Kulandzisa KwaMatewu
18 Ngaleso sikhatsi, bafundzi beta kuJesu batsi: “Ngubani vele lomkhulu kunabo bonkhe eMbusweni wemazulu?”+ 2 Ngako wabita umntfwana lomncane wammisa emkhatsini wabo, 3 wase utsi: “Ngicinisile ngitsi kini: Nangabe ningagucuki* nifane nebantfwana labancane,+ ngeke ningene eMbusweni wemazulu.+ 4 Ngako nobe ngubani lotawutitfoba afane nalomntfwana, nguye lomkhulu kunabo bonkhe eMbusweni wemazulu,+ 5 futsi nobe ngubani lowemukela lomntfwana lomncane ngenca yelibito lami, uyangemukela nami. 6 Kodvwa nobe ngubani lokhubekisa lomunye walaba labakholwako labanjengebantfwana, kutawuba ncono kutsi kuboshelwe litje lelikhulu lekusila entsanyeni yakhe, lelinjengalelo leligucuguculwa yimbongolo, bese ujikwa elwandle.+
7 “Maye ngemhlaba, ngobe unetintfo letiwisa bantfu ekukholweni! Kona tintfo letinjalo titawuba khona, kodvwa maye kuloyo muntfu letita ngaye! 8 Nangabe sandla sakho nobe lunyawo lwakho lukonisa, lujube ululahle.+ Ngobe kuncono kutsi utfole kuphila ukhubatekile nobe uyinchute, kunekutsi ubhujiswe phakadze unato totimbili tandla kanye netinyawo.+ 9 Nangabe liso lakho likonisa, likhiphe ulilahle, ngobe kuncono kutsi utfole kuphila uyindlobho, kunekutsi ujikwe eGehena* levutsa umlilo unawo omabili emehlo.+ 10 Caphelani kutsi ningedzeleli ngisho namunye kulaba labanjengebantfwana, ngobe ngicinisile ngitsi: Tingilosi tabo tihlale tisembikwaBabe losezulwini.+ 11 *——
12 “Nicabangani? Nangabe indvodza letsite inetimvu letingu-100 bese yinye yato iyalahleka,+ ngeke yini itishiye etintsabeni leti letingu-99, ihambe iyofuna lena lelahlekile?+ 13 Ngiyanitjela ngitsi nangabe iyitfola, ijabula kakhulu ngayo kwendlula leti letingu-99 lebetingakalahleki. 14 Ngendlela lefanako, naBabe* losezulwini akafisi kutsi kubhubhe ngisho namunye kulaba labanjengebantfwana.+
15 “Ngetulu kwaloko, nangabe umnakenu ona, hamba uye kuye umvetele liphutsa lakhe* ninobabili kuphela.+ Nangabe akulalela, utawube umzuzile.+ 16 Kodvwa nangabe angakulaleli, hamba nalomunye umuntfu nobe nalababili kute indzaba icinisekiswe bofakazi lababili nobe labatsatfu.+ 17 Nangabe angabalaleli, khuluma nelibandla. Nangabe nalo angalilaleli, mtsatse njengemuntfu wetive+ nanjengemtselisi.+
18 “Ngicinisile ngitsi kini: Nobe yini leniyibopha lapha emhlabeni itawube seyivele iboshiwe nasezulwini, nanobe yini leniyikhumulako lapha emhlabeni itawube seyivele ikhunyuliwe nasezulwini. 19 Ngitsi kini: Nangabe lababili kini bathantaza ngentfo letsite lebalulekile, Babe losezulwini utawubentela yona.+ 20 Ngobe nangabe kunalababili nobe labatsatfu labahlangene ngelibito lami,+ nami ngisuke ngilapho.”
21 Ngemuva kwaloko Phetro weta kuye watsi: “Nkhosi, umuntfu kufanele angone kangakhi solo ngimtsetselela? Tikhatsi letingu-7 yini?” 22 Jesu wamphendvula watsi: “Ngitsi kuwe, hhayi tikhatsi letingu-7, kodvwa letingu-77.+
23 “Kungako uMbuso wemazulu ufana nenkhosi lebeyifuna tisebenti tayo tibhadale imali letatiyikweleta yona. 24 Yatsi naseyicala kutibhadalisa, kwaletfwa sisebenti lesasiyikweleta emathalenta langu-10 000.* 25 Kodvwa ngobe besite imali yekubhadala, inkhosi yaso yatsi asitsatfwe sitsengiswe, sona nemfati waso kanye nebantfwana baso, nako konkhe lebesinako kute itewutfola imali yayo.+ 26 Ngako lesisebenti saguca sayincenga satsi: ‘Ngicela ungibeketelele, ngitakubhadala konkhe lengikukweleta kona.’ 27 Lenkhosi yasihawukela lesisebenti yatsi asikhululwe, yasesula nesikweleti saso.+ 28 Kodvwa satsi nasiphuma, sahlangana nalesinye sisebenti lesasisikweleta bodenariyo* labangu-100. Sasibamba, sasekhama satsi: ‘Ngibhadale konkhe longikweleta kona.’ 29 Ngako lesisebenti saguca, satincengela satsi: ‘Ngicela ungibeketelele, ngitakubhadala konkhe lengikukweleta kona.’ 30 Nanome kunjalo, asizange sivume kusibeketelela, kodvwa sahamba sasifaka ejele kute sihlale lapho site sibhadale konkhe lesasisikweleta kona. 31 Tatsi leletinye tisebenti natibona konkhe loku lobekwentekile, teva buhlungu kakhulu, tahamba taya enkhosini yato tayichazela konkhe. 32 Inkhosi yasibita lesisebenti yatsi: ‘Wena sisebenti lesibi, mine ngisesulile sikweleti sakho ngesikhatsi ungincenga. 33 Bekungakafaneli yini nawe usihawukele lelesinye sisebenti njengobe nami ngikuhawukele?’+ 34 Ngako lenkhosi yatfukutsela, yatjela bogadzi kutsi basivalele ejele, sihlale lapho site sibhadale konkhe lesasikukweleta. 35 NaBabe losezulwini utawenta lokufanako+ kini nangabe ningabacoleli labanye bantfu ngalokusuka enhlitiyweni.”+