Kulandzisa KwaMatewu
14 Ngaleso sikhatsi, iNkhosi Herodi yeva ngaJesu,+ 2 yase itsi etincekwini tayo: “Lomuntfu nguJohane uMbhabhatisi. Uvukile ekufeni, kungako enta letimangaliso letingaka.”+ 3 Herodi* abembophile Johane, wamvalela ejele ngenca yaHerodiyasi umfati waFiliphu umnakabo,+ 4 ngobe Johane abesolo amtjela atsi: “Akukavumeleki kutsi umtsatse abe ngumkakho.”+ 5 Nanobe Herodi abefuna kumbulala, kepha abesaba bantfu ngobe bebatsatsa Johane njengemphrofethi.+ 6 Kwatsi ngelilanga lekugubha kutalwa kwaHerodi,+ indvodzakati yaHerodiyasi yadansa, yamjabulisa kakhulu Herodi,+ 7 waze wafunga watsi utayinika nobe ngabe yini leyicelako. 8 Ngemuva kwekutsi yelulekwe ngumake wayo, lentfombatana yatsi: “Nginike ngemgcwembe inhloko yaJohane uMbhabhatisi.”+ 9 Inkhosi yeva buhlungu kakhulu, kodvwa ngenca yesifungo lebeseyisentile embikwalabo lebebakhona edzilini,* yatsi abayinikete. 10 Herodi watfumela lisotja kutsi liyojuba inhloko yaJohane ejele. 11 Lenhloko yase iletfwa ngemgcwembe yanikwa lentfombatana, yona yayimikisa kumake wayo. 12 Ngekuhamba kwesikhatsi, bafundzi baJohane beta batsatsa sidvumbu sakhe bayosingcwaba, babese babikela Jesu. 13 Nakeva ngalendzaba, Jesu wesuka lapho wahamba ngesikebhe waya endzaweni lethulile kute abe yedvwa. Kodvwa sicumbi sebantfu satsi nasiva ngaloko, samlandzela ngetinyawo sisuka kulamanye emadolobha.+
14 Nakehla esikebheni, wabona sicumbi lesikhulu sebantfu, futsi wasihawukela,+ welapha labo lebebagula.+ 15 Kwatsi nasekuhwalala bafundzi bakhe beta kuye batsi: “Lendzawo isiganga futsi selivele lishonile; ngako tjela labantfu bahambe kute baye emadolobheni bayewutitsengela kudla.”+ 16 Kodvwa Jesu watsi kubo: “Kute sidzingo sekutsi bahambe; bapheni nine kudla.” 17 Batsi kuye: “Site kudla, ngaphandle nje kwetinkhwa letisihlanu netinhlanti letimbili.” 18 Watsi kubo: “Tiletseni lapha.” 19 Wase utjela labantfu kutsi bahlale phansi etjanini. Watsatsa letinkhwa letisihlanu naletinhlanti letimbili, wabuka ezulwini, wabonga,+ futsi ngemuva kwekutihlephula letinkhwa, watinika bafundzi bakhe, bona base batinika labantfu. 20 Bonkhe badla besutsa, futsi bafundzi babutsa kudla lobekusele, kwagcwala bobhasikidi labangu-12.+ 21 Labo labadla bekungemadvodza langaba ngu-5 000, kanye nebafati nebantfwana.+ 22 Ngekushesha, Jesu watjela bafundzi bakhe kutsi bagibele esikebheni bahambe embili futsi bewelele ngesheya njengobe yena asakhulula lesicumbi sebantfu.+
23 Ngemuva kwekukhulula labantfu, wakhuphuka waya entsabeni wayothantaza.+ Kwaze kwaba mnyama solo ahleti lapho yedvwana. 24 Kwatsi lapho lesikebhe sesihambe kakhulu,* sacala kushaywa ngemagagasi kamatima, ngobe umoya bewuphambana nabo. 25 Ekuseni kakhulu,* Jesu weta kubo ahamba etikwelwandle. 26 Nabambona ahamba etikwelwandle, bafundzi bakhe besaba, batsi: “Siyabhudza yini?” Futsi bamemeta betfukile. 27 Kodvwa Jesu watsi kubo: “Banini nesibindzi, ningesabi, ngimi lo!”+ 28 Phetro watsi kuye: “Nkhosi, nangabe kunguwe, ngitjele ngite lapho kuwe ngihamba etikwemanti.” 29 Jesu watsi: “Wota!” Ngako Phetro wehla esikebheni wahamba etikwemanti wacondza ngakuJesu. 30 Kodvwa watsi nakabona lesiphepho wefikelwa kwesaba, wase ucala kucwila, wamemeta watsi: “Nkhosi, ngisindzise!” 31 Ngekushesha, Jesu welula sandla sakhe wambamba, watsi: “Wena lonekukholwa lokuncane, yini lekwenta ungabate?”+ 32 Batsi nasebagibele esikebheni, lesiphepho saphela. 33 Ngako labafundzi lebebasesikebheni baguca embikwakhe, batsi: “Vele uyiNdvodzana yaNkulunkulu.” 34 Bewela base befika eGenesaretha.+
35 Emadvodza akuleyo ndzawo atsi nakabona Jesu, atfumela umlayeto kuto tonkhe tindzawo letisedvute, futsi bantfu baletsa kuye bonkhe lebebagula. 36 Bamncenga kutsi bamane nje batsintse umphetfo wengubo yakhe yangetulu,+ futsi bonkhe labawutsintsa baphila.