Leya KuThithusi

1 Mine Pawula, ngisigcili saNkulunkulu nemphostoli waJesu Khristu, futsi kukholwa kwami kuhambisana nekukholwa kwalabakhetsiwe baNkulunkulu kanye nelwati lolungulonalona lweliciniso, loluvumelana nekwesaba Nkulunkulu, 2 nalolusekelwe etsembeni lekuphila lokuphakadze,+ loko Nkulunkulu longeke acale emanga+ lakutsembisa kusukela endvulo, 3 kodvwa ngesikhatsi sakhe lesifanele wenta kutsi livi lakhe latiwe ngemsebenti wekushumayela lengaphatsiswa wona,+ ngekuvumelana nemyalo waNkulunkulu, longuMsindzisi wetfu. 4 Ngibhalela Thithusi, umntfwana weliciniso futsi lolikholwa lengikanye nalo:

Shengatsi ungemukela umusa lomkhulu kanye nekuthula lokuvela kuNkulunkulu longuBabe, nakuKhristu Jesu uMsindzisi wetfu.

5 Ngakushiya eKhrethe kuze ulungise tintfo lebetidzinga kulungiswa* futsi ubeke labadzala bemabandla kuwo onkhe emadolobha, njengobe nje ngakuyala, ngatsi: 6 Lomdzala welibandla kufanele abe yindvodza lengasolwa ngalutfo, abe nemfati munye, futsi abe nebantfwana labakholwako labangakadvumi ngekutitika ngebubi* nalabangavukeli.+ 7 Njengobe umbonisi angumphatsi lobekwe nguNkulunkulu, kufanele angasoleki, angabi nenkhani,+ angabi nenhlitiyo lencane,+ angabi sidzakwa, angabi nebudlova,* angafuni kutizuzisa yena, 8 kodvwa kufanele emukele tihambi,+ atsandze lokuhle, abe nengcondvo lebhadlile,*+ abe ngumuntfu lolungile, etsembeke,+ atibambe,+ 9 futsi indlela lafundzisa ngayo+ ikhombise kutsi ubambisise livi leletsembekile,* kuze atokhona kukhutsata* labanye ngemfundziso lephilile,*+ aphindze ekhute+ labo labaphikisako.

10 Ngobe kunemadvodza lamanyenti lavukelako, lakhuluma tintfo letingasiti ngalutfo, nalakhohlisako, ikakhulukati lawo labambelele ekusokeni.+ 11 Lawo madvodza kufanele abindziswe, ngobe achubeka acitsa yonkhe imindeni ngekufundzisa tintfo lokungakafaneli atifundzise kuze nje atizuzise wona. 12 Lomunye longumphrofethi wawo watsi: “Bantfu baseKhrethe bahlale bacala emanga, batilwane tesiganga letilimatako, netimiti letivilaphako.”

13 Lobufakazi buliciniso. Ngaleso sizatfu, chubeka ubekhuta kamatima, kuze batophila ekukholweni, 14 bangalaleli tinganekwane temaJuda nemiyalo yemadvodza lalahla liciniso. 15 Tonkhe tintfo tihlantekile kubantfu labahlantekile;+ kodvwa kute intfo lehlantekile kubantfu labangcolile nalabete kukholwa, ngobe tingcondvo tabo nabonembeza babo bangcolile.+ 16 Bamemetela embikwebantfu kutsi bayamati Nkulunkulu, kodvwa bayamphika ngemisebenti yabo,+ ngobe bayenyanyeka, abalaleli, futsi abakufaneli kwenta nobe ngumuphi umsebenti lomuhle.