Kulandzisa KwaMatewu
23 Jesu wase ukhuluma nesicumbi sebantfu nebafundzi bakhe, watsi: 2 “Tati temtsetfo nebaFarisi batibeke bona esihlalweni saMosi. 3 Ngako-ke tonkhe tintfo labanitjela tona tigcineni futsi nitente, kodvwa ningabalingisi ngobe bona basho tintfo kepha bangatenti.+ 4 Babopha imitfwalo lesindzako bayetfwese bantfu,+ kodvwa bona abafuni kuyitsintsa ngisho nangemuno.+ 5 Konkhe labakwentako bakwentela kubukwa bantfu,+ ngobe batenta tibe tinkhulu tikhehle temabhokisana letinemibhalo labatifakela kutivikela,+ belule netimvakaza tetingubo tabo.+ 6 Batsandza tindzawo letincono emadzilini, netihlalo letingembili* emasinagogeni,+ 7 futsi batsandza kubingelelwa etimakethe nekubitwa ngekutsi Rabi.* 8 Kodvwa nine banganibiti ngekutsi Rabi, ngobe munye kuphela longuMfundzisi wenu,+ nine nibazalwane. 9 Ngetulu kwaloko, ningabiti muntfu lapha emhlabeni ngekutsi ngubabe wenu ngobe munye Babe wenu,+ nguLoyo losezulwini. 10 Banganibiti ngekutsi nibaholi ngobe uMholi wenu munye, nguKhristu. 11 Kodvwa lomkhulu kunani nonkhe kufanele abe yinceku yenu.+ 12 Nobe ngubani lotiphakamisako, utawutfotjiswa,+ futsi nobe ngubani lotitfobako, utawuphakanyiswa.+
13 “Maye kini nine tati temtsetfo nebaFarisi, batentisi! Nivimbela bantfu kutsi bangene eMbusweni wemazulu, ngobe nine ngeke ningene kuwo, nalabo labafuna kungena kuwo anibavumeli.+ 14 *——
15 “Maye kini nine tati temtsetfo nebaFarisi, batentisi!+ Ngobe nidzabula lwandle kanye nemave kute nigucule bantfu kutsi bangene enkholweni yenu, bese nasebagucukile nibente bafanelwe yiGehena* kwendlula nine.
16 “Maye kini nine baholi labatimphumphutse,+ ngobe nitsi: ‘Nangabe umuntfu afunga lithempeli akunandzaba, kodvwa nangabe afunga ligolide lelisethempelini, utibopha yena.’+ 17 Nine tilima lenitimphumphutse! Yini lebalulekile, ligolide nobe lithempeli, lokungilo lelenta leligolide libe ngcwele? 18 Niphindze nitsi: ‘Nangabe umuntfu afunga li-al’thare akunandzaba, kodvwa nangabe afunga umnikelo lokulo, utibopha yena.’ 19 Nine timphumphutse! Yini lebalulekile, ngumnikelo nobe li-al’thare, lokungilo lelenta lomnikelo ube ngcwele? 20 Ngako-ke, umuntfu lofunga li-al’thare ufunga lona nato tonkhe tintfo letikulo, 21 futsi loyo lofunga lithempeli ufunga lona naLoyo lohlala kulo,+ 22 kantsi loyo lofunga lizulu ufunga sihlalo sebukhosi saNkulunkulu naLoyo lohlala kuso.
23 “Maye kini nine tati temtsetfo nebaFarisi, batentisi! Ngobe nikhipha kwelishumi kweminti, kwelidile nekwekhumini,+ kodvwa anitinaki tintfo letibaluleke kakhulu eMtsetfweni, njengekulunga,+ sihawu+ nekwetsembeka. Kona letintfo bekufanele nitente, kodvwa hhayi kutsi ningasatinaki leti letinye.+ 24 Nine baholi labatimphumphutse,+ nikhetsa imphungane+ kodvwa nimita likamela!+
25 “Maye kini nine tati temtsetfo nebaFarisi, batentisi! Ngobe nigeza lingephandle lendzebe nelesitja,+ kodvwa ngekhatsi nibe nigcwele bukhali*+ futsi anikhoni nekulawula tifiso tenu.+ 26 MFarisi loyimphumphutse, cale ugeze lingekhatsi lendzebe nelesitja, kuze nelingephandle litewuhlanteka.
27 “Maye kini nine tati temtsetfo nebaFarisi, batentisi!+ Ngobe nifana nemathuna lahucwe aba mhlophe,+ labonakala amahle ngephandle kodvwa ngekhatsi agcwele ematsambo ebantfu labafile nako konkhe kungcola. 28 Nani nibonakala nilungile emehlweni ebantfu, kodvwa ngekhatsi nigcwele kutentisa nebubi.+
29 “Maye kini nine tati temtsetfo nebaFarisi, batentisi!+ Ngobe nakha emathuna ebaphrofethi, nihlobise nemathuna ebantfu labalungile,+ 30 bese nitsi: ‘Kube besiphila emalangeni abokhokho betfu, besingeke sibambisane nabo ekubulaleni baphrofethi.’ 31 Ngako-ke nitilahla nine ngelicala kutsi ningemadvodzana alabo lababulala baphrofethi.+ 32 Chubekani-ke nicedzele loko lokwacalwa bokhokho benu.
33 “Nine tinyoka, ntalelwane yemabululu,+ nitasibalekela njani sijeziso saseGehena?*+ 34 Ngaleso sizatfu, ngitfumela baphrofethi kini,+ nebantfu labahlakaniphile kanye nebafundzisi.+ Labanye nitababulala+ futsi nibabulalele etigodvweni, kantsi labanye nitabashaya+ emasinagogeni enu niphindze nibaphatse kabi+ kuwo onkhe emadolobha, 35 ngaleyondlela ingati yabo bonkhe labalungile emhlabeni iyawuba setikwenu, kusukela ku-Abela lobekalungile+ kuze kuyofika kuZakhariya indvodzana yaBharakhiya, lenambulalela emkhatsini wendzawo lengcwele neli-al’thare.+ 36 Ngicinisile ngitsi kini: Tonkhe letintfo titakwehlela lesitukulwane.
37 “Jerusalema, Jerusalema, wena lobulala baphrofethi, nalobagcoba ngematje labo labatfunyelwe kuwe,+ kukanyenti ngifuna kubagcogcela ndzawonye bantfwana bakho, kuhle kwesikhukhukati sigcogcela emantjwele aso ngaphansi kwetimphiko taso! Kodvwa nine anizange nivume.+ 38 Bukani-ke, indlu yenu seyishiywe nani.*+ 39 Ngako ngitsi kini: Ngeke nisangibona kusukela nyalo kuze kube ngulapho nitsi: ‘Ubusisiwe loyo lota ngelibito laJehova!’”*+