi: ‘Jehova* Nkulunkulu wenu utanivetela umphrofethi lofana nami kubantfu bakini.+ Nibokulalela konkhe lanitjela kona.+ 23 Nobe ngubani longamlaleli lomPhrofethi, utawususwa emkhatsini webantfu baNkulunkulu.’+ 24 Bonkhe baphrofethi, kusukela kuSamuweli kuye kulabo labeta emvakwakhe, bakhuluma ngalokucacile ngalamalanga.+ 25 Nine ningemadvodzana ebaphrofethi newesivumelwane Nkulunkulu lasenta nabokhokho benu,+ nakatsi ku-Abrahama: ‘Tonkhe tive temhlaba titawubusiswa ngentalelwane* yakho.’+ 26 Nkulunkulu watsi nasekayivusile iNceku yakhe, wayitfumela kini kucala+ kuze inibusise nonkhe, ngekwenta kutsi niphendvuke futsi nitishiye tindlela tenu letimbi.”